Yuxarıda verdiyimiz sualın müsbət cavabını zamanın özü verdi. Azərbaycanın Ermənistanla şərti sərhəddə, Laçın yolunun başlanğıcında, Həkəri çayının üzərində qurduğu nəzarət-buraxılış məntəqəsinin bölgədə hamı üçün sülhün və təhlükəsizliyin təmin olunması baxımından özünü tamamilə doğrultduğunu əminliklə söyləyə bilərik.
Bəli, Ermənistanla sərhəd təhlükəsizliyimizin təmin edilməsi həm də qanunun aliliyindən irəli gəlir. Bunu həyata keçirən Azərbaycan Prezidenti İlham Əliyev məsələ ilə bağlı ABŞ Dövlət katibi Antoni Blinkenlə telefon danışığında, həmçinin Fransanın Xarici işlər naziri Ketrin Kolonnanı qəbul edərkən Bakının mövqeyini birmənalı şəkildə bildirdi: “Azərbaycan-Ermənistan sərhədində sərhəd-buraxılış məntəqəsinin yaradılması Azərbaycanın suveren hüququdur və Azərbaycanın ərazi bütövlüyünün təmin edilməsidir”.
Bu, sözsüz ki, dövlət başçısının apardığı ardıcıl hərbi və diplomatik siyasətin nəticəsi olaraq əldə olunmuş uğurdur. Eyni zamanda, Bakının Ermənistan ordusunun tör-töküntüsünün ərazilərimizdə qalmasına, sülhməramlıların onlara silah-sursat, mina daşımağa şərait yaratmasına, Moskvanın Ruben Vardanyan planına, təbii sərvətlərimizin talan edilməsinə, İran vətəndaşlarının qanunsuz olaraq torpaqlarımıza keçməsinə, Fransa Senatının sərsəm bəyanatlarına, eləcə də regionda yeni reallığı qəbul etmək istəməyən, Azərbaycanın güclənməsini arzulamayan qüvvələrə verilən tutarlı cavab idi.
Nəzarət-buraxılış məntəqəsinin fəaliyyətə başladığı ilk günlərdə Qarabağda yaşayan etnik ermənilərdə müşahidə edilən müəyyən gərginlikdən artıq əsər-əlamət qalmayıb. Çünki Azərbaycan sərhədçiləri onların hər iki istiqamətdə sərbəst gediş-gəlişinə lazımi şəraiti yaradıblar. Azərbaycan sərhədçiləri buraxılış məntəqəsindən keçən ermənilərlə nəzakətlə davranır, yüksək mədəniyyətlə onlarla təmas qururlar. Onlardan zəruri yoxlanışdan keçmələri üçün sərhədçi-nəzarət kabinəsinə yaxınlaşmaları xahiş olunur və bundan sonra avtomobillərin yük yerinə vizual baxış keçirilir.
Bütün proses sərhədçilərimizin yüksək peşəkarlığı ilə müşayiət olunur. İyirmi beş gün əvvəllə müqayisədə görünən odur ki, Qarabağın erməni əhalisi artıq reallıqla barışmaqdan, ən vacibi isə bölgədə rahat və təhlükəsiz yaşamaları və hərəkət etmələri üçün Azərbaycan qanunvericiliyinə tabe olmaqdan başqa çıxış yollarının olmadığını qəbul ediblər. Onlar bu məntəqə qurulduqdan sonra azərbaycanlıların münasibəti barədə separatçıların apardığı anti-təbliğatın doğru olmadığını öz gözləri ilə görürlər. İnanırıq ki, indi Bakının konkret təklifini – Azərbaycan vətəndaşı olmaq şərtini qəbul etmək barədə ciddi düşünməyə başlayıblar. Bölgəyə humanitar xarakterli yüklərin daşınmasına hansısa maneçilik törətməkdən söhbət gedə bilməz.
İki gün bundan əvvəl Həkəri postunda lentə alınmış və telekanallarda, sosial şəbəkədə nümayiş etdirilən kadrlardan da göründüyü kimi, Azərbaycan sərhədçiləri və gömrükçüləri tərəfindən sənədləri yoxlanılan Qarabağın etnik erməniləri məntəqədə yaradılmış şəraitdən və gördükləri münasibətdən razıdırlar.
Bəs aprelin 23-dək vəziyyət necə idi?
2023-cü il aprelin 23-dək Laçın-Xankəndi yolundan humanitar deyil, hərbi məqsədlər üçün istifadə edilirdi. Bu vəziyyət isə beynəlxalq hüquq normaları ilə bir araya sığmayan presedent yaradırdı. Aprelin 22-də İrəvan birtərəfli qaydada Azərbaycan-Ermənistan sərhədinin Laçın yolunun başlanğıcına yaxın ərazidə post qurmağa başladı. Buna cavab olaraq Azərbaycan öz suveren ərazisində, Laçın yolunun başlanğıcında, şərti sərhəddə nəzarət-buraxılış məntəqəsini reallaşdırmalı idi və bunun anonsu xeyli əvvəl verilmişdi. Bu addımı şərtlərindirən digər səbəb ekofəalların Laçın-Xankəndi yolunda həyata keçirdikləri aksiyalarda irəli sürdükləri tələblər idi. Tələblər ondan ibarət idi ki, Azərbaycanın Qarabağ iqtisadi rayonunda təbii sərvətlərimizin qeyri-qanuni daşınaraq Ermənistana aparılmasının qarşısı alınsın. Bunlardan heç də az əhəmiyyət kəsb etməyən başqa bir səbəb isə Azərbaycanın Vətən müharibəsində zəfərindən sonra imzalanmış 10 noyabr Bəyanatının müddəalarına uyğun olaraq Ermənistan silahlı qüvvələrinin qalıqlarının Qarabağdan çıxarılması və əraziyə Rusiya sülhməramlı kontingentinin yerləşdirilməsi idi. Amma biz reallıqda nəyi gördük? Gördük ki, Qarabağda yaşayan ermənilərin gediş-gəlişini asanlaşdırmaq məqsədilə yaradılan yoldan separatçılar fərqli məqsədlər üçün istifadə edirlər. Həmin yolla Ermənistandan Qarabağdakı qeyri-qanuni silahlı birləşmələrə, separatçılara silah-sursat, mina, canlı qüvvə daşınır, üçüncü dövlətin xüsusi xidmət orqanları tez-tez bu ərazilərə səfərlər edirlər. Və bu təxribatlar nəinki rus sülhməramlılarının gözü qarşısında baş verirdi, bundan daha betəri, silah-sursatla, minalarla dolu kolonları məhz onlar müşayiət edirdilər. Artıq foto-video görüntülərlə təsdiqini tapan bu faktlara göz yummaq mümkün deyildi.
Söhbət həm də laçınlıların təhlükəsizliyindən gedir
Azərbaycanın beynəlxalq hüququn prinsipləri ilə üst-üstə düşən bu addımını həzm edə bilməyən Ermənistan hələ də Bakını şərti sərhəddə vəziyyəti gərginləşdirməkdə, Qarabağ bölgəsini blokadaya alaraq humanitar böhran yaratmaqda, burada etnik təmizləmə planını həyata keçirməyi hədəfləməkdə günahlandırmağa çalışır. Hayların bununla bağlı yalan və təhrifdən yoğrulmuş müraciətlərinə reaksiya verənlər isə yalnız Asiya və Avropadakı “bacı” və “qardaşları”, bir də erməni lobbisinin pulla satın aldığı personalardır. Amma dünya artıq ermənilərin dezinformasiyalarından, yalanlarından bezib.
Yuxarıda Həkəri postunun qurulmasını şərtləridirən amilləri sadaladıq. Bu sıraya daha birini – laçınlıların doğma torpaqlarına qayıdışı ilə bağlı onların təhlükəsizliyinin təmin olunmasını da əlavə etməyi zəruri sayırıq. Otuz il işğal altında inləyən digər rayonlarımızla müqayisədə dağıntıya daha az məruz qalmış və bir güllə belə atmadan yağıdan geri aldığımız Laçında bərpa-quruculuq işləri sürətlə aparılır və torpağın əsl sahiblərinin ora qayıtması bu yaxınlarda gerçəkləşəcək. Birinci mərhələdə Laçın şəhərinin özünə, sonra yolun ətrafındakı kəndlərə qayıdacaq vətəndaşlarımızın təhlükəsizliyi Bakı üçün önəmli məsələdir. Bu nöqteyi-nəzərdən Həkəri çayının üzərində qurduğumuz sərhəd nəzarət-buraxılış məntəqəsinin əhəmiyəti birə-beş artır.
Yəqin vətəndaşlığımızı qəbul edəcək Qarabağın dinc erməni sakinlərinin Azərbaycana yenidən inteqrasiyası da məhz bu ərazidən başlayacaq...
Aydın QULİYEV,
Milli Məclisin deputatı
10 noyabr 2020-ci il Bəyanatından sonra Azərbaycan sərhədçiləri tədricən bütün şərti sərhəd xətti boyu ərazini öz nəzarətinə götürdülər. Yalnız Laçın yolu müvəqqəti olaraq Rusiya sülhməramlılarının nəzarəti altında qalmışdı. Bu məntəqə gec-tez qurulacaqdı. Ermənistan və onu dəstəkləyən xarici qüvvələr fikirləşməli idi ki, Azərbaycan bu yolu nəzarətsiz buraxacaq və öz ərazisinə təxribatçı qrupların sərbəst daxil olmasına dözəcək. Bu, mümkün deyildi. 2020-ci ildən sonra İrəvan ərazi bütövlüyümüzü tanımaqdan imtina edirdi, Rusiya sülhməramlılarının nəzarətindəki ərazimizdə 10 min nəfərlik silahlı birləşməsini saxlayırdı və həmin erməni silahlıları Azərbaycan ordusuna qarşı mütəmadi təxribatlar törədirdilər. Hətta 2021-ci ildə Ermənistanda istehsal olunan minaları diversiya qrupları daşıyaraq ərazilərimizdə basdırırdılar. Məhz bunun nəticəsində 300-ə qədər vətəndaşımız mina partlayışlarında həlak olmuş və ya xəsarət almışdır. Bu amillər Laçın yolunda sərhəd-buraxılış məntəqəsinin qurulmasını zəruri etdi. 2023-cü il aprelin 23-də Laçın yolunda nəzarət-buraxılış məntəqəmiz qurulduqdan sonra şərti sərhədimizə tam nəzarət təmin olundu. İndi Qarabağda yaşayan ermənilər sənədlərini təqdim etməklə, bu məntəqədən rahat keçə bilirlər. İrəvanın, separatçıların blokada iddialarına cavab kimi deyirik: bu necə blokadadır ki, insanlar sərbəst şəkildə Azərbaycandan kənara çıxır və geri qayıdırlar. Bu necə blokadadır ki, sakinlərə hər cür kommunal xidmətlər göstərilir. Sayları 25 minə çatan bu sakinlər Azərbaycan vətəndaşı kimi Qarabağda qalıb yaşamağı, yaxud xaricdə özlərinə yeni ünvan seçməkdə də sərbəstdirlər.
İmran BƏDİRXANLI, “Xalq qəzeti”