“Türkiyə parlamentində MHP yenə də səs üstünlüyü qazandı və bu faktın can Azərbaycanla əlaqələrimizi daha da genişləndirəcəyinə əminəm”. Bu fikirləri “Xalq qəzeti”nə açıqlamasında Türkiyənin Milliyyətçi Hərəkat Partiyasının (MHP) Ərzurum millət vəkili Kamil Aydın bildirib. 

MHP-nin Türk dünyası və bey­nəlxalq əlaqələr üzrə sədr müavini olan millət vəkili deyib ki, parlamentdə Azər­baycan da daxil olmaqla Türk Dövlətləri Təşkilatları ilə əməkdaşlığın güclənmə­si nəzərdə tutulub: 

–Yeni tərkibli parlamentimizin fəa­liyyəti xeyirlərə vəsilə olsun. Əminəm ki, türk və islam dünyası ilə daha uğurlu fəaliyyətlərimiz olacaq, bununla da bü­tün maneələrin öhdəsindən birlik-bəra­bərlik içində gəlməyi bacaracağıq.

Kamil Aydın deyib ki, dünyanın maraqla izlədiyi 14 may prezident və 28.dönəm parlament seçkiləri demok­ratik şəraitdə keçib: 

–Bu seçkinin demokratik mühit­də keçdiyinə şahid olduq. İlk növbədə Qərb demokratiyasında çox nadir rast gəlinən fəal seçici faktoru özünü bir daha göstərib. Belə ki, Qərb demok­ratiyasında əhalinin seçkidə iştirakı 50 faizi keçə bilmədiyi halda Türkiyədə bu göstərici 90 faizə çatdı. Bu isə türk mil­lətinin demokratiyaya olan sayğısının və azad ruhlu olmasının bariz nümunə­sidir. İkinci önəmli nüans seçkilərin 86 milyonluq Türkiyə Cümhuriyyətində təhlükəsiz şəkildə gerçəkləşdirilməsidir. Belə ki, biz Türkiyənin kənd, rayon və böyük şəhərlərində effektiv, təhlükəsiz, narahatlıq yaratmayan seçki prosesini müşahidə etdik. 

Bir sözlə, bu, Qərb demokratlarına dərs verən bir seçki oldu. Digər tərəf­dən, həm beynəlxalq müşahidəçilər, həm də Türkiyənin seçki üzrə səlahiy­yətli şəxslərinin verdiyi məlumatlara görə, seçkilər şəffaf keçirildi. Bu pro­sesin ən önəmli bir tərəfi də öncədən müəyyən edildiyi kimi - səhər saat 8.00-da start verilən axşam saat 17.00-da başa çatan seçkinin nəticələrinin ic­timaiyyətin gözləri önündə açıqlanması idi. 

Kamil Aydın əvvəlki seçkilərdən fərqli olaraq “Əsrin fəlakəti” adı verilən dağıdıcı zəlzələdən sonra Türkiyədə bu seçki prosesinin təhlükəsiz şəkildə ke­çirilməsini də təqdir edib: 

–Təxminən, iki Hollandiya böyüklü­yündə olan coğrafiyada baş verən zəl­zələ dağıntılarının çox sürətlə aradan qaldırılması ilə yanaşı, həm də o bölgə­dəki vətəndaşlarımızın təhlükəsiz, sağ­lam bir şəkildə səs vermələrini təmin etmək də önəmli idi. 

Millət vəkili ölkə daxilində və xari­cində bu seçki prosesinə mane olmaq istəyən qüvvələrə rəğmən “Cumhur İt­tifaqı”nın bu seçkidə yüksək nəticə qa­zanmasını diqqətəlayiq hesab edir: 

– Əziz millətimiz “Cumhur İttifaqı” ilə artıq 21-ci əsri gerçəkdən Türk əsri etmək yoluna çıxıb, dövlətimiz daha bir yüzüncü ilinə qədəm qoyur, bu yolda xalqın etimadına güvənərək Türkiyə bu seçkilərin qalibi “Cumhur İttifaqı” ilə həm ölkəmiz, həm də türk dünyası üçün çox gözəl layihələrə imza atacaq. 

Prezident seçkiləri ikinci tura qalsa da, qalibin kim olacağı indidən məlum­dur. Başqa bir tərəfdən müdafiə səna­yesindən iqtisadiyyata, iqtisadiyyatdan səhiyyəyə, kommunikasiya və infrast­ruktura qədər inkişaf edən Türkiyənin etibarı qüvvəsindədir. Regionda söz sahibi lider olan Türkiyəmiz beynəlxalq anlamda da önəmli bir rol oynayaraq daha böyük layihələrə imza atacaq. Bu seçkilərin qazananı uca Türk milləti oldu.

Hazırladı:

M.SULTANOVA

Ankara