İsrailin "i24NEWS" nəşri “Fransa Qafqazdakı döyüşə qoşulur – İsrailin müttəfiqi Azərbaycan üçün təhlükə” başlıqlı analitik yazı dərc edib. Məqalədə deyilir ki, Fransa Ermənistanı öldürücü silahlarla təchiz etmək qərarına gəlib. Nəşr bu məlumatı Ukrayna Müdafiə Nazirliyinin Baş Kəşfiyyat İdarəsindəki (GUR) mənbələrdən aldığını gizlətmir.

Mənbəyin dediyinə görə, yaxın vaxtlarda Paris Ermənistana 50 zirehli transportyor göndərəcək və gələcəkdə “Minstrel” hava hücumundan müdafiə raketlərinin tədarükü də nəzərdən keçi­rilir. "i24NEWS" nəşri qeyd edir ki, Paris Ermənistana silah ixracı üçün nizamlı sistem qurmağa hazırlaşır. Fransa–Er­mənistan dostluq qrupunun rəhbəri Gil­bert-Luc Devinaz hətta qarşıdakı silah tədarükü barədə açıqlama verib: “Biz Ermənistana şərait yaratmalıyıq ki, sər­hədlərinin təhlükəsizliyini təmin etsin. Buna görə onun silahlanmasına yardım göstərməliyik”. 

Məlum olub ki, Ukrayna kəşfiyyatının Parisdən İrəvana hərbi tranzit yüklərini izləməkdə məqsədi bu silahların daha sonra Rusiyaya ötürüləcəyi versiyasını izləməkdir. Bu versiyanı ağlabatan edən amil son illər İrəvanla Moskva arasında hərbi-texniki əməkdaşlığın genişlənməsi, eləcə də Rusiyanın iki hərbi bazasının Hayastan ərazisində yerləşməsidir. 

Fransadan Ermənistana silah tədarü­künə start verilməsi Parisin az qala İsra­illə kəllə-kəlləyə gəlməsinə səbəb olub. Bunu vurğulayan "i24NEWS" nəşri yazır ki, Tel-Əvivin rəsmi siyasətinə görə, yə­hudi dövləti özünü Azərbaycanın strateji tərəfdaşı hesab edir və onun müdafiə qüvvələrini müasir tələblərə uyğun şəkil­də silahla təmin edən əsas dövlətlərdən biridir. 

NATO-nun Avropada ən güclü ordu­suna malik Fransanın strateji əhəmiyyətli silahlarını Ermənistana verəcəyinə inan­maq çətindir. Əgər bu ehtimal öz təsdiqini taparsa, onda Fransanın Cənubi Qafqaz­da yeni müharibəni körüklədiyi qənaətinə gəlmək mümkündür. Hətta nəinki körük­lədiyini, Ermənistanın tərəfində birbaşa savaşa hazırlaşdığını iddia etmək olar. Amma hadisələrin bu müstəvidə inki­şafına yol verməyəcək Rusiya amilini unutmaq olmaz. Moskva heç bir halda Fransanın Ermənistanda, yəni Cənubi Qafqazda bu tip silahları yerləşdirməsi ilə razılaşmayacaq. 

Onu da qeyd edək ki, bir müddət əvvəl Fransanın məxfi xidmət orqanının ideoloji tribunası sayılan "Intelligence Online” nəşrinin yaydığı məlumatda de­yilirdi ki, İrəvana təyin edilmiş yeni hər­bi attaşe Fransanın ölümcül silahlarının Ermənistana tədarükünə nəzarət edə­cək. Guya Parisin Ermənistana öldürü­cü silahların verilməsi ilə bağlı qərarına əsas dəstək şəxsən prezident Emmanuel Makrondan gəlib. 

Bəli, Paris İrəvana diplomatik dəstək verir, hər zaman onun tərəfini tutur, vax­taşırı maliyyə yardımı da göstərir. Amma düşünürük ki, onun Ermənistana ölümcül silahlar verəcəyi barədə Fransa mət­buatında gedən informasiyaları təbliğat xarakterli, diplomatik savaşın tərkib his­səsi adlandırmaq daha məntiqə uyğun olardı. Sınaqdan çıxmış belə üsulla Pa­risin bəlkə də Bakını sülh danışıqlarında müəyyən şərtlə razılaşmağa, İrəvana güzəştə getməyə, yaxud hansısa konkret addım atmaqdan çəkindirməyə ça­lışdığını fərz etmək olar. Görünən odur ki, hələ tam çözülməmiş münaqişədə Fransa özünü tərəf kimi aparmağa baş­layıb. Öldürücü silahlarla bağlı yazılan­lar və deyilənlər öz təsdiqini taparsa, bu halda beynəlxalq təşkilatların məsələyə münasibət bildirməli olacaqları şəksizdir. Axı, Fransanın Ermənsitanla humanitar sahədən savayı müttəfiqliyi yoxdur. Onlar bir-birinə yalnız etnik-mənəvi cəhətdən bağlıdırlar. Fransız-erməni qan qardaşlı­ğı barədə isə Fransanın xarici işlər naziri Ketrin Kolonna bölgəyə rəsmi səfəri za­manı İrəvan təmaslarında söyləmişdi. 

İ.HƏSƏNQALA, “Xalq qəzeti”