Rusiya Dövlət Dumasının MDB məsələləri üzrə komitəsi sədrinin birinci müavini, ermənipərəstli­yi ilə seçilən Konstantin Zatulin özünün anti-Azərbaycan baxışları­na ümummilli lider Heydər Əliyev haqqında xoşagəlməz fikirlər də əlavə edib. Bunu təsadüf saymaq olmaz. Çünki Azərbaycan ictima­iyyəti ulu öndərin 100 illik yubile­yinin Rusiyada çox böyük təntənə ilə qeyd edildiyini gördü. 

Bəli, Rusiyanın, demək olar, bütün telekanalları Heydər Əliyev şəxsiy­yətinin keçmiş SSRİ dövründə Azər­baycana rəhbərliyi, Sovetlər Birliyinin ali idarəçiliyində təmsilçiliyi, müstəqil ölkəmizdə dövlətçiliyin qorunması, Vətənimizin sürətli inkişaf yoluna çıxa­rılması ilə bağlı çoxsaylı sujetlər və reportajlar yayımladılar. Həmin təq­dimatlarda, eyni zamanda, ulu öndər dünyamiqyaslı siyasi xadim, nəhəng dövlət adamı kimi vurğulandı. Görünür, bütün bunlar ölkə daxilində kimlərinsə, o cümlədən, ermənilərin və ermə­nipərəst dairələrin xoşuna gəlməyib. 

K.Zatulin kimi “yuyulmamış çöm­çə”lər buna görə ortaya atılır, özlərinin çirkin baxışlarını işə salırlar. Zatulin özü o qədər xəyanətkardır ki, elə bilir, hər kəs belə ola bilər. Onun Heydər Əliyev şəxsiyyəti ilə bağlı əks fikir bildirməsi isə Rusiya dövlətinə xəyanətin ən bö­yüyüdür. Çünki ulu öndərə həqiqi rəğ­bət bəsləyən ölkə ictimaiyyətinin böyük mütərəqqi kəsimi var. Bu kəsimi təşkil edən şəxslər Rusiyanın ictimai fikrinin formalaşmasında, müasir dövlətçilik ənənələrinin inkişafında xidmətləri ilə seçiliblər. Zatulin kimi “bazarkom” ol­mayıblar. 

Zatulin Ermənistanın “news.am”ına açıqlamasında bildirir ki, Heydər Əliyev müsahibələrinin birində keçmiş SS­Rİ-nin müttəfiq respublikası olan Azər­baycanda müstəqil dövlətçilik üçün əsaslar yaratdığını qeyd edib. Əlbəttə, ulu öndər bunu bildirib və həmin faktı biz də tez-tez vurğulayırıq. Onu da vur­ğulayırıq ki, Heydər Əliyev şəxsiyyəti özünün uzaqgörənliyi ilə SSRİ daxilin­də hansı oyunların getdiyini hər kəs­dən çox gözəl dərk edirdi. Görürdü ki, Zatulin kimi şərəfsizlərin sələfləri olan şəxslər dövləti necə içəridən yeyirdilər. 

Dahi Heydər Əliyev onu da görür­dü ki, saxta beynəlmiləlçilik adı altında millətlər arasında fərqlər qoyulur. O dövrün murdar zatulinəbənzərlərinin Azərbaycan xalqının maraqlarını er­mənilərə qurban verməyə hazır olduq­larını hiss edirdi. Dəfələrlə belə alçaq təmayüllərin qarşısını şəxsən, böyük inadkarlıq və prinsipiallıqla almışdı da. Belə olan təqdirdə ulu öndərin öz xalqı­nın mənafeyini düşünməsi və tədbirlər görməsi, gələcək müstəqillik naminə əsaslar hazırlaması, nəinki təbii, eyni zamanda, günün təxirəsalınmaz tələbi idi. 

Bəli, Heydər Əliyev duyurdu ki, o zamanın zatulinsifətləri dildə birlik, bə­rabərlik, sosializm, kommunizm kimi saxta şüurlar səsləndirib əməldə döv­ləti sarsıdırlar, onun iqtisadi əsaslarını dağıdırlar. Nəhayət, bu dağılma Mixail Qorbaçov hakimiyyətə gəlməklə, belə demək mümkünsə, ali səviyyəsinə qə­dəm qoydu. Qorbaçov yenidənqurma adı altında ölkənin məhvi üçün hər cür addımlar atdı. 

K.Zatulin də o zamanın yeni tip­li dələduzlarından biri kimi meydana atılmışdı. Yəni, ölkəni içəridən yeyən­lərdən idi. Özü də bu sahədə kifayət qədər uğurlu sayılırdı. 1989-cu ildə SSRİ-də Gənc Rəhbər və Sahibkarlar Müəssisələri Assosiasiyasını yaratmış­dı. Belə bir qurumun formalaşması kol­lektivçi ənənələrə malik sistemin ma­hiyyətinə zidd idi. Təbii ki, Zatulin bunu xəyanət kimi qiymətləndirə bilməzdi, çünki həmin dövrdə özünə bənzər xə­yanətkarlar ölkənin hər yerinə səpələn­mişdilər. Onlar SSRİ-nin zəifləməsini fürsət bilib hərəkətə keçmişdilər və ye­kunda dövləti dağıtdılar. 

Bu mənada gənc Zatulinin də əməyi var. O, 1990-cı ildə Moskva Ticarət Bir­jasını yaratmışdı. Yəni, özünün həm­yaşıdlarından daha “irəli” getməsi ilə fərqlənmişdi. Elə həmin vaxtdan çirkli pul qazanmaq səriştəsinə yiyələnmiş­di. Moskvanın sabiq meri Yuri Lujko­vun əlinin altında işləyəndə də özünü, kifayət qədər bacarıqlı dələduz kimi göstərdiyinə görə irəli çəkilmişdi. 

Əlbəttə, məqsədimiz K.Zatulinin karyera yüksəlişi ilə bağlı söz açmaq deyil. Vurğulamaq istədiyimiz məqam odur ki, o, gənc vaxtlarında pul qazan­maq hərisliyini vəzifədə olduğu müd­dətdə daha da inkişaf etdirdi. Bu dəfə Rusiyadakı erməni lobbi və diaspor təşkilatlarından pul qoparmaq naminə onların avantüraları üçün çalışmağa başladı. 

Əlbəttə, biz bir xalq olaraq saxta dövlətin – SSRİ imperiyasının süqu­tunu istəyirdik. Çünki bu imperiya bol­şevik Rusiyasının qəsbkarlığı üzərində qurulmuş, onun əli Azərbaycanın neçə-neçə layiqli övladının qanına batmışdı. Tarixi unutdurmağa çalışsalar da, unut­murduq. Bəs, o zamanın zatulinsifətləri nə üçün özlərinin qurduqları dövləti da­ğıtmağa girişmişdilər? Ona görə ki, sis­temin saxtalıqlarından istifadə edərək, oğurladıqları pulları rahat xərcləyə bil­mirdilər. Çəkinirdilər, qorxurdular ki, ri­yakarlıqları üzə çıxar. Məhz buna görə dövləti məhv etdilər. SSRİ-nin süqutu­nun qlobal siyasi səbəbləri olduğu kimi, qeyd etdiyimiz daxili psixoloji motivləri də vardı. Bunu müasir Rusiyada gözəl anlayırlar. 

Yeri gəlmişkən, Rusiyada onu da anlayırlar ki, o dövrdə SSRİ-ni saxlaya biləcək potensial yalnız Heydər Əliyev şəxsiyyətində olub. Bunu açıqdan-açı­ğa bildirirlər də. Nəzərə alaq ki, məhz bu nəhəng potensialına görə Heydər Əliyevi Sov. İKP MK Siyasi Bürosunun üzvü və Nazirlər Soveti Sədrinin birinci müavini vəzifələrindən uzaqlaşdırdılar. Bunu o zamanın zatulinsifətləri ermə­nilərin təhriki ilə etdilər. Nəzərə alaq ki, SSRİ mövcud olduğu dövrdə ona daxildən ən böyük zərbəni məhz ermə­ni millətçiləri və avantüristləri vurmuş­dular. Qarabağ, azərbaycanlılara qar­şı ədavət müstəvisində fitnə-fəsadlar törətmişdilər. 

Bəli, bu gün zatulinlərin və onun kimilərinin xiffətini çəkdiləri, ideyalarını yaşatmaq istədikləri SSRİ-nin parça­lanmasında, böyük rus dövlətçiliyinin mirası kimi qəbul edilən dövlətin məh­vində ermənilərin “rolu” danılmazdır. Ancaq Zatulinin və zatulinbaşlıların gözlərini pul o qədər qamaşdırıb ki, bu reallığı görə bilmirlər, yenə ermə­nipərəstlik edərək, Rusiyaya xəyanət yolu tuturlar. Onlar bu gün erməni millətçiliyinin Rusiyaya qarşı hansı mövqedə dayandığının fərqində olma­yacaq qədər miskindirlər. 

Ə.RÜSTƏMOV, “Xalq qəzeti”