Ermənistanın baş prokuroru Anna Vardapetyan əsir götürülmüş Azərbaycan hərbçiləri – 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu haqqında açıqlama verib. O, açıqlamasında əsirlərin ekstradisiyasının nəzərdə tutulmadığını bildirib. Azərbaycanlı əsirlərin gələcəkdə də ekstradisiya oluna biləcəyi ilə bağlı suala da konkret cavab verməyib və qeyd edib ki, bu onun səlahiyyətinə aid deyil. Göründüyü kimi, Ermənistan bu dəfə baş prokurorun dili ilə əsirlərimizi geri qaytarmaq niyyətində olmadığını bildirib.
Şübhəsiz, Ermənistanın əsirlərimizlə bağlı ortaya qoyduğu belə mövqe, hər şeydən öncə, rəsmi İrəvanın sülhə hazır olmadığını göstərir. Bu fakt bir daha onu göstərir ki, Ermənistan ölkəmizə qarşı təxribatlarına son qoymaqda, bölgədə sülhün və təhlükəsizliyin bərqərar olmasında maraqlı deyil. Ona görə əlinə düşən hər fürsətdən istifadə edərək ölkəmizin maraqlarına zərbə vurmağa, sülh və təhlükəsizlik üçün əngəllər yaratmağa çalışır.
Növbəti absurd: əsir hərbçimiz “qatil” obrazında
İrəvanın dumanlı havada yolu azaraq, Ermənistan ərazisinə keçən hərbçilərimizə münasibətinin qərəzli olmasını isbat edən çoxsaylı faktlardan biri də, Paşinyan rejiminin əsir hərbçimizdən qatil düzəltmək istəyi ilə bağlıdır. Belə ki, Ermənistanın baş prokurorluğu əsir hərbçimiz Hüseyn Axundova qondarma cinayət işi açaraq, onu “Zəngəzur mis-molibden kombinatının gözətçisini qətlə yetirməkdə” ittiham edib. Bu fakt bir daha onu göstərir ki, İrəvan beynəlxalq qanun və konvensiyaları pozaraq, əsirlərimizi Azərbaycana təhvil vermək istəmir. Elə bu səbəbdən də qanunsuz davranışına hüquqi don geyindirmək üçün əsas yaratmağa çalışan İrəvan, hərbçimizi erməni gözətçisini öldürməkdə təqsirləndirir. Ermənistan əsir hərbçimizdən qatil düzəltməklə, göstərmək istəyir ki, guya, onun Azərbaycana qaytarılmamasına səbəb törətdiyi konkret cinayət hadisəsidir. Halbuki, Ermənistanın bu ittihamının, tamamilə, əsassız olduğu, heç bir fakta söykənmədiyi və siyasi amillərdən irəli gəldiyi göz önündədir.
Ermənistanın Cenevrə Konvensiyasına tutduğu “divan”
Ermənistanın azərbaycanlı əsirlərə münasibətdə yol verdiyi qərəz və vəhşilik rəsmi İrəvanın əsirlərlə bağlı bütün beynəlxalq konvensiyaları, o cümlədən, 1949-cu ilin Cenevrə Konvensiyasını kobud şəkildə pozduğunu göstərir. İrəvanın Cenevrə Konvensiyasını necə, hansı maddə və bəndlər üzrə pozduğunu daha yaxşı anlamaq üçün sadəcə aşağıdakı faktlara nəzər salmaq yetərlidir:
Cenevrə Konvensiyasının 3-cü maddəsinin c bəndində qeyd olunur ki, əsirlə münasibətdə təhqiredici, insan ləyaqətini alçaldan rəftara yol vermək olmaz. Halbuki, azərbaycanlı əsirlərin əsir düşməsi ilə bağlı erməni tərəfinin yaydığı foto-video materialda onların işgəncə və şiddətə məruz qaldığı açıq şəkildə özünü göstərir. Fotolardan da görünür ki, əsirlərimiz elə ilk andan ağır işgəncə və fiziki zorakılığa məruz qalıblar.
Cenevrə Konvensiyasının 12-ci maddəsində qeyd olunur ki, əsirə “cinsinə, irqinə, milli mənsubiyyətinə və ya vətəndaşlığına, dini etiqadına, siyasi əqidəsinə və ya digər oxşar meyarlara görə heç bir ayrı-seçkilik qoymadan onlara humanist rəftar və qayğı göstərilməlidir”. Azərbaycanlı əsirlərin məhz milli mənsubiyyətinə görə işgəncəyə məruz qaldığı mediadakı və sosial mediadakı fotofaktlardan açıq-aydın görünür.
Cenevrə Konvensiyasının 50-ci maddəsində qeyd olunur ki, əsirlərə işgəncə verilməsi və onların qeyri-insani rəftara məruz qalmaları ciddi pozuntudur. Konvensiyanın bu maddəsi göstərir ki, ermənilər əsir hərbçilərimizə münasibətdə beynəlxalq öhdəliyi kobud şəkildə pozublar.
Qeyd edək ki, Ermənistanın əsir hərbçilərimizə münasibətdə yol verdiyi vəhşilik, sadəcə, Cenevrə Konvensiyası ilə deyil, digər beynəlxalq konvensiyalarla da açıq-aşkar ziddiyyət təşkil edir. Bu isə o deməkdir ki, Ermənistan qoşulduğu beynəlxalq konvensiyaların tələblərinə əməl etmir.
Xatırladaq ki, Ermənistan bundan öncə də həmin sənədlərin tələblərini dəfələrlə kobud şəkildə pozub. Görünən odur ki, beynəlxalq təşkilatlar, dünya birliyi ölkəni cəzalandırmayana qədər, bu mənfur əməlindən əl çəkməyəcək.
Seymur ƏLİYEV