Ekofəallar açılan hər səhəri əlləri sinələrinin üstündə Azərbaycanın Dövlət Himnini səsləndirməklə qarşılayırlar.
Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına qarşı Laçın–Xankəndi yolunda keçirilən etiraz aksiyası 138 gündür davam edir. Bu müddət ərzində ekofəallarımızın başı üzərində çox qovğalar “oynanıldı”, məqsəd və məramlarına başqa don geyindirilməyə çalışıldı. Amma onların qətiyyəti bütün çətinliklərə üstün gəldi, iradələri hər cür təxribatın qarşısını aldı. Tələbləri isə ilk günlərdə olduğu kimi, yenə də dəyişməz qalır. Şuşa rayonunun ərazisində Rusiya sülhməramlılarının nəzarətində olan yolun bir hissəsində bu gün də davam edən dinc aksiya azərbaycanlı ekofəalların, bu sahədə fəaliyyət göstərən qeyri-hökumət təşkilatları (QHT) nümayəndələrinin Azərbaycanın Qarabağ iqtisadi rayonunda faydalı qazıntı yataqlarının qanunsuz istismarına, ekoloji terrora son qoyulmasına, təbii sərvətlərimizin haylar tərəfindən talan edilməsinə etirazıdır.
Məsələnin maraqlı tərəfi isə odur ki, bu etiraza nə zonaya müvəqqəti nəzarət edən Rusiya sülhməramlıları ağlabatan cavab verirlər, nə də ismarıclarını ünvanladıqları müvafiq beynəlxalq təsisatlardan reaksiya gəlir. Ekofəallar yolun hər iki tərəfində, hərəkətə maneə törətmədən üzərində Azərbaycan, rus və ingilis dillərində yazılmış plakatlar qaldırıb, şüarlar səsləndirirlər.
* * *
Ekofəallar aksiyaya start verildiyi ilk gündən etibarən dünya ictimaiyyətinin diqqətini hayların Qarabağımızda törətdikləri ekoloji terrora cəlb etməyə çalışır, onu bu cinayətə susqun qalmamağa çağırırlar. Gənc könüllülər Azərbaycan, rus və ingilis dillərində şüarlar yazılmış plakatlarda öz tələblərini aydın şəkildə ifadə edirlər: “Azərbaycan oyaqdır, sərvətinə dayaqdır!”, “Azərbaycan vahiddir, sərvətinə sahibdir!”, “Ekoloji cinayətə son!”, “Stop ekoterror!”, “Берегите природу!”, “Экоциду нет! Мониторингу да!”. Əldə etdiyimiz məlumata əsasən, dünən Laçın–Xankəndi yolunda etiraz aksiyasının keçirildiyi əraziyə ölkəmizdə səfərdə olan qardaş Türkiyənin bir qrup media orqanının əməkdaşları baş çəkiblər. Onlara dinc aksiyanın keçirilməsinin əsas səbəbləri barədə ətraflı məlumat verilib, beynəlxalq təşkilatlara ünvanlanan müraciətlərin mətnləri təqdim edilib. Türkiyəli media nümayəndələri aksiya iştirakçılarının, eləcə də ərazinin audio-vizual çəkilişini həyata keçiriblər.
Əslində, bu etiraz aksiyasını ermənilərin 1988-ci ildə Topxana meşəsində həyata keçirdikləri “yaşıl soyqırımı”na soydaşlarımızın etirazının davamı kimi də yanaşmaq mümkündür. O vaxtdan əsrlər, minilliklər bir-birini əvəzləsə də, hayların yırtıcı xislətinə müsbət heç bir çalar əlavə olunmadı. Öz tamahkarlıqları, yersiz iddiaları ucbatından sonda məğlub duruma düşən nasist–daşnak törəmələri hələ də məğlubiyyətlərini etiraf və qəbul etməyə tələsmirlər. Azərbaycan isə iki il beş ay əvvəl bölgədə reallığı dəyişdi və artıq bizim erməninin XXI əsrə yaraşmayan naqis xislətini tərbiyə, yaxud özlərini islah etməyə nə vaxtımız, nə də səbrimiz var.
ARAYIŞ: 2022-ci il dekabrın 3-də və 7-də Rusiya sülhməramlı kontingentinin (SK) komandanlığı ilə aparılmış müzakirələrin nəticəsi olaraq İqtisadiyyat, Ekologiya və Təbii Sərvətlər nazirlikləri, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya SK-nın müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Fəqət SK-nın hərəkətsizliyi ucbatından monitorinq baş tutmayıb. Bu səbəbdən, 2022-ci il dekabrın 12-dən etiraz aksiyası başlayıb və bu günədək davam edir.
Yeganə HACIYEVA,
politoloq
Ermənilərin Cənubi Qafqazda yerli xalq, o cümlədən, Qarabağda heç vaxt aborigen olmadığını özləri də yaxşı bilirlər. Ekoloji aksiyalar dünyanın siyasi xəritəsini dəyişməyi hədəfləyən ötən əsrin 80-ci illərinin sonunda başlayan proseslərin digər bir formasıdır. Düzünü desək, bu aksiya 35 il bundan əvvəl Topxana meşəsində ağacların qırılmasına Azərbaycan xalqının kütləvi etirazı, həm də sivil, mədəni üsullarla hərbi məqsədlərə çatmağın forması idi. Bəli, bu, siyasi deyil, indiki mərhələdə məhz hərbi məqsədlərə nail olmağın sivil müqavimət üsuludur. Bu gün dünyanın çox geniş coğrafiyasında ekoloji etirazlar dalğası ilə siyasi proseslərə təsir göstərmək nümunələri mövcuddur. Beynəlxalq təcrübədə istifadə olunan bu diplomatik təsir metodunun təməlini, dediyimiz kimi, ötən yüzilliyin səksəninci illərində Azərbaycan xalqı qoyub.
Ətraf mühit, ekoloji problemlərin aktuallaşdığı indiki çağda, nədənsə dünyanı yanımızda görmürük. BMT-nin qəbul etdiyi bir sıra konvensiyalara görə, təbii resurslardan qeyri-qanuni istifadə iqtisadi cinayət sayılır. Bu əməl hazırda beynəlxalq məhkəmələrdə ən çox cəzalandırılan cinayətlərin sırasındadır. Yəni, bu tip əməllərə iqlim dəyişiklikliyinə aparıb çıxara biləcək ekoloji terror tərkibli beynəlxalq cinayət kimi baxılır. Amma təəssüf ki, bizim ekofəalların ermənilərin faktiki eko-terroruna son qoyulması ilə bağlı tələblərinə nə dünyanın aidiyyatı institutlarının, ciddi qurumlarının, nə də beynəlxalq müşahidəçilərin reaksiyasını görmürük.
İmran BƏDİRXANLI, “Xalq qəzeti”