Ermənistanın baş naziri Nikol Paşinyan dünən hökumətin iclasında çıxışı zamanı ölkəmizin Azərbaycan–Ermənistan sərhədində nəzarət-buraxılış məntəqəsi yaratması ilə bağlı reallıqdan uzaq, cəfəng iddialar səsləndirib.
Paşinyanın iddiaları ilə bağlı Azərbaycan XİN-in şərhində qeyd edilir ki, ölkəmizin suveren ərazisində sərhəd nəzarət-buraxılış məntəqəsi təsis etməsinə Ermənistan tərəfinin hər hansı müdaxiləsi Azərbaycanın suverenliyinə və ərazi bütövlüyünə qarşı iddiası deməkdir və bu, onun Praqa və Soçidə öz üzərinə götürdüyü öhdəliklərə, eləcə də beynəlxalq hüququn bütün norma və prinsiplərinə ziddir.
Azərbaycan XİN-in şərhində İrəvanın bu kimi bəyanatlarının bölgədə sülh və əmin-amanlığa töhfə verməməklə yanaşı, qəsdən gərginliyin artırılması məqsədi daşıdığı vurğulanır. “44 günlük Vətən müharibəsindən sonra üçtərəfli bəyanatın müddəalarına zidd olaraq, Ermənistan tərəfinin vəziyyətin gərginləşməsinə xidmət edən addımları kimi, Azərbaycana qarşı hərbi təxribatlara son qoyulmamasını, Laçın yolundan qeyri-qanuni fəaliyyətlər, silah-sursat və minaların daşınması üçün istifadə edilməsini, erməni silahlı qüvvələrinin Azərbaycan ərazisindən tam olaraq çıxarılmamasını Ermənistan baş nazirinə xatırlatmaq kifayətdir. Bu xüsusda, qeyd edilən təxribatların qarşısını alacaq bu məntəqənin təsis edilməsinin sülh prosesinə mənfi təsir etdiyi barədə fikirlər tamamilə qəbuledilməzdir”, – deyilən şərhdə sərhəddən giriş-çıxış rejimini tənzimləyəcək bu məntəqənin təsis edilməsinin yolun bağlanması kimi qiymətləndirilməsinin tamamilə yanlış olduğu nəzərə çatdırılır. XİN-in şərhində o da qeyd olunur ki, Azərbaycan hər zaman olduğu kimi, öz öhdəlikləri çərçivəsində Laçın – Xankəndi yolunda hərəkət edən vətəndaşların, nəqliyyat vasitələri və yüklərin təhlükəsizliyinə zəmanət verir və bu istiqamətdə müvafiq tədbirləri davam etdirəcək. Nikol Paşinyanın erməni sakinlərlə dialoq, “təhlükəsizlik zəmanəti” “mübahisələrin həlli mexanizmi”, “beynəlxalq faktaraşdırıcı missiya göndərilməsi” kimi məsələlər üzrə dəfələrlə təkrarlanmış arzu və iddiaları ilə əlaqədar şərhdə deyilir ki, Azərbaycan tərəfi erməni sakinlərlə dialoqu ölkə qanunvericiliyi çərçivəsində həyata keçirəcək və üçüncü tərəfin bu məsələyə müdaxiləsi qəbuledilməzdir. Baş nazir Nikol Paşinyanın hökumətin iclasında çıxışına Azərbaycan XİN-in şərhi İrəvandan haqlı tələblə bitir: “Ermənistan tərəfini əsassız bəyanatlar vermək əvəzinə, ötən ilin dekabr ayından bəri imtina etdikləri sülh sazişi üzrə danışıqlara məsuliyyətlə və konstruktiv yanaşmağı, kommunikasiyaların açılması, qüvvələrini Azərbaycan ərazilərindən tam çıxarılması daxil olmaqla, üçtərəfli bəyanatdan irəli gələn öhdəliklərə riayət etməyi, Azərbaycanın ərazi bütövlüyü və suverenliyinə qarşı addımlardan çəkinməyi tələb edirik".
“Xalq qəzeti”
