Uzun illər idi ki, hər orucluqda evimizdə cavabını bilmədiyim sual eşidirdim: Görəsən, əsgərlərimiz arasında oruc tutan varmı? Varsa, onlar növbədə olanda orucu necə açırlar? Sonra öyrəndim ki, hərbçilərimiz arasında oruc tutanlar var və onların ibadəti üçün hər cür şərait yaradılıb.
Builki Ramazan günlərində isə bir yas mərasimində iştirak edən köhnə dostumuzdan maraqlı fikirlər eşitdim: “Əmim oğlu ekofəalların etiraz aksiyasında iştirak etdiyi günlərdə də orucunu davam etdirdi”. Yerdən səs gəldi ki, orada iştirak edən cavanlar bizim fəxrimizdirlər.
Həmin məqamda mən dövlət başçımızın bu il yanvarın 10-da yerli televiziya kanallarına müsahibəsində səsləndirdiyi fikirləri xatırladım: “Laçın –Xankəndi yolunda etiraz aksiyası keçirən gənclər bizim fəxrimizdir. Gecə-gündüz şaxtalı-qarlı havada oradadırlar, öz haqlarını tələb edirlər və bir daha Azərbaycan gəncinin nə qədər yüksək keyfiyyətlərə malik olmasını bütün dünyaya göstərirlər. Bunun, necə deyərlər, bir addımlığında separatçılar dünyaya tamamilə yalan informasiya ötürməklə məşğuldurlar”.
Xatırladaq ki, artıq dörd aydan çoxdur ki, davam edən bu tədbiri bütün dünya Azərbaycan təbiətinə ekoloji ziyan vuran xarici şirkətlərin və Ermənistan iş adamlarının fəaliyyətinə etiraz edən könüllülərin aksiyası kimi qəbul edir. Ermənistan və onun havadarları isə vay-şivən qoparırlar ki, Xankəndi guya blokadaya alınıb. Ancaq heç bir dəlil-sübutları yoxdur. Bu dörd ayın hər günündə həmin yoldan həm rus sülhməramlılarının, həm Beynəlxalq Qızıl Xaç Komitəsinin avtomobilləri, həm də humanitar məqsədli nəqliyyat vasitələri tam sərbəst şəkildə istifadə edirlərsə, hansı dəlil-sübutları ola bilər? Artıq beynəlxalq aləmdə hamı görür ki, ermənilərin iki əsrdən bəri davam edən çoxsaylı yalanlar seriyasına absurd “blokada” riyakarlığı da əlavə edilib.
Dövlət başçımız hələ yanvarda demişdi ki, orada blokadadan söhbət gedə bilməz. Çünki qısa müddətdə həmin yoldan sülhməramlıların dörd yüzə yaxın yük avtomobili keçmişdir. Fikir verin, aksiyalar dekabrın 12-də başlanmışdı. Cənab Prezident isə oradan 400 avtomobilin keçdiyini yanvarın 10-da – yəni aksiyanın başlanmasından heç bir ay ötməmiş deyirdi. Bir ayda dörd yüz maşın keçibsə, bunun harası blokada oldu?
Azərbaycan tərəfi aksiya keçirilən əraziyə dəfələrlə xarici siyasətçiləri, diplomatları, mətbuat təmsilçilərini aparıb. Hamı görür və etiraf edir ki, yol humanitar məqsədli nəqliyyat vasitələri üçün tam açıqdır. Ermənistan və ermənipərəst dairələr isə hələ də feyk məlumatlar yayırlar ki, guya, Azərbaycan aksiya keçirilən yerdə yolu tam bağlayıb. Dövlət başçımız “blokada” adıyla dünya ictimaiyyətini aldatmağa çalışanları fakt qarşısında qoyur: “Əlbəttə ki, oradan keçən, hətta bu aksiyaya qədər keçən bütün nəqliyyat vasitələri nəzarət altında idi. Biz haradan öyrəndik ki, İran maşınları oraya yanacaq aparır? Biz orada gördük. Halbuki, İran tərəfi bunu əvvəllər inkar etməyə çalışırdı. Hətta İran maşınları üzərinə saxta erməni nömrələrini yapışdırmaqla bizi belə primitiv səviyyədə aldatmaq istəyirdilər”.
Xatırladaq ki, ekofəalların aksiyasının hələ ilk ayındaca İspaniyanın “EFE” xəbər agentliyi, “swissinfo.ch” portalının ispandilli versiyası, həmçinin Argentinanın “infobae” saytında Laçın-Xankəndi yolunun Şuşa ərazisindən keçən hissəsində ekofəalların etiraz aksiyası barədə materiallar dərc olunmuşdu. Orada göstərilirdi ki, Rusiya sülhməramlıları həmin yolda sərbəst hərəkət edirlər. Bütün bunlara baxmayaraq, İrəvan rəhbərliyi Beynəlxalq Ədalət Məhkəməsinə şikayət etmişdi ki, Azərbaycan tərəfi Xankəndini blokadaya alıb. Guya, bu aksiya saxtadır və iştirakçılar Azərbaycan hökuməti tərəfindən öyrədilmiş şəxslərdir. Ermənistan bu yalanlarla məhkəməyə müraciət edərək, aksiyanın süni şəkildə təşkil olunmasının təsdiqini tapmaq istəyirdi.
Son zamanlar bütün cəhdləri boşa çıxan Ermənistan həmin məhkəmədən də bəhrələnə bilmədi. Beynəlxalq Ədalət Məhkəməsinin 22 fevral 2023-cü il tarixli qərarında məhkəmə Ermənistanın vəsatətini də, aksiyanın Azərbaycan hökuməti tərəfindən təşkil olunması ilə bağlı fərziyyəni ləğv etmişdir. Daha nə istəyirsiniz?
Buna baxmayaraq, Ermənistan siyasətçiləri “blokada” nağılından əl çəkmək istəmədikləri kimi, işğalçı ölkənin mətbuat təmsilçiləri də “əsaslandırılmamış” ifadəsindən çox möhkəm yapışıblar. Elə bir gün olmur ki, erməni mətbuatında “Azərbaycanın Artsaxa əsaslandırılmamış iddiaları”, “Xankəndi –Laçın yolunda əsaslandırılmamış aksiya”, “Əliyevin beynəlxalq tribunalardan əsaslandırılmamış çıxışı”, Azərbaycan Müdafiə Nazirliyinin əsaslandırılmamış məlumatı”, “Ankaranın Bakıya əsaslandırılmamış köməyi” kimi cəfəng iddialar səsləndirilməsin.
Məlum məsələdir, gündən-günə itirə-itirə gedirlər. Ona görə də artıq başlarını da itirirlər. Yoxsa, bu qədər “əsaslandırma”ya nə ehtiyac vardı ki?
Sonda xatırladaq ki, AzTV-nin Şuşadakı xüsusi müxbiri hər axşam oradan verdiyi məlumatda deyir: “Təəssüf ki, bu gün də aksiya öz müsbət nəticəsini vermədi. Ancaq ekofəallarımızın mübarizəsi davam edir”.
Mən bu sətirlərin sonunda üzümü həmin müxbirə tuturam: Tələsmə, həmkar! Həmin müsbət nəticə uzaqda deyil! Doğru yolu isə oğru yoluna çevirməyə imkan verilməyəcək.
İ.QAÇAYEV, “Xalq qəzeti”