Azərbaycanla Latviyanın münasibətlərinin tarixi keçmişi SSRİ dövründən başlayıb. Həmin dönəmdə iki respublika arasında iqtisadi və mədəni əlaqələr formalaşıb. Müstəqillik illərində isə münasibətlər yeni mərhələyə qədəm qoyub. Azərbaycanın və Latviyanın müstəqil subyektlər kimi iqtisadi-siyasi münasibətlərin dərinləşdirilməsinə, qarşılıqlı maraqların təmin olunmasına xidmət edən təşəbbüslərlə çıxış etməsi gələcək əməkdaşlıq üçün yeni imkanlar açıb.
Ötən müddətdə ölkələrimiz arasında əməkdaşlığa təkan verən münasib hüquqi baza yaradılıb. Bu baxımdan, Azərbaycan və Latviya hökumətləri arasında ticarət-iqtisadi əməkdaşlıq prinsipləri haqqında Saziş, habelə gəlirlərə və əmlaka görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında Konvensiyanı qeyd etmək olar.
Son illər Azərbaycanla Latviya arasında hökumətlərarası komissiyalar çərçivəsində də qarşılıqlı iqtisadi əlaqələrə təkan verən bir sıra mühüm layihələr həyata keçirilib. Eyni zamanda, ölkələrimiz regional təşkilatlar, o cümlədən, Baltik–Qara Dəniz–Xəzər hövzəsi regionunda inteqrasiya proseslərinin intensivləşdirilməsi üçün Baltik Dənizi Dövlətlərinin Şurası çərçivəsində uğurla əməkdaşlıq ediblər.
Eyni zamanda, Azərbaycan və Latviya arasında qarşılıqlı investisiya qoyuluşu sahəsində fəal əməkdaşlıq həyata keçirilib. Belə ki, 1995-2022-ci illərdə Latviya Azərbaycan iqtisadiyyatına 1 milyard dollar investisiya qoyub. Azərbaycan isə öz növbəsində Latviya iqtisadiyyatına 166 milyon dollar məbləğində investisiya yönəldib.
Latviya Respublikasının Prezidenti Egils Levitsin martın 8-də Azərbaycana işgüzar səfəri əlaqələrin intensivləşdirilməsi baxımından yeni mərhələnin başlanğıcı kimi dəyərləndirilə bilər. Rəsmi qarşılanma mərasimindən sonra dövlət başçıları arasında keçirilən məhdud tərkibdə görüş zamanı beynəlxalq təşkilatlar çərçivəsində əməkdaşlıq məsələləri, iqtisadi-ticari münasibətlərin genişləndirilməsi, hökumətlərarası komissiyanın fəaliyyəti, Azərbaycanın işğaldan azad edilmiş ərazilərində aparılan bərpa-quruculuq işlərində Latviya şirkətlərinin iştirakı, bərpaolunan enerji, turizm, İKT, süni intellekt və qarşılıqlı maraq doğuran digər məsələlər barədə fikir mübadiləsi aparılıb.
Martın 8-də Azərbaycan Respublikasının Prezidenti İlham Əliyev və Latviya Respublikasının Prezidenti Egils Levits mətbuata bəyanatlarla çıxışları zamanı iki ölkə arasında əlaqələrin bugünkü səviyyəsinə və gələcək inkişaf perspektivlərinə toxunublar. Ölkələrimiz arasında münasibətlərin çox uğurla inkişaf etdiyini vurğulayan Prezident İlham Əliyev deyib: “Latviya və Azərbaycan strateji tərəfdaşlardır. Strateji Tərəfdaşlıq haqqında Bəyannamə bir neçə il bundan əvvəl imzalanıb. Biz həqiqətən strateji tərəfdaş kimi addımlar atırıq. Çox fəal birgə iqtisadi komissiyamız var. O, dövri olaraq görüşlər keçirir. Yadımdadır, sonuncu dəfə belə görüş ötən il baş tutub... Bir sözlə, Latviya Avropa İttifaqı ilə Azərbaycan arasında sıx əməkdaşlıqda hər zaman çox mühüm və müsbət rol oynamışdır”.
Latviya Respublikasının Prezidenti Egils Levits isə 2022-ci ildə ölkələrimiz arasında iqtisadi münasibətlərdə müsbət tendensiyanın olduğunu diqqətə çatdıraraq deyib: “İkitərəfli səviyyədə əlaqələrlə bağlı demək istərdim ki, Avropa İttifaqının üzv dövləti kimi Latviya Avropa İttifaqı ilə Azərbaycan arasında sıx əməkdaşlıqda maraqlıdır... Biz, həmçinin bərpaolunan enerji sahəsində daha sıx əməkdaşlıq etmək arzusundayıq. Biz İKT, ağıllı enerji, yaşıl texnologiyalar və artıq qeyd etdiyiniz kimi, nəqliyyat və daşımalar sahəsində imkanların nəzərdən keçirilməsində maraqlıyıq”.
Latviya Prezidenti Egils Levits səfər çərçivəsində Bakıda Azərbaycanın və Latviyanın iş adamları ilə görüşüb. Bu tədbirin iki ölkə arasında əlaqələrin inkişafına töhfə verəcəyinə əmin olduğunu söyləyən Prezident Egils Levits bildirib ki, NATO və Avropa İttifaqının üzvü olan Latviya Azərbaycanı iqtisadi əlaqələrdə yaxın tərəfdaş kimi görür. Ölkələrimiz arasında yaxın qarşılıqlı əlaqələrin mövcud olduğunu vurğulayan Latviya Prezidenti iqtisadi sahədə əlaqələrin gələcəkdə daha da genişlənəcəyinə ümidvar olduğunu bildirib.
Azərbaycanın Latviyanın əsas ticarət tərəfdaşı olduğunu deyən Latviya Prezidenti diqqətə çatdırıb ki, pandemiyada sərhədlərin bağlanması nəticəsində pozulan tədarük zəncirlərini bərpa etməyin vaxtı yetişib. Onun sözlərinə görə, bu, iqtisadi-ticari əlaqələrin daha da inkişafı üçün əsas, iki ölkə arasında sıx əməkdaşlıq nümunəsi olacaq.
Yeri gəlmişkən, Azərbaycanla Latviya arasında qarşılıqlı ticarət dövriyyəsi üzrə göstəricilər əvvəlki illərdə o qədər də yüksək olmasa da, son zamanlar bu sahədə mühüm irəliləyiş müşahidə olunur. Təkcə onu qeyd etmək kifayətdir ki, 2022-ci ildə iki ölkə arasında ticarət dövriyyəsinin həcmi əvvəlki illə müqayisədə 70 faizdən çox artaraq 46 milyon dollara çatıb. Bu barədə Azərbaycan Respublikasının İxracın və İnvestisiyaların Təşviqi Agentliyinin (AZPROMO) icraçı direktoru Yusif Abdullayev məlumat verib. O bildirib ki, ötən il Latviyaya ixrac, demək olar ki, üç dəfə artaraq 28 milyon dollar təşkil edib. Latviyaya ixracın 98 faizi qeyri-neft sektorunun payına düşüb. Bu, o deməkdir ki, Latviya qeyri-neft məhsullarımızın idxalı baxımından Şimal-Şərqi Avropada mühüm ölkədir.
Hazırda Azərbaycanda 16-ya qədər Latviya şirkəti fəaliyyət göstərir. AZPROMO-nun rəhbəri Yusif Abdullayevin dediyinə görə, bu şirkətlərin əksəriyyəti nəqliyyat sahəsində çalışır. Bununla yanaşı, Prezident Egils Levitsin iş adamları ilə görüşü zamanı Latviya şirkətləri işğaldan azad olunmuş ərazilərə dəvət edilib. Y.Abdullayev qeyd edib ki, Latviya şirkətləri Qarabağ və Şərqi Zəngəzura də sərmayə yatıra bilərlər.
Latviyanın İnvestisiya və Biznesin İnkişafı Agentliyinin baş direktoru Kaspars Rozkalns qeyd edib ki, Latviya və Azərbaycan rəqabətədavamlı məhsulların birgə istehsalını yarada bilər və bu məhsulları Avropa bazarlarına çıxarmaq asan olar. Latviya şirkətlərinin gələcəkdə məhsulları Avropa bazarına çıxarmaq üçün Azərbaycanla birgə istehsal üzrə əməkdaşlıq etməkdə maraqlı olduğunu vurğulayan K. Rozkalns bununla bağlı 5 prioritet sahənin mövcudluğunu diqqətə çatdırıb.
Kiçik və Orta Biznesin İnkişafı Agentliyi İdarə Heyətinin (KOBİA) sədri Orxan Məmmədov isə Azərbaycanın və Latviyanın işgüzar dairələri ilə keçirilən görüşdə deyib ki, rəhbərlik etdiyi agentlik öz təcrübəsini Latviya ilə bölüşməyə hazırdır. Onun sözlərinə görə, ağıllı şəhər konsepsiyası Azərbaycanın işğaldan azad edilmiş ərazilərində həyata keçirilən uğurlu layihədir.
Martın 9-da Azərbaycan Respublikasının İxracın və İnvestisiyaların Təşviqi Agentliyi və Latviyanın İqtisadi İnkişaf Agentliyi arasında Anlaşma Memorandumu imzalanıb. Yeni sənədi ölkəsinin Azərbaycanla iqtisadi əlaqələrinin inkişaf etməsinin nümunəsi kimi dəyərləndirən Latviya Prezidenti qeyd edib ki, Anlaşma Memorandumu Latviya şirkətlərinin Azərbaycanda, Azərbaycan şirkətlərinin isə Latviyada daha geniş fəaliyyət göstərməsi üçün yeni imkanlar açacaq.
Göründüyü kimi, yaxın illərdə ölkə arasında ticarət-iqtisadi əlaqələrinin daha da genişləndirilməsi nəzərdə tutulur. Yeni Anlaşma Memorandumu isə bu baxımdan hüquqi baza rolu oynayacaq.
Mirbağır YAQUBZADƏ, “Xalq qəzeti”