Diaspor fəallarımız
Sənətindən, peşəsindən asılı olmayaraq, bu Vətən hamımızındır və hər kəs öz sahəsində Azərbaycan adının ucalığını qorumağa çalışır. Bu təəssübkeşliyimiz müzəffər Ali Baş Komandan, Prezidenti İlham Əliyevin rəhbərliyi ilə işğalçı düşmən üzərində tam və qəti qələbəmizdən sonra daha da artıb. İkinci Qarabağ müharibəsindəki Zəfərimiz dünyaya səs salandan sonra Azərbaycandan kənarda yaşayan soydaşlarımızın da fəallığı, Vətənə gəliş-gedişi intensivləşib. Qürbətdəki soydaşlarımızla qürur duyduğumuz bu məqamlarda Vətənimizdə görüşüb ünsiyyətdə olmaq da son uğurlarımıza çox maraqlı və fərqli baxışlarını eşidib bilməyə imkan verir. Müsahibimiz Kanadada yaşayan türkoloq, Yaxın Şərq ölkələri üzrə şərqşünas alim Xoşqədəm Qaramandır.
– Xoşqədəm xanım, hələ sovet dönəmində Sankt-Peterburq Universitetinin şərqşünasdlıq fakültəsini Yaxın Şərq ölkələri üzrə mütəxəssis olaraq bitirmisiniz. Bu ixtisası necə seçdiniz?
– Bu ixtisası necə seçdim, sualınıza iftixarla və minnətdarlıqla ümummilli liderimiz Heydər Əliyevin sayəsində,- deyə cavab verirəm. Yəqin ki, bilirsiniz, Heydər Əliyev respublikamıza rəhbərlik etdiyi illərdə müxtəlif sahələr üzrə mütəxəssislərin respublikamızdan kənarda, nüfuzlu universitetlərdə təhsil almasına xüsusi diqqət göstərib və şərait yaradıb. Həmin kadrlar, mütəxəssislər sonralar ölkəmizin inkişafında da,sərhədlərimizdən kənarda tanınmasında da mühüm rol oynayıblar. Ölkədə hansı bir nailiyyət varsa, orada Heydər Əliyevin adı və apardığı uzaqgörən siyasət nəticəsində formalaşan yüksək səriştəli mütəxəssislərin rolu var.
Azərbaycandan kənarda nüfuzlu bir universitetdə əsaslı oxumaqla mən də özümü Ulu öndərin təhsil sahəsində göstərdiyi fəaliyyətdən bəhrələnən kadrlardan biri hesab edirəm. Universiteti bitirəndən sonra 25 ilə yaxın bir vaxtda AMEA-nın Şərqşünaslıq İnstitutunda çalışmışam. Sonra tale elə gətirib ki, Kanadaya köçmüşəm və orda fəaliyyətimi davam etdirirəm. Kanadada ixtisasım üzrə treninqlər keçirir, tez-tez müxtəlif ölkələrdə düzənlənən elm məclislərinə dəvət olunur, konfranslarda Yaxın Şərq üzrə mütəxəssis kimi çıxış edirəm. Yaxın Şərq ölkələrinin tarixinin, inkişafınnın gedişatı üzrə müzakirələrdə Azərbaycanımızın tanınması və dünyadakı proseslərdə mövqeyi haqqında səhih məlumatlar verib, dürüst təsəvvür formalaşdırmağa çalışıram.
– Qürbətdə Azərbaycanımızın qələbələrini necə yaşadınız?
– Öncə qeyd etmək istərdim ki, Azərbaycandan kənarda yaşayanların böyük əksəriyyətinin qəlbi həmişə Vətənlə döyünür. Bunu yaşadığım Kanadada və əksər ölkələrdə elmi konfranslarda, tədbirlərdə olarkən daim müşahidə etmişəm. Ərazilərimizin azadlığı uğrunda müharibədə Qələbəmizsə hamımızın ürəyini dağa döndərdi, belə demək mümkünsə, qürbətdə yaşayan azərbaycanlıları digər xalqların içində bir boy ucaltdı. Dünyanın hansı nöqtəsində olursa-olsun, bu günlər soydaşlarımız Vətən müharibəsindəki böyük Qələbənin, son uğurların qürurunu yaşayırlar və bu, onların ictimai-siyasi baxımdan fəallaşmasına stimul verib. Mən özüm Kanadadakı təhsil ocaqlarına azərbaycanlı gənclərin cəlb olunması ilə bağlı fəaliyyətimdə bunu aydın hiss edirəm. Eləcə də dünyanın aparıcı ölkələrində son illər iştirak etdiyim tədbirlərdə bizə münasibətin əsaslı şəkildə müsbət istiqamətdə dəyişdiyinin şahidiyəm. Azərbaycana marağın qat-qat artması ilə qürbətdə yaşayan soydaşlarımızın da məsuliyyət hissi, Vətənimizi layiqincə təmsil etmək məsuliyyəti yüksəlib.
– Uzun illər Yaxın Şərq ölkələrini araşdıran alim kimi, bu gün həmin regionda gedən proseslərlə bağlı fikirlərinizi bilmək istərdik.
– Mən uzun müddət AMEA-nın Şərqşünaslıq İnstitutunda “Türkiyə tarixi və iqtisadiyyatı” şöbəsində çalışmışam. Bu gün o sahənin mütəxəssisi olaraq baxanda görürəm ki, Türkiyə dünya siyasəti və iqtisadiyyatında sözü keçən bir ölkə kimi tanınır. Qardaş ölkənin hərbi sənayedə, iqtisadıyyatın ayrı-ayrı sahələrində əldə etdiyi uğurlar dünya siyasətində söz sahibi səviyyəsinə yüksələn Cumhurbaşqanı R.T. Ərdoğanın adı ilə bağlıdır.
Ümumiyyətlə, dünya düzənindən, bəşəri tərəqqidən danışarkən, öncə bu proseslərdə prezidentlərin rolunu xüsusi vurğulamaq istərdim. Onu da deyim ki, prezidentlərin fəaliyyətinə siyasi xadimlər, dünya siyasətini izləyib araşdıran mütəxəssislər danışıb dürüst qiymət verə bilərlər. Dünyanın gərdişindən az-çox xəbərdar olan şərqşünas kimi əminliklə deyə bilərəm ki, bu regionun gələcəyi iki uzaqgörən siyasi xadim, münasibətlərin inkişafına, tərəqqisinə töhfələr verən Türkiyə Prezidenti Rəcəb Tayib Ərdoğandan və Azərbaycan Respublikasının Prezidenti İlham Əliyevdən çox asılıdır. Müşahidə edirik ki, dünyada və Yaxın Şərqdə onlarsız heç bir məsələ həll olunmur. Tarix sübut edir və yaşadığımız zaman, gedən proseslər də onu göstərir ki, bu iki şəxsiyyətin atacağı addımlar regionun gələcək inkişafını təmin edə bilər.
– Söhbətimizin əsas ruhunu təşkil edən qələbəmizin ölkəmizin gələcək inkişafına, sizcə, töhfəsi nə olacaq?
– Azərbaycanımızdakı bugünkü vətənpərvərlik ruhu bütün dünyaya örnək ola bilər. Vətən müharibəsində biz torpaqlarımızı, sözün əsil mənasında, ANA deyib sevən, təəssübkeş, mərd cəsur gənclərimizin olduğuna şahidlik etdik. Qarşıya qoyulan müqəddəs bir məqsədə doğru, torpaqlarımızı azad etmək yolunda inamla irəlilədilər. Müharibə meydanında inadla mübarizə aparan, Azərbaycanımızın gələcəyi olan gənclərimiz elmi potensialımızın yüksəlməsində də böyük rol oynayacaqlar. Vətənpərvər gənclərimizin dünya elminə töhfə verərək, Azərbaycanın elmi potensialını da müasir səviyyəyə uyğun təmsil edəcəklərinə ümidim böyükdür.
Söhbəti apardı:
Rahib QƏRİB
XQ