Ölkəmizdə dərmanların baha qiymətə satılması, keyfiyyətinin aşağı olması, qıtlığı ilə bağlı ilin əvvəlində Səhiyyə Nazirliyinə sorğu göndərmişdik. Bir aydan sonra nazirlikdən aldığımız cavablar nə sualları əhatə etmiş, nə də problemi çözməyə ipucu vermişdi. Əksinə, bu məsələ “bizlik deyil” qənaəti yaratmışdı. Bununla bağlı növbəti yazımıza isə heç cavab verilməmişdi.
Ölkəmizdə dərmanlarla bağlı problem isə qalmaqda davam edir. Ötən dövrdə bəzi dərman idxalçılarından da nəsə öyrənmək istədik. Lakin onlardan da suallarımıza doğru-düzgün cavab ala bilmədik. Kimisi “deyilən söz-söhbətlər doğru deyil”, kimisi “qiymətlərin bahalığı bizdən asılı deyil” – kimi cavablarla özlərini kənara çəkdilər.
Üz tutduq öz fəaliyyətində minimum qiymət, maksimum keyfiyyət prinsipini əsas götürərək keyfiyyətli Avropa və Türkiyə istehsalı olan dərmanların idxalı, marketinqi və satışını həyata keçirən yerli UNİTU şirkətinə. Qeyd edək ki, şirkət 2011-ci ildən rəsmi olaraq bir preparatla fəaliyyətə başlayıb. Hazırda isə Azərbaycanda ən geniş yayılmış xəstəlikləri əhatə etmək üçün öz dərman siyahısını artırmağa davam edir. Məqsəd insanları sağlamlığı və təsirli müalicə metodları üçün vacib olan dərmanlarla təmin etməkdir.
Şirkətin təsisçisi Fikrət Əliyevlə Azərbaycanın dərman bazarında mövcud olan vəziyyətlə bağlı söhbət etdik. Dərmanların bahalığından başladıq, onun səbəblərini və vəziyyətdən çıxış yollarını aradıq.
– Fikrət müəllim, etiraf edək ki, Azərbaycanın satışa çıxarılan dərmanların qiyməti qonşu ölkələrə nisbətən 3–5 dəfə bahadır. Şəxsən hər gün istifadə etdiyim “Tripleksam”ın burada qiyməti 28 manat, Türkiyədə isə dəfələrlə ucuzdur. “Preduktal” da, “Kartan” da, “Ocuvite” da elə... Hansını deyək? Bəlkə, səbəbini idxalçı şirkət rəhbəri olaraq, siz açıqlayasınız.
– Digər ölkələrlə müqayisədə Azərbaycanda dərmanların bahalığı son 5 ildə, xüsusən də 2020-ci ildən sonra daha çox gündəmdə olan məsələdir. Bu, aktual problemdir. Azərbaycanda dərmanların xarici ölkələrə nisbətən baha olması doğrudur və onun bir neçə səbəbi var. Mən 10 ildən artıqdır ki, dərman idxal edən bir şirkət rəhbəri olaraq, bunu faktlarla deyə bilərəm. Birinci və başlıca səbəb ölkəmizdə dərman istehsalının olmamasıdır. Azərbaycanda bu məsələ həllini tapmadığına görə, biz daha çox ehtiyac olan dərmanları idxal edirik.
İdxal prosesində isə fərqli nüanslarla rastlaşırıq. Elə istehsalçı ölkələr var ki, məsələn, lap yaxın qonşularımız Türkiyə, Gürcüstan, yaxud digər Avropa ölkələri dərman istehsal etməklə yanaşı, həm də idxalla məşğuldur. Ən mühümü odur ki, bizim ölkədən fərqli olaraq, orada dərmanlar gömrük və vergi rüsumundan azaddır.
Bizdə isə idxal olunan dərmanlara həm gömrük rüsumu, həm də vergi tətbiq olunur. Yəni, biz istehsalçıdan aldığımız məhsulu Azərbaycana gətirəndə, hansı qiymətə almağımızdan asılı olmayaraq, qiymətin üzərinə 36 faiz gömrük rüsumu əlavə edilir, 18 faiz vergi rüsumu (ƏDV) hesablanır. Yol, anbar xərci də var. Əlavə olaraq, sertifikatlaşma və laboratoriya xərcləri... Bütün bunlar toplananda 58 faiz əlavə xərc çıxır.
Azərbaycanda dərmanların satışa qeyri-ölkələrə nisbətən baha qiymətə çıxarılmasının əsas səbəbləri bunlardır. Yəni, bu gün satışda olan 10 manatlıq dərman vergidən və gömrükdən azad olarsa, avtomatik olaraq 5 manat 80 qəpik qiymətində endirim yaranar və həmin dərman 4 manat 20 qəpiyə satılar. “Niyə Türkiyədə ucuzdur?”– soruşursunuz. Çünki orada istər idxal, istərsə də ixrac zamanı dərmanlar vergidən və gömrükdən azaddır.
Adını çəkdiyiniz “Tripleksam” dərmanını Türkiyənin öz istehsalı olduğuna görə, orada 6–7 manata, burada isə 25 manata əldə edə bilirik. Bu, təbii və normaldır, çünki biz onu oradan 6 manata alırıqsa, Azərbaycana gələndə qiymətin üzərinə 58 faiz rüsumlar əlavə olunur, 10 manatdan yuxarı olur. Amma onu da qeyd etməliyik ki, bir sıra dövlətlər idxal etdiyi məhsulları ixrac edəndə fərqli qiymət tətbiq edir. Bəzən elə düşünürlər ki, xaricdə 6 manata olan dərman topdansatış yolu ilə aşağı qiymətə alınır. Əsla belə deyil. Hansısa ölkə 5 manata satdığı dərmanı ixrac edəndə, 10 manata verir. Bu, yalnız Türkiyədə deyil, bütün dünya təcrübəsində belədir. Dərman istehsal edən ölkələr ixrac zamanı qiyməti qaldırır. Azərbaycanda dərman istehsalı olarsa, qiymətlər avtomatik düşər.
Əlavə olaraq onu demək olar ki, Azərbaycanda elə dərman məhsulları var ki, qiymətləri Tarif Şurası (TŞ) tərəfindən müəyyən edilir. Hazırda satışda olan dərmanların 50 faizi belədir. Tarif Şurası tərəfindən müəyyənləşdirilən qiymətlərə kimsə müdaxilə edə bilmir: nə dərman idxalçıları, nə satış depoları, nə də apteklər. Məsələn, Şura hər hansı dərmana qiymət qoyubsa ki, bu, 26 manata satılacaq, biz ondan nə bir manat aşağı, nə bir manat yuxarı sata bilərik. Çünki dərman bazarında qiymətləri onlar müəyyənləşdirir.
– Hətta əczaçılar da təsdiq edirlər ki, indiki dərmanların keyfiyyəti və təsiri azalıb. Cəmiyyətdə belə fikir formalaşıb ki, dərman idxalçıları istehsalçı müəssisələrlə razılığa gəlib dərmandan müəyyən tərkib hissəsini çıxarmaq və ya dozasını azaltmaqla preparatın daha ucuz başa gəlməsinə, bununla da daha çox qazanc əldə edilməsinə nail olurlar. Bu fikrə münasibətiniz...
– İnsanların söylədiklərində müəyyən həqiqət var, amma tam olaraq elə deyil. Öncə onu deməliyəm ki, pandemiyadan sonra bütün dünyada qiymət artımı yarandı, eləcə də, Azərbaycanda. Dünyanı dərman xammalı ilə 2 ölkə – Çin və Hindistan təmin edir. Xüsusən də dərman bazarında xam məhsul istehsal edən Çində pandemiya dövründə dərman istehsal edən zavodlar iflas edib bağlandığına görə istehsalçılarda qiymətlər, təbii olaraq, artdı.
Bahalaşmadan sonra Tarif Şurasının təyin etdiyi qiymətlər dəyişməyib. Amma istehsalçıdan dərmanı artıq 2 qat baha alırıq. Belə olan halda iki yol qalır. Ya həmin məhsulu ölkəyə gətirməməliyik, ya da qiymətin qalxmaması üçün dərmanın tərkibində doza aşağı salınmalıdır. Bu, preparatdan hansısa tərkibi çıxarmaq deyil, dərmanın qəbulunda dəyişiklikdir. Əvvəl 1 tabletdən gündə 1 dəfə qəbul edilirdi, tərkibində 100 mlq Vit C vardı. İndi isə 1 tabletin tərkibində 50 mlq Vit C olur və gündə iki dəfə qəbul edilməlidir ki, xəstə həmin sutkalıq dozanı ala bilsin.
Bu addımı atmağa da məcburuq. Çünki Tarif Şurası qiyməti dəyişmir, istehsalçı isə qiyməti artırıb. Artıq 100 mlq-lıq dərman baha olduğundan ala bilmirsən. Ona görə də bəzi şirkətlər əvvəlki dərmanları indi gətirmir, bəziləri də dediyimiz üsuldan istifadə edir. Doza iki dəfə azaldılır, bu, dərmanın keyfiyyətini aşağı salmır. Dərman sənəddə göstərilən dozaya uyğun gəlmirsə, həmin məhsula satış sertifikatı verilmir. Kimsə dərmanın tərkibində dəyişiklik edə bilməz. Məhz bu məsələyə görə, insanlarda belə fikir yaranıb ki, dərmanlar əvvəllər daha keyfiyyətli idi.
– Nə istehsalçı itirir, nə də idxalçı. İtirən istehlakçı – insanlar olur. Əvvəl bir qutu dərmanı 5 manata alan xəstə, indi həmin dozanı qəbul etmək üçün 10 manat xərcləyir...
– Başqa yol yoxdur. Ya dərmanların dozası azalmalıdır, ya da gətirilməməlidir. Öncəki sualın ikinci tərəfinə gəldikdə, deyə bilərəm ki, belə formada qazanc artmır. Dərmanı neçəyə almağından asılı olmayaraq, onu təyin edilən qiymətdən baha sata bilməzsən.
– Apteklərdə dərmanların satışına idxalçı şirkətlər nəzarət edə bilirmi?
– Apteklər sərbəst bazar iqtisadiyyatında olduğundan dərmanların satışına idxalçı şirkətlər nəzarət edə bilmir. İqtisadiyyat Nazirliyi onların hər birinə sərbəst qiymət təyinetmə ixtiyarı verib. Məsələn, şəhərin mərkəzində, Fəvvarələr meydanında olan apteklə, deyək ki, Hövsandakı aptekdə dərmanların satışında qiymət fərqi olacaq. Çünki burada aptek sahibi deyir ki, icarə haqqına 10 min manat ödəyirəm. Hövsandakı isə 500 manat ödəyir. Hər biri özünə görə qiymət artımı edir. Digər ölkələrdə isə belə deyil, icarə haqqı standartdır.
– İdxal etdiyiniz məhsulların satışını necə həyata keçirirsiniz? Həkimlərlə razılaşma yolu ilə dərmanların reklamla satışına, yoxsa apteklərlə razılaşmaya üstünlük verirsiniz?
– Ümumiyyətlə, dünya bazarında idxal olunan dərmanların reklamları fərqli aparılır. Bəzi şirkətlər TV reklamlarına üstünlük verir, bəziləri konfranslar, konqreslər, seminarlar keçirməyi münasib bilir. Bəzi şirkətlər isə xəstəxana, poliklinika daxilində təqdimatlar keçirir. Bir çoxları həkimlərə əyani vizitlərlə öz məhsulunun təqdimatını edir, bəziləri də dediyiniz kimi, apteklərlə. Yəni həkimlər tərəfindən təyin edilən dərmanların aptek tərəfindən reklam olunması qeyri-mümkündür. Sifarişçi olmasa, hansı dərman və kimə reklam olunacaq? Aptekə həkimin resepti gəlməlidir ki, əczaçı dərmanı sata bilsin.
Amma, bəzi preparatlar da var ki, onlara dünya bazarında otisi (həkim tərəfindən təyin olunmayan) dərmanlar deyirlər. Buna əczaçının özünün sərbəst təqdim edə biləcəyi bəzi ağrıkəsicilər, vitaminlər, siroplar aiddir. Hər hansı şirkətin aptekdə belə dərmanları varsa, əczaçı onu özü istədiyi şəkildə reklam edə və sata bilər.
Bundan başqa, biz dərmanlarımızın satışı məqsədilə hər bir imkandan yararlanmağa çalışırıq, televiziyada, sosial mediada reklam edirik, həkimlərlə əməkdaşlığa daha çox üstünlük veririk. Sosial səhifələrimizdə dərmanların istifadə qaydası, hansı xəstəliklərdə xeyirli olması barədə videoçarxlar hazırlanıb cəmiyyətə təqdim edilir. Siz o səhifələrimizə nəzər salsanız, görərsiniz ki, hər il nə qədər konfranslar keçirir, xarici həmkarlarımızın konqreslərinə evsahibliyi edirik.
– Fikrət müəllim, arzu edək ki, göstərilən problemlər tezliklə həllini tapsın, qiymətlər aşağı düşsün.
Müsahibəni qələmə aldı:
Z.HÜSEYNOVA,
“Xalq qəzeti”