Xəbər verdiyimiz kimi, Bakıda vokalçıların Bülbül adına IX Beynəlxalq Müsabiqəsi başlanıb. 150-dən çox ifaçının qələbə uğrunda yarışa qoşulduğu müsabiqədə 18–36 yaş arasında gənclər iştirak edirlər. 

Dünən müsabiqənin rəsmiləri və işti­rakçıları Bakıda Azərbaycan vokal sənə­tinin banisi, görkəmli xanəndə Bülbülün abidəsi önünə toplaşaraq açılış mərasimi keçiriblər. Sonra Azərbaycan Dövlət Aka­demik Filarmoniyasında ifaların dinlənil­məsinə başlanıb. Azərbaycan, Türkiyə, Rusiya, Qazaxıstan, Qırğızıstan, Cənubi Koreya, Makedoniya və digər ölkələrdən olan vokalçılar bir-birindən gözəl səsləri ilə çıxışlar etməyə başlayıblar. 

Bülbül Beynəlxalq Fondunun rəh­bəri və müsabiqənin sədri, Xalq artisti, bəstəkar-müğənni Polad Bülbüloğlu jurnalistlərə müsahibəsində dedi:

– Çox şadam ki, 1997-ci ildən bəri təşkil olunan bu müsabiqə ənənə halını alıb. Daha bir ilk isə budur ki, indi artıq müsabiqədə məhz azərbaycanlı məşhur vokalist, dünyaşöhrətli Xalq artistimiz, Dövlət Akademik Opera və Balet Teatrı­nın direktoru Yusif Eyvazov baş münsif­dir. İyunun 9-da Şuşada – Bülbülün evin­də, onun məkanında vokal yarışmasına yekun vurulacaq. Hər bir iştirakçıya uğur­lar arzu edirəm.

Mahnılar, ecazkar ifalar bir-birini əvəz edir. Müxbirlər arada fürsət tapıb, münsiflər heyətinin sədri, ünlü həm­yerlimiz Yusif Eyvazovu da danışdırır­lar.

– Səslər gözəldir, – deyə o, bildirir. – Əla ifaçılar var. Əlbəttə, hamı qalib ola bil­məz. Ona görə də biz ifalara çox diqqətlə qulaq asırıq. 

İştirakçılardan biri – Əlişir Nəvai adına Özbəkistan Böyük Teatrının so­listi, bir çox beynəlxalq müsabiqənin qalibi Otabek Nazirov çıxışından sonra ürək sözlərini bizimlə bölüşdü:

– Çox yaxşıdır ki, Azərbaycana gəlib ilk dəfə bu müsabiqədə iştirak edirəm. Doğrusu, əvvəlcə bir az həyəcan keçir­dim, sonra ifama başladım. Bülbül müsa­biqəsi mənə olduqca xoş təsir bağışlayır. Özümə də, həmkarlarıma da uğurlar dilə­yirəm.

Azərbaycanlı iştirakçı, bariton Ma­hir Tağızadə isə dedi:

– Bu müsabiqənin özünəməxsus yeri var. Çünki bizim öz Vətənimizdə keçirilir. Mən hələ illər öncə, Bakı Musiqi Akade­miyasında tələbə olarkən artıq Bülbül vo­kal müsabiqəsində iştirak etmiş, “Ümid” mükafatı qazanmış və Polşanın Böyük Teatrında ustad dərsləri dinləmək fürsəti əldə etmişdim. Artıq bir peşəkar kimi qə­rara gəldim ki, bu il də müsabiqəyə qatı­lım. Görək, necə olacaq.

Qeyd edək ki, vokalçıların Bülbül adı­na IX Beynəlxalq Müsabiqəsinni qalibləri Şuşada qala-konsert zamanı elan edilə­cək. 

Ə.DOSTƏLİ
XQ