Ötən həftəsonu 3 gün ərzində Bakıdakı “İçərişəhər” Dövlət Tarix-Memarlıq Qoruğu İdarəsinin təşkilatçılığı ilə “Qala” Dövlət Tarix-Etnoqrafiya Qoruğunda Qala Etno Fest keçirilib. 

Festivalın qonaqları, Milli Məclisin deputatları və ictimaiyyət nümayəndələri Qoruqla yaxından tanış olublar. Milli Məc­lisin Komitə sədri Fazil Mustafa bu cür tədbirlərin keçirilməsini yüksək qiymət­ləndirib. O, tarixi abidələrin tanıdılması və qorunması istiqamətində böyük işlər görüldüyünü diqqətə çatdırıb və ümid et­diyini bildirib ki, belə festivallar xalqımızın tarixi mirasımıza qarşı diqqət və həssaslı­ğını artıracaq. Qala Etno Fest çərçivəsin­də, Qala qəsrində “Qala tarixi fotolarda” sərgisi ziyarətçilərə təqdim olunub.

Bugünə qədər qorunub saxlanmış, dublalı (bacalı) evləri ilə məşhur, XVIII əsrə aid unikal Abşeron kəndi nümunəsi olan və hazırda “Qala” Dövlət Tarix-Et­noqrafiya Qoruğunda muzey kompleksi formasında qorunan “Dulusçu evi”nin həyətindəki qocaman ağacın ətrafında ölkəmizin ünlü mədəniyyət xadimləri ilə üzbəüz təmaslar olub. “Püstə ağacının al­tında görüş” silsiləsində “Türk damğaları”, “Keramika sənəti”, “Abşeron arxeologiya­sı”, “Dəzgah və kitab qrafikası” mövzu­larında müzakirələrin təşkili etnomədəni mühitə xüsusi ab-hava qatıb.

Festival çərçivəsində ənənəvi və et­noidman növlərinin həvəskarları olan iştirakçılar oxatma, eləcə də nərd, şah­mat və dama kimi masaüstü oyunlarda iştirak ediblər. Kiçik ziyarətçilər üçün isə etno və uşaq oyunları, rəsm müsabiqələri keçirilib. Sənətkarlıq və qədim peşələrlə maraqlananlar üçün dulusçuluq, xalçaçı­lıq, boyakarlıq, dəmirçilik, qurama, keçə sənəti, zərgərlik, vitraj, ağacoyma, kera­mika, rəngləmə, ebru və şam düzəltmə üzrə ustad dərsləri də təşkil olunub. 

XQ