“Cazın şahzadəsi” kimi tanınan azərbaycanlı pianoçu, bəstəkar və vokalçı Əzizə Mustafazadə Türkiyənin Antalya şəhərində keçirilən 7-ci Antalya Akra Caz Festivalında fanatları ilə görüşüb.
Qeyd edək ki, “Akra” otelinin qarşısında, açıq səma altında keçirilən konsertdə Əzizə Mustafazadənin güclü səsi və piano ifası tamaşaçıları valeh edib. O, basçı Ralf Cetto və zərb alətləri ifaçısı Simon Zimbardonun müşayiəti ilə füzyon və caz kompozisiyaları ilə çıxış edib.
Yeri gəlmişkən, Əzizə xanım repertuarına təkcə öz bəstələrini deyil, həmçinin atası, mərhum ustad musiqiçi Vaqif Mustafazadənin əsərlərini də daxil edib. O, sonra oğlu Ramizxanı səhnəyə dəvət edib. “Cazın şahzadəsi”nin oğlunun ifası tamaşaçıların alqışları ilə qarşılanıb.
Xatırladaq ki, iyunun 12-də başa çatacaq festival dünən caz dünyasının aparıcı simalarından biri, pianoçu və bəstəkar Kərəm Görsevin yeni albomu “Lost ghost”un Türkiyə təqdimatı ilə davam edib.
AYTƏN
XQ