Üç gündür ki, Bakı yenidən böyük kitab bayramı ovqatındadır. Hüseyn Cavid prospektində – Azərbaycan Milli Elmlər Akademiyasının (AMEA) önündəki parkda III Türk Dünyası Ədəbiyyat və Kitab Festivalı keçirilir.
Festival Beynəlxalq Türk Müəllifləri Birliyinin (BTMB) təşkilatçılığı, Mədəniyyət Nazirliyi, Azərbaycan Yazıçılar Birliyi (AYB), Milli Məclisin Mədəniyyət komitəsi, TÜRKSOY, Türk Mədəniyyəti və İrsi Fondu, AMEA, Bakı Şəhər İcra Hakimiyyəti, Beynəlxalq Türk Akademiyası, TİKA və digər qurumların dəstəyi ilə təşkil olunub. Kitab bayramına türksoylu ölkələrdən çoxsaylı alimlər, qələm adamları, naşirlər də gəliblər. Festivalın hər günü bir ölkəyə – Qırğızıstan, Özbəkistan, Macarıstan, Qazaxıstan, Azərbaycan, Türkiyə, Türkmənistan və Şimali Kipr Türk Respublikasına həsr edilir.
Aşılış mərasimində AYB sədri, Xalq yazıçısı Anar Türk dünyasının sarsılmaz birliyinə, türk dövlətləri arasındakı əlaqələrin daha da möhkəmlənməsinə töhfə verəcək festivalın önəmini açıqlayaraq dedi:
– Əsrlər boyu bilik, zəka saxlancı olan kitab insanların kamillik qaynağına, yaxın sirdaşına çevrilib. Cəmiyyətin mənəvi aləminin zənginləşməsində, oxucuların dünyagörüşündə, hərtərəfli inkişafında kitab əvəzsiz rol oynayıb. Bu festivalın da əsas məqsədi iştirakçılar arasında mütaliə mədəniyyəti və oxu vərdişini inkişaf etdirmək, insanların kitaba marağını daha da artırmaqdır. Qardaş türk dövlətlərindən tədbirə qatılan qonaqlar bu festivala ən yaxşı nəşrləri gətirməklə ortaq mənəvi xəzinəyə öz töhfələrini veriblər.
AMEA-nın prezidenti, akademik İsa Həbibbəyli festivalın türk dövlətlərinin dostluğunun daha bir təzahürü olduğunu vurğuladı:
– III Türk Dünyası Ədəbiyyat və Kitab Festivalı digərlərindən bir sıra cəhətləri ilə fərqlənir. Builki festival ilk dəfədir ki, Azərbaycanın tam ərazi bütövlüyü şəraitində qeyd edilir. Prezident İlham Əliyevin möhkəm iradəsi ilə 44 günlük Vətən müharibəsində əldə edilmiş Zəfərin işığında və ondan sonra aparılmış uğurlu əməliyyatlar sayəsində qazanılmış tam ərazi bütövlüyü həm Azərbaycan, həm də Türk dünyası üçün böyük əhəmiyyətə malik tarixi hadisədir. Ölkəmizin tam ərazi bütövlüyü şəraitində keçirilən bütün tədbirlər, eləcə də bugünkü festival qarşımızda yeni dövrün açılmasına kitabın, mədəniyyətin və elmin də xidmət edəcəyinə inamı artırır.
Prezident İlham Əliyevin andiçmə mərasimindəki çıxışı zamanı Türk dünyası ilə əməkdaşlığı dövlət siyasətində əsas prioritet kimi müəyyənləşdirdiyini və Türk Dövlətləri Təşkilatını vahid bir ailə kimi təsvir etdiyini xatırladan akademik bildirdi ki, hazırkı mərhələ Türk dünyası ilə inteqrasiyanın daha da genişlənməsini zəruri edir. Elə bu festival da mənəvi birgəliyə sanballı töhfədir.
Əvvəlki analoji festivallarda olduğu kimi, yenə də şair və yazıçılarımız ədəbi əsərlərini, alimlərimiz elmi nailiyyətlərini, naşirlərimiz çap məhsullarını Türk dünyasına daha asan çatdırmaq imkanı əldə ediblər və eyni zamanda, qardaş ölkələrin elmi-mədəni, ədəbi mühitində gedən prosesləri yaxından izləyə bilirlər. Mərasimdəki digər çıxışlarda kitab bayramı ölkənin ziyalı mühitinin daha da inkişaf etdirilməsi baxımından əlamətdar hadisə kimi dəyərləndirildi.
Azərbaycanda Atatürk Mərkəzinin direktoru, Milli Məclisin deputatı, akademik Nizami Cəfərov çıxışına Türk qövmlərinin ədəbi zənginliyindən danışmaqla başladı və sonra dedi:
– Vaxtilə ulu öndər Heydər Əliyevin Türk Dövlətləri Başçılarının II Zirvə Toplantısında çıxışı zamanı səsləndirdiyi “Bizim mədəni birliyimizi siyasi birliyimiz tamamlamaqdadır”, – sözlərini xatırlayırıq. Ötən illər ərzində Türk dünyasının möhkəm siyasi birliyi meydana gəlib, ədəbiyyat və kitab da xalqlarımızın birliyinin təməllərindəndir. Odur ki, ictimai-siyasi və ədəbi yaradıcılıq baxımından ciddi əsaslara dayanan festivalın işinə uğurlar diləyirəm.
Mərasimdə Beynəlxalq Türk Akademiyasının təmsilçisi Əbülfəz Süleymanlı, TÜRKSOY-un Azərbaycan üzrə nümayəndəsi Elçin Qafarlı, TİKA Bakı proqram koordinatoru Hayrettin Özçelik, Türkiyənin Azərbaycandakı səfirliyinin Mədəniyyət və tanıtma müşaviri Muhittin Macit, Milli Məclisin Mədəniyyət komitəsinin eksperti Əkbər Qoşalı da böyük söz bayramı olan bu gərəkli festivalın həm də gənc nəslin Türk dünyasının böyük şəxsiyyətlərini tanımasına kömək edəcəyini vurğuladılar.
Sonra festival ədəbi-bədii kompozisiyalarla davam etdirildi. Ardınca AMEA Ədəbiyyat İnstitutunun şöbə müdiri, professor Asif Rüstəmlinin moderatorluğu ilə AYB-nin 90 illiyinə həsr edilmiş panel başlandı. Maraqlı çıxışlar fəal müzakirələrlə davam etdi.
Qeyd edək ki, festivalda şeir saatlarına, müzakirələrə, kitab təqdimatlarına start verilib. Mayın 31-dək davam edəcək kitab bayramı günlərində ədəbi-bədii konfranslar, görkəmli yazarların yubileylərinə həsr olunan tədbirlər, konsert proqramları da təşkil olunacaq.
Əli ƏLİYEV
XQ
