Xəbər verdiyimiz kimi, bu günlərdə AMEA-da Azərbaycan Naşirlərinin I Forumu keçirilib. Təntənəli açılış mərasimi və panellərdə nəşr məhsulları və strategiyaları, çap problemləri, kitab və oxucu məsələsi kompleks şəkildə nəzərdən keçirilib.
Forum çərçivəsində “Azərbaycan Nəşriyyatları Assosiasiyası” İctimai Birliyi, AMEA, Təhsilin İnkişafı Fondu, Yunus Əmrə İnstitutu və “Hədəf Nəşrləri”nin birgə təşkilatçılığı ilə AMEA parkında “Oxu Günü –10” layihəsi reallaşıb. Şənbə və bazar günlərinə təsadüf edən sərgi-festivala 40-a yaxın nəşriyyat, ondan çox kitab mağazası, 70-dən artıq ədəbiyyat və incəsənət xadimi qatılıb.
Artıq ənənə halını almış “Oxu Günü”ndən məqsədi ölkədə kitabçılığı inkişaf etdirmək, gənclərin intellektual mühitə adaptasiyasını aktual saxlamaq, oxucu-yazıçı görüşlərini stimullaşdırmaq, endirimli kitablar təqdim etmək və bununla kitabın əhəmiyyətini cəmiyyətə aşılamaqdan ibarətdir. Elə “Kitab oxu, 1000 AZN qazan” marafonu da həmin məqsədə xidmət edib. Layihə “Gəlin, birgə oxuyaq!” devizi altında təşkil olunub.
Sərgi-festivalda şair və yazıçılar – Rüstəm Behrudi, Varis, Elxan Elatlı, İlqar Kamil, İlham Tumas, Elay, Tamerlan İsmayılzadə, Aynur Cavid, Ramil Əhməd, Məsudə Cabbar, Erix Qauzer, Fidan Cəfərzadə və başqalarının təqdimat və imza mərasimləri olub. III və IV “Kitabqurdu” Oxu Marafonunun müəllifləri – Şəmil Sadiq, Amin Sükut, Sevinc Elsevər, Elgüsel, Zahid Xəlil, Xəyalə Murad, Rövşən Abdullaoğlu, Rafiq İsmayılov, Fatimə Alxaz, Rəşad Bayramov və Gülüş Xəlilova da festivalda iştirak ediblər.
Sərgidə kitabların ucuz satışı da təşkil edilib. “Ədəbi söhbətlər”, “Ustad dəsləri”, uşaqlar üçün “Nağıl gecələri” hər kəsdə maraq doğurub. Çinarə Məlikzadə, Röyal Musa, eləcə də digər gənc ifaçılar festivala rəng qatıblar. Eyni zamanda, qədimi xalçalar, misgərlik məmulatları və digər sənət nümunələri də sərgilənib.
“Oxu Günü-10”-un iştirakçılarından aldığımız müsahibələri təqdim edirik.
BDU-nun professoru, Əməkdar jurnalist Qulu Məhərrəmli:
– Sərgi-yarmarka elə bir dəyərli tədbirdir ki, kitab özü oxucunun hüzuruna gəlir. Bu böyük məkanda vaxt itirmədən istədiyin kitabı tapmaq olur. Kitab mənəvi tələbatdır, beynin və ruhun qidasıdır, buna görə də kitabdan əl çəkmək olmaz. Son 4–5 ildə Bakıda və respublikamızın digər yerlərində belə sərgi-yarmarkaların təşkili çox önəmlidir. Məncə, hər şənbə və bazar günləri açıq meydanlarda kitab sərgiləri keçirilsə, yaxşı olar.
Elman Mustafazadə, kitab satıcısı:
– Əslində, bu gün burada oxucu kütləsi elə də çox deyil. Buna qədər 34 il yaşadığım Niderlandda ən kiçik şəhərdə belə kitab yarmarkalarında, necə deyərlər, iynə atsan, yerə düşməz. İstərdik ki, burada da elə olsun. Amma Bakıda kitab xiridarları üçün yaradılan şərait fərəh doğurur. İstənilən qədər kitab satışa çıxarılıb.
Natiq Babayev, coğrafiya üzrə fəlsəfə doktoru, AYB-nin üzvü:
– Mütaliəsiz insan həyatda inkişafdan qalır, bədii zövq baxımından irəliləyə bilmir. Kitab həyat kompasıdır, – desək, yanılmarıq. Gərək bunu unutmayaq və kitablarla ünsiyyətimizi daha da artıraq. Bu baxımdan, belə sərgi-yarmarkalar kitabsevərlər üçün əla fürsətdir. Seçim imkanı da genişdir, kitablar da endirimlə təklif olunur. Bəyənilən təşəbbüsdür.
Valid Hüseynəliyev, kitab satıcısı:
– Sərgiyə uşaqlar daha çox gəlib. Elə ən çox satılan da uşaq ədəbiyyatıdır. Biz bunu çox yüksək qiymətləndiririk. Sərgi oxucu üçün kitabları daha da əlçatan edir. Hər hansı bir mağazadan fərqli olaraq, burada qısa vaxtda 30–40 nəşriyyatın kitabları ilə tanış olmaq mümkündür. Belə sərgilərin təşkilini yüksək qiymətləndirirəm.
Uğur Qismətli, oxucu:
– Bu formatda kitabla ünsiyyətin daim tərəfdarıyam. Burada təkcə Azərbaycan yazıçılarının deyil, dünya yazıçılarının da əsərləri yetərli qədərdir. Bu da dünyagörüşünün genişləndirilməsi üçün əla bir üsuldur. Ümid edirəm ki, belə tədbirlər daha çox keçiriləcək və oxucuları cəlb edəcək.
Ə.ƏLİYEV
XQ
.jpg)
