Xəbər verildiyi kimi, aprelin 1-dən 3-dək Azərbaycanda Belarus Mədəniyyəti Günləri keçirilir. Bu çərçivədə bir sıra maraqlı görüşlər, kinofilm nümayişi, sərgi və konsertlər təşkil olunub.
Tədbirlərlə bağlı Belarus Respublikasının mədəniyyət naziri Anatoli Markeviçin rəhbərlik etdiyi geniş nümayəndə heyəti ölkəmizdə səfərdədir. Azərbaycan Respublikasının mədəniyyət naziri Adil Kərimli belaruslu həmkarı ilə görüşüb. Ölkələrimiz arasında əlaqələrin müxtəlif sahələrdə uğurla inkişaf etdiyini diqqətə çatdırıb. Bu əlaqələrin mühüm tərkib hissəsi humanitar əməkdaşlıqdır. Nazirlər ölkəmizdə keçirilən növbəti Belarus Mədəniyyəti Günlərini əlaqələrimizin inkişafına mühüm töhfə kimi səciyyələndiriblər. Qeyd olunub ki, hər iki tərəf film sənayesi, kitabxana, musiqi və digər sahələrdə əməkdaşlığın inkişaf etdirilməsində maraqlıdır. Bunun üçün ikitərəfli işçi qrupunun yaradılması əhəmiyyətli olacaq.
Belarus Mədəniyyəti Günləri çərçivəsində Azərbaycan Milli İncəsənət Muzeyi ilə dost ölkənin Milli Rəsm Muzeyi ilə əməkdaşlıq sazişi imzalanıb və Belarus rəssamların gözü ilə” sərgisi açılıb. Burada belaruslu rəssamlar Anton Vırvo, Anna Kononova, Qleb Oçik, Anna Sadovskaya və Vladimir Urodniçin əsərləri sərgilənir. Rəsmlər əsasən mənzərə janrındadır, bununla bərabər, Belarusun nasist işğalçılarından azad edilməsinin 80 illiyinə həsr olunmuş rəngkarlıq əsərləri, maraqla qarşılanıb. Azərbaycan Milli İncəsənət Muzeyinin direktoru, Əməkdar mədəniyyət işçisi Şirin Məlikova Belarus Mədəniyyəti Günlərinin ölkəmizdə keçirilməsini alqışlayaraq, belə bir tədbirin artıq 4-cü dəfədir keçirildiyini xatırladıb.
Heydər Əliyev Sarayının foyesində banner sərgisi olub, Belarus xalq sənətkarlıq nümunələri də təqdim edilib. Nizami Kino Mərkəzində isə Belarus kinosu günlərinin açılışı keçirilib. Əvvəlcə Azərbaycan Respublikasının Kino Agentliyinin direktor səlahiyyətlərini icra edən Orxan Fikrətoğlu çıxış edərək, sözügedən tədbiri mədəniyyət hadisəsi adlandırıb. Onun sözlərinə görə, Azərbaycan filmlərinin də Belarusiyada bu formada təqdimi nəzərdə tutulur. "Belarusfilm" Milli Kinostudiyasının baş direktoru Yuri Aleksey dördgünlük mədəniyyət hadisəsi ilə bağlı təəssüratlarını bölüşüb. Bakı kinosevərləri “Gözləmə vərəqəsi”, “Digər sahildə”, “Kinoçular” komediyasını, “Təkrar zəng”, “İflas” və bir sıra digər filmləri seyr etmək imkanı qazanıblar. Ekran əsərləri tarixi dram, komediya, tammetrajlı və sənədli filmlərdən ibarətdir.
Dünən həmçinin incəsənət ustalarının ifasında Mədəniyyət günlərinin açılışına həsr olunmuş qala-konsert təşkil olunub. Bu gün isə M.F.Axundzadə adına Azərbaycan Milli Kitabxanasında ölkələrimizin mədəniyyət xadimlərinin iştirakı ilə dəyirmi masa təşkil olunacaq. Mədəniyyət həftəsinə “Xilas edilmiş nəhəngin ölkəsi” sənədli filminin nümayişi ilə yekun vurulacaq.
Ə.DOSTƏLİ
XQ