Dünən Azərbaycan Milli İncəsənət Muzeyi və Üzeyr Hacıbəyli adına Bakı Musiqi Akademiyasının təşkilatçılığı ilə görkəmli ədib, alim, pedaqoq, professor Mir Cəlal Paşayevin dahi şairimiz Məhəmməd Füzulinin yaradıcılığına həsr olunmuş “Füzuli sənətkarlığı” kitabının təqdimatı keçirildi.

Musiqi Akademiyasının dillər və ədə­biyyat kafedrasının müdiri, professor Tərlan Quliyev mərasimi giriş sözü ilə açaraq professor Mir Cəlal Paşayevin böyük klassikin irsini dərindən öyrənənlər üçün “Füzuli sənətkarlığı”nın zəngin bir qaynaq olduğunu, bu kitabla ölkəmizdə füzulişünaslığın əsasının qoyulduğunu bildirdi. Əsərin dünən olduğu kimi, bu gün və sabah da füzulişünaslığın guşə daşı olduğunu qeyd edən natiq təqdimat və müzakirənin Məhəmməd Füzulinin 530 illik yubileyi ilə əlaqədar keçirildiyini vurğuladı.

Azərbaycan Milli İncəsənət Muzeyi­nin direktoru sənətşünaslıq üzrə fəlsəfə doktoru, dosent Şirin Məlikova Mir Cəlal Paşayevin bu əsərlə Füzuli yaradıcılı­ğına yüksək fəlsəfi-estetik meyarlarla yanaşdığını bildirdi. O, toplantının Sət­tar Bəhlulzadə salonunda keçirilməsinin təsadüfi olmadığını qeyd edərək dedi ki, onun yaradıcılığına xalçaçılıq və miniatür sənətləri ilə yanaşı, Füzuli poeziyasının da təsirini dönə-dönə söyləmişdi. 

Azərbaycan Respublikası mədəniy­yət nazirinin müavini, Xalq artisti Murad Hüseynov mükəmməl təqdim edilən əsə­rin akademik səciyyəli nəsr olduğunu bil­dirdi. 

Milli Məclisin deputatı Ceyhun Məm­mədov, ADA Universitetinin prorektoru Fariz İsmayılzadə, Bakı Musiqi Akade­miyasının prorektoru, Xalq artisti Yeganə Axundova və musiqi tarixi kafedrasının professoru Zümrüd Dadaşzadə “Füzuli sənətkarlığı” kitabının yenidən nəşr olu­naraq təqdimatının keçirilməsinin ədəbi hadisə olduğunu qeyd etdilər. Mərasi­min davamında Azərbaycan Dövlət Xor Kapellası, Üzeyir Hacıbəyli adına Bakı Musiqi Akademiyasının tələbələri, tar­zən Valeh Rəhimov və kamança ifaçısı, Əməkdar artist Toğrul Əsədullayev mu­ğam ustaları Əməkdar incəsənət xadimi Hacı Aqil Məlikov və Hüseyn Məlikov Fü­zuli poeziyasından qaynaqlanan muğam və mahnılarla iştirakçılara sənət zövqü bəxş etdilər.

Fuad CƏFƏRLİ
XQ