Prezident İlham Əliyevin fevralın 14-də Milli Məclisdə andiçmə mərasimindəki nitqində yeni əsrin əvvəllərindən xalqın dəstəyi ilə ölkəyə rəhbərlik etdiyi illər ərzində həyatımızın bütün sahələrində olduğu kimi, mədəniyyət siyasətinin də uğurları vurğulanıb.
Dünya şöhrətli görkəmli qırğız yazıçısı Çingiz Aytmatov hələ 20 il əvvəl “İlham Əliyev XXI əsrin lider etalonudur”, – dövlət başçımızın yüksək idarəetmə məharətini yüksək dəyərləndirib. Bu baxımdan istər ötən illər, istərsə də 2024-cü il fevralın 7-də növbədənkənar prezident seçkiləri zamanı Azərbaycan xalqının dünyaya nümayiş etdirdiyi birlik və mütəşəkkillik qalib liderə bəslənilən möhkəm inamın canlı təntənəsi oldu.
Təntənəli andiçmə mərasimində indi artıq dövlət idarəetməsində yeni dövrün başlandığını vurğulayan cənab İlham Əliyev Azərbaycanın son illərdə bütövləşmiş birlik nümayiş etdirdiyini, gənclərin yetişdiyi ailələrin sağlam olduğunu, ənənələr, milli dəyərlər üzərində qurulduğunu diqqətə çatdırıb. “Bütövlükdə milli-mənəvi dəyərlərə gəldikdə, bu, bizim cəmiyyətimizin əsasıdır və bu, sarsılmaz varlıqdır, sarsılmaz dəyərdir və bunu sarsılmaz etmək bizim əlimizdədir. Çünki burada hər hansı bir kənar qüvvə öz çirkin niyyətlərinə çatsa, o zaman bizim ciddi problemlərimiz olacaq. Ona görə gənclərimizin milli ruhda tərbiyə edilməsi, ənənəvi dəyərlər əsasında tərbiyə edilməsi, dırnaq-arası mütərəqqi və yad dəyərlərin tamamilə cəmiyyətimizdən silinməsi - bu vəzifə bizim hamımızın qarşısında durur, hər bir ailə qarşısında durur və dövlət qarşısında durur”.
Prezidentin qeyd etdiyi kimi, azərbaycançılıq ideologiyası, milli məfkurə prinsipləri ölkəmizdə çoxdan bərqərar olub. Ulu öndər Heydər Əliyevin bizə qoyduğu dəyərli miraslardan biri də məhz azərbaycançılıq məfkurəsidir. Biz bu meyilləri daha da gücləndiririk. Azərbaycanı Vətən sayan bütün xalqlar burada vahid, mehriban ailə kimi yaşayırlar. Bədxahlarımızın birliyimizi pozmaq cəhdləri baş tutmayıb və heç vaxt da baş tutmayacaq.
Sonra Türk birliyindən danışan dövlət başçısı bildirib ki, bizi haradasa qəbul etmək istəməyənlərə baş əyən deyilik. “Bizim ailəmiz Türk dünyasıdır. Biz özümüzü çox yaxşı hiss edirik. Türk Dövlətləri Təşkilatına üzv olan bütün ölkələrlə qardaşlıq münasibətlərimiz var və bizim siyasətimiz Türk Dövlətləri Təşkilatını gücləndirməkdir. Bu, böyük coğrafiyadır, böyük ərazidir, böyük hərbi gücdür, böyük iqtisadiyyatdır, təbii sərvətlərdir, nəqliyyat yollarıdır, gənc əhalidir, artan əhalidir və bir soydan, kökdən olan xalqlardır. Bundan güclü birlik ola bilərmi? Əlbəttə ki, yox. Biz müştərək səylərlə elə etməliyik ki, Türk Dövlətləri Təşkilatı qlobal arenada önəmli aktora və güc mərkəzinə çevrilsin. Buna biz ancaq birlikdə nail ola bilərik”.
Nitqində İslam Əməkdaşlıq Təşkilatında və Qoşulmama Hərəkatında Azərbaycanın fəal iştirakını diqqətə çatdıran Prezident bu mötəbər beynəlxalq təsisatlarda bizim təşəbbüslərimizin qəbul edilməsinin və dəstəklənməsinin xüsusi məna daşıdığını vurğulayıb.
Nəhayət, Azərbaycan–Ermənistan münasibətlərinə toxunan dövlət başçısı deyib ki, Ermənistanın havadarları daim bu məsələni müzakirə etmək, öz səylərini göstərmək, yəni, yorğanı öz tərəflərinə çəkmək istəyirlər. “Bizə bu məsələdə vasitəçi lazım deyil. Mən bunu demişəm, bu yüksək kürsüdən bir daha demək istəyirəm. Biz öz məsələmizi həll etmişik. Ermənistanla sülh müqaviləsinin imzalanmasının da təşəbbüskarı biz olmuşuq... İndi Ermənistan beynəlxalq hüququn normalarına riayət etmək istəyirsə, bu müqavilə imzalanacaq. İstəmirsə, yenə də bizə qarşı əsassız iddialar irəli sürüləcəksə, bu müqavilə imzalanmayacaq, ancaq Azərbaycan üçün heç nə dəyişməyəcək... Biz öz məsələmizi həll etmişik. Biz bu gün Ağdamdayıq, Füzulidəyik, Laçındayıq, Cəbrayıldayıq, Zəngilandayıq, Qubadlıdayıq, Kəlbəcərdəyik, Şuşadayıq, Hadrutdayıq, Xocalıdayıq, Ağdərədəyik, Əsgərandayıq, Xankəndidəyik! Bu yeni dövr uğurla başlayır. Əminəm ki, uğurla da davam edəcək”.
Bəli, biz fevralın 7-də qarşıdakı dövr ərzində də ölkəmizə mədəniyyət və incəsənətimizin böyük himayədarı İlham Əliyevin rəhbərlik etməsinə hamılıqla səs verdik. Qədirbilən xalqımız onun firavan həyatını təmin edən, Qarabağ zəfəri ilə milli qürurunu qaytaran xidmətlərini layiq olduğu səviyyədə, yüksək qiymətləndirdi.
Seçkilərdən sonra Türk Dövlətləri Təşkilatından, Azərbaycan Yazıçılar Birliyi adından və digər yaradıcılıq qurumlarından Prezidentə ünvanlanan təbrik məktublarında da inam ifadə olundu ki, başlanan bu fərqli tərəqqi mərhələsi Azərbaycanda mədəniyyətin daha da inkişafına yeni təkan verəcək. Ölkə ziyalıları müdrik siyasi-dövlətçilik xəttini bundan sonra da əzmlə dəstəkləyəcək, milli-mənəvi dəyərlərin qorunması və təbliği naminə bütün istedad və bacarıqlarını səfərbər edəcəklər.
Əli DOSTƏLİ
XQ