Ötən günlərdə Azərbaycanın Belçikadakı səfirliyinin dəstəyi ilə Brüsselin Kral Parkında yerləşən “Cercle Royal Gaulois” Mədəniyyət Sarayında “Naxışların rəqsi” adlı Azərbaycan rəqəmsal incəsənət sərgisi keçirilib.
Sərgidə bu il Şuşa şəhərinin İslam dünyasının Mədəniyyət Paytaxtı elan olunması ilə əlaqədar “Şuşa” adlı süni zəka tərəfindən Azərbaycanın zəngin və çeşidli mədəni irsinin əsasında yaradılmış rəqəmsal incəsənət əsərləri, xüsusən milli motivləri əks etdirən kəlağayılar nümayiş etdirilib.
Qeyd edək ki, “Şuşa” süni zəka layihəsini Türkiyədə yaşayan soydaşımız Nabat Qaraxanovanın rəhbərliyi ilə “Mezo Art” rəqəmsal incəsənət qrupunun azərbaycanlı və türkiyəli üzvləri hazırlayıblar. Məqsəd mədəniyyət beşiyimiz Şuşanın qədim ənənəvi incəsənətinin innovativ texnologiyalar vasitəsilə canlandırılmasıdır.
Ə.DOSTƏLİ
XQ
