Azərbaycanın ilk inklüziv ƏSA (Əngəlsiz, Sərhədsiz, Azad) Teatrının yaradıcı heyətinin səhnələşdirdiyi “Hamlet” tamaşasının premyerası olub.
Tamaşadan əvvəl qeyd olunub ki, 2021-ci ilin oktyabr ayında Prezident İlham Əliyev, Birinci xanım Mehriban Əliyeva və qızları Leyla Əliyevanın iştirakı ilə açılışı olmuş DOST Mərkəzi əlillərin və digər həssas qrupların yaradıcı potensialının inkişaf etdirilməsində mühüm rol oynayır. Birinci vitse-prezident Mehriban xanım Əliyevanın təşəbbüsü ilə yaradılan mərkəzdə son bir ildə 180-dən çox, 2 illik fəaliyyəti ərzində isə 480-dən çox benefisiar müxtəlif fəaliyyət istiqamətləri üzrə təlimlərə cəlb olunub. Həmçinin burada mütəmadi olaraq inklüziv yaradıcılıq tədbirləri təşkil olunur. Nazirliyin ƏSA Teatrı ilə fəal əməkdaşlığının nəticəsi olaraq hazırlanan bir sıra inklüziv tamaşalarda benefisiarlar da yer alıb. Qurum əlillərin yaradıcı potensialının inkişaf etdirilməsi üzrə “Əlillik qüsur deyil” devizi ilə fəaliyyət göstərir. Uilyam Şekspirin yeni təqdim edilən “Hamlet” tamaşası da bunu bir daha təsdiq edir.
Faciə maraqla izlənib və belə bir qəti əminlik yaradıb ki, fiziki qüsurlu olmaq heç də faciə deyil. Tamaşadan sonra Əmək və əhalinin sosial müdafiəsi naziri Sahil Babayev, mədəniyyət naziri Adil Kərimli, Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Milli Məclisin Əmək və sosial siyasət komitəsinin sədri Musa Quliyev, Ailə, qadın və uşaq məsələləri komitəsinin sədri Hicran Hüseynova, deputat Jalə Əhmədova, Medianın İnkişafı Agentliyinin İcraçı direktoru Əhməd İsmayılov, Mədəniyyət və İncəsənət Universitetinin rektoru Ceyran Mahmudova, Bakı Slavyan Universitetinin rektoru Anar Nağıyev, Xalq artistləri Fəxrəddin Manafov, İlham Namiq Kamal, Firəngiz Mütəllimova və başqaları yaradıcı heyətlə görüşərək, istedadlara yeni-yeni uğurlar arzulayıblar.
Zərifə HÜSEYNOVA
XQ