Füzuli Dövlət Dram Teatrında Sevinc Elsevərin “Həyat elə bir oyun ki...” mono-pyesi əsasında Nicat Mirzənin hazırladığı eyniadlı tamaşanın prem­yerası keçirilib.

Tamaşada əvvəl qonaqlar – Teatr Xadimləri İttifaqının gənclər sektorunun rəhbəri Dağlar Yusif Əfəndi, teatrşü­naslar Vidadi Qafarov, Aliyə Dadaşova, Lənkəran və Qazax Dövlət Dram teatr­larının nümayəndələri Füzuli teatrının heyəti və yaradıcılıq imkanları ilə tanış olublar. 

Sonra 35 ildən bəri teatrda çalışan ali dərəcəli aktrisa, Prezident mükafatçı­sı İntizar Quliyevanın 60 illik yubileyinə həsr olunan benefis-tamaşa oynanı­lıb. Səhnədə cərəyan edən hadisələr, həqiqətən də, həyatın canlı bir oyun ol­duğunu göstərir. Rejissorun yozumu ilə bu oyun fərqli çalarlarda təzahür edir. Baş qəhrəman olan bəxtsiz qadın ta­maşaçıları yaşadığı çətinliklər aləminə aparır. Qadın aktrisa bu dəfə öz həyatını oynayır. Elə buna görə də səhnələr son dərəcə canlı təsir bağışlayır. Özü demiş­kən, əyilməz, mübariz qadınların əksə­riyyətinin taleyi belədir – ömür tərəzisinin bir gözündə sevinc, bir gözündə qəm...

Səhnə əsərinin quruluşçu rejissoru Nicat Mirzə, quruluşçu rəssamı Ellinaz Balaşova, musiqi tərtibatçısı Ziyad Sü­leymanov, rejissor assistenti Gülgəz Soltanovadır. Yaradıcı heyətin çıxışı ta­maşaçıları təsirləndirib, alqışlarla qarşı­lanıb. 

Tamaşadan sonra Xalq artisti Qabil Quliyev, Əməkdar artist Sucəddin Mir­zəyev, əsərin müəllifi Sevinc Elsevər, teatr tənqidçiləri çıxış edərək yeni səh­nə əsərinin məziyyətlərindən danışıblar. Yubilyara diplom və gül dəstələri təqdim olunub.

Qeyd edək ki, “Həyat elə bir oyun ki...” tamaşası 2024-cü ilin ilk rübündə Lənkəran teatrının səhnəsinə dəvət alıb.

XQ