Adına şeirlər, nəğmələr yazılan, Azərbaycan xanımının nəcibliyinə naxış kimi yaraşan kəlağayı heç vaxt itirməyəcəyimiz bir dəyərdir. Bu örtük gözəllik, ismət ləyaqət, ehtiram, sədaqət rəmzi olmaqla yanaşı, qədim tariximizi, mədəniyyətimizi, adət-ənələrimizi özündə qoruyub yaşadır. 2014-cü ildə Birinci vitse-prezident Mehriban Əliyevanın təşəbbüsü ilə UNESCO-nun qeyri maddi-mədəni irs üzrə reprezentativ siyahısına daxil edilmiş kəlağayımız dünya səviyyəsində təqdim olunmuş və tanınmışdır. 

26 noyabr Azərbaycan Kəlağa­yısı Günü münasibətilə Mədəniyyət Nazirliyinin dəstəyi, “Mirvarid Dilba­zi Poeziya Məclisi” İctimai Birliyinin təşkilatçılığı ilə Beynəlxalq Muğam Mərkəzində “Anam kəlağayılı bir mu­ğamıydı” adlı sərgi və konsert keçi­rilib. “Mirvarid Dilbazi Poeziya Məc­lisi” İB-nin sədri, şair-publisist Güllü Eldar Tomarlı “Kəlağayı əlvan qıyqa­cı” layihəsi haqqında danışıb: 

– Bu il Azərbaycan Respublikası Qeyri-Hökumət Təşkilatlarına Dövlət Dəstəyi Agentliyinin qrant müsabiqə­sində “Kəlağayı əlvan qıyqacı” layihə­miz qalib oldu. Layihə çərçivəsində eyniadlı ilk şeirlər kitabı işıq üzü gör­dü. Həmçinin Qazax, Şəki, İsmayıllı və Bakıda kəlağayıya həsr olunmuş ədəbi-bədii gecələr təşkil olundu. İlk dəfə olaraq noyabrın 1-dən 26-dək Azərbaycanın dilbər guşələri olan To­vuz, Qazax, Gəncə, Naftalan, İsmayıllı, Şəki və digər bölgələrdə kəlağayı bay­ramları təntənəli şəkildə qeyd olundu. Bu gün artıq 12-ci konsert proqramımız Beynəlxalq Muğam Mərkəzində təşkil olunur. 

Konsertdə çıxış edən Xətai Rayon İcra Hakimiyyətinin şöbə müdiri Pənah İmanov, Gürcüstanın “Şərəf” ordenli şairi, “Sazın Sözün Butası” təşkilatının sədri Səadət Buta, yazıçı, ədəbiyyat­şünas Turan İbrahimov, “Dədə Ələs­gər Ocağı” İB-nin sədri Xətai Ələsgərli, “Mirvarid Dilbazi Poeziya Məclisi” İB-nin üzvləri və gənc şairlər çıxış edərək, kəlağayı haqqında maraqlı fikirlər səs­ləndirdilər. Xalq artisti Gülyaz Məmmə­dova, Əməkdar artist Nuriyyə Hüsey­nova, “Səma” rəqs qrupu, Azərbaycan Dövlət Mədəniyyət və İncəsənət uni­versitetinin “Xəzər” xor kollektivi, aşıq Rəfiqə Göyçəli və digər sənət adamları bir-birindən maraqlı çıxışlar etdilər. 

Tədbir çərçivəsində Kəlağayı Ev Muzeyinin 200 qədim kəlağayıları, əlil­liyi olan şəxslərin əl işləri, Tarix üzrə fəlsəfə doktoru Gülzarə Abdulovanın milli geyimləri, rəssam Gülnarə Məm­mədovanın və xalçaçı-rəssam Natiq Nəcəfzadənin rəsm əsərləri, rəssam Sehran Allahverdinin “Kəlağayı” kom­pozisiyası, Güllü Eldar Tomarlının toxuduğu əl işləri tədbir iştirakçılarına nümayiş etdirildi. 

Fidan SALMANOVA
XQ