Bəstəkarın şərəfinə XV Beynəlxalq Musiqi Festivalı da başlanıb
18 Sentyabr Üzeyir Musiqi Günündə ölkəmizdə dahi bəstəkarın xatirəsi dərin ehtiramla yad edilib, gün ərzində müxtəlif şənliklər keçirilib. Həmin gün Heydər Əliyev Fondu və Mədəniyyət Nazirliyinin təşkilatçılığı sentyabrın 28-dək davam edəcək Üzeyir Hacıbəyli XV Beynəlxalq Musiqi Festivalı da start götürüb.
Bu il 18 sentyabr adını Azərbaycanın musiqi mədəniyyəti salnaməsinə qızıl hərflərlə yazdırmış Üzeyir Hacıbəylinin anadan olmasının 138-ci ildönümüdür. Mədəniyyət tariximizin bu əlamətdar gününün tədbirlər silsiləsi ənənəvi olaraq I Fəxri xiyabanda Üzeyir bəyin məzarının ziyarət olunması ilə başlanıb. Mərasimdə mədəniyyət naziri Adil Kərimli, nazirliyin məsul əməkdaşları, tanınmış mədəniyyət və incəsənət xadimləri iştirak ediblər.
Nazir mərasimə toplaşanları Milli Musiqi Günü münasibətilə təbrik edərək bildirib ki, 18 sentyabr mədəniyyətimizin ən əlamətdar günlərindən biridir: “Bu gün dahi bəstəkar Üzeyir Hacıbəylinin doğum günüdür. 18 sentyabr müstəqillik illərində böyük musiqi xadiminin şərəfinə ölkəmizdə Üzeyir Musiqi Günü kimi qeyd olunur. Milli musiqi bayramı sayılan bu gün Üzeyir Hacıbəylinin anadan olmasının 110 illiyi münasibətilə Prezident Heydər Əliyevin 1995-ci il 18 sentyabr tarixli fərmanı ilə təsis edilib. Bununla bağlı ölkəmizdə hər il silsilə tədbirlər keçirilir, bəstəkarın mədəniyyətimiz qarşısında misilsiz xidmətləri yada salınır. 2009-cu ildən Heydər Əliyev Fondu və Mədəniyyət Nazirliyinin təşkilatçılığı ilə dahi bəstəkarın adı ilə şərəflənən ənənəvi beynəlxalq musiqi festivalı da keçirilir. Bu gün artıq 15-ci festifal başlanır. Festival çərçivəsində müxtəlif tədbirlər təşkil ediləcək, bir sıra ölkələrdən ifaçı və kollektivlər çıxış edəcək”.
Azərbaycan Bəstəkarlar İttifaqının sədri, Xalq artisti Firəngiz Əlizadə dahi bəstəkarın musiqi tariximizdəki rolunu belə dəyərləndirib: “Nə qədər ki, Azərbaycan xalqı var, dahi bəstəkarın ölməz irsi hər zaman yaşayacaq”.
Sonra mərasim iştirakçıları I Fəxri xiyabanda uyuyan Azərbaycan musiqisinin korifeylərindən Qara Qarayev, Fikrət Əmirov, Bülbül, Rəşid Behbudov, Niyazi və Müslüm Maqomayevin də məzarlarını ziyarət ediblər.
Mərasim iştirakçıları, həmçinin Ümummilli lider, mədəniyyətimizin böyük hamisi Heydər Əliyevin və görkəmli oftalmoloq-alim, akademik Zərifə xanım Əliyevanın xatirəsini də ehtiramla anaraq məzarları üzərinə tər çiçək dəstələri düzüblər.
Üzeyir Musiqi Günü şənlikləri ənənəvi olaraq Azərbaycan Milli Konservatoriyasından başlanıb. Əvvəlcə rektor, Xalq artisti Siyavuş Kərimi çıxış edərək Üzeyir Hacıbəylinin adı ilə bağlı olan Milli Musiqi Gününün önəmindən, dahi bəstəkarın yaradıcılığından, Azərbaycan musiqisinin inkişafında xidmətlərindən danışıb: “Fikrimcə, dünyada ən yaxşı 5 musiqi mədəniyyəti varsa, onlardan biri Azərbaycan xalqına məxsusdur. Musiqimiz səsləndirildiyi hər bir ölkədə böyük maraqla qarşılanır. Bu musiqini professional səviyyəyə məz böyük Üzeyir bəy yüksəldib”.
Mədəniyyət nazirinin müavini Murad Hüseynov Üzeyir Hacıbəylinin doğum günü şərəfinə təsis olunan Milli Musiqi Gününün hər il təntənə ilə qeyd olunduğunu bildirib, bayram münasibətilə musiqisevərləri təbrik edib.
Şənlik musiqi proqramı ilə davam edib. Azərbaycan Milli Konservatoriyasının tələbələrindən ibarət “Buta” xalq çalğı alətləri orkestri (bədii rəhbər və dirijor Aysel Bağırova) tərəfindən Üzeyir Hacıbəylinin “Leyli və Məcnun” operasından “Müqəddimə” təqdim edilib. Orkestrin müşayiəti ilə Əməkdar artist Təyyar Bayramov, xanəndələr Arzu Əliyeva və Aytən Məhərrəmovanın ifasında “Qarabağ şikəstəsi” səsləndirilib.
***
Üzeyir Hacıbəyli adına Bakı Musiqi Akademiyasında da bəstəkarın xatirəsi ehtiramla anılıb, şərəfinə konsert proqramı səsləndirilib.
Akademiyanın rektoru, Xalq artisti Fərhad Bədəlbəyli dahi Üzeyir bəyin mədəniyyət tarixindəki rolundan danışıb, onun Azərbaycan musiqi mədəniyyəti tarixində yeni yol açdığını, milli bəstəkarlıq məktəbinin özülünü qoyduğunu vurğulayıb: “Azərbaycanın zəngin musiqi mədəniyyəti var. Biz də Üzeyir bəyin ənənələrinə sadiq qalaraq musiqi irsimizi yaşatmalı və inkişaf etdirməliyik”.
Sonra Müdafiə Nazirliyinin Nümunəvi və Əlahiddə Hərbi Orkestrinin və Azərbaycan Dövlət Xor Kapellasının ifasında klassik musiqi nümunələri təqdim olunub. Əməkdar artist Xəyyam Mustafazadə, solistlər Aynur İsgəndərli, Kənan Qədimov və başqa sənətçilərin ifasında Ü.Hacıbəylinin “Koroğlu” operasından “Uvertüra” və “Rəqs”, “Ey Vətən”, M.Maqomayevin “Odlar yurdu”, F.Bədəlbəylinin “Anamız Azərbaycan”, R.Axundzadənin “Qələbə marşı” əsərləri və “Heyratı” zərb muğamı səsləndirilib.
***
Silsilə tədbirlər Rəşid Behbudov adına Azərbaycan Dövlət Mahnı Teatrının qarşısında, Üzeyir Hacıbəyovun Ev Muzeyində və “Fəvvarələr” meydanında davam etdirilib.
Yağışlı-yağmurlu payızın sərin nəfəsi duyulsa da, açıq havada keçirilən tədbirlərə minlərlə tamaşaçı toplaşıb. Üzeyir musiqisinə olan maraq və sevgi insanların Azərbaycanın incəsənətinə doğma münasibətini əks etdirib. Şənliklərin iştirakçıları beynəlxalq festival tədbirlərinə də qatılmaq arzusunda olduqlarını bildiriblər.
Göründüyü kimi, dahi bəstəkarın sənət yolu bu gün də uğurla davam etdirilir. Onun banisi olduğu bəstəkarlıq məktəbi yetirmələrinin sayəsində milli musiqimizin dünyada şöhrəti daha da artıb. Azərbaycan sənətçilərinin nüfuzlu beynəlxalq festival və müsabiqələrdə qazandıqları mükafatlar bunu bir daha təsdiq edir.
***
Dünən dahi bəstəkarın şərəfinə Azərbaycanda Üzeyir Hacıbəyli XV Beynəlxalq Musiqi Festivalı da başlayıb.
Xatırladaq ki, Mədəniyyət Nazirliyi beynəlxalq festivalın saytını (https://uhf.culture.az) hazırlayaraq istifadəyə verib. Musiqisevərlər sayt vasitəsilə musiqi bayramının tarixi, festivalın proqramı, Üzeyir Hacıbəylinin həyat və yaradıcılığı haqqında ətraflı məlumat ala bilərlər. Qeyd edək ki, festival günlərində Bakı ilə yanaşı, Gəncə və Şəmkirdə də ABŞ, Fransa, Gürcüstan, Xorvatiya, Rusiya, Almaniya, Sinqapur və digər ölkələrdən musiqiçilərin iştirakı ilə maraqlı konsertlər, ustad dərsləri və s. təşkil olunacaq.
Dünən axşam Üzeyir Hacıbəyli XV Beynəlxalq Musiqi Festivalı çərçivəsində Heydər Əliyev Sarayının səhnəsində Arif Məlikovun “Məhəbbət əfsanəsi” baleti nümayiş olunub.
İlk azərbaycanlı musiqişünas-alim, böyük bəstəkar və ictimai xadim olan Üzeyir Hacıbəyliyə bir çox ilklər mənsubdur. O, Azərbaycan musiqi tarixində ilk operanı yazıb, ilk musiqili komediya və bir sıra digər janrlarda ilk nümunələrin yaradıcısı olub. Azərbaycan musiqisinin dərinliklərini və istiqamətlərini araşdıraraq əsaslandırıb. Üzeyir Musiqi günü və XV Beynəlxalq Musiqi Festivalı çərçivəsində keçirilən rəngarəng tədbirlərdən də görünür ki, dünya durduqca bu böyük azərbaycanlının sənəti yaşayacaq, öz xalqına mənəvi zənginlik və şöhrət gətirəcək.
***
Azərbaycan musiqişünaslığında özünəməxsus yeri olan dahi bəstəkar Üzeyir Hacıbəylinin xatirəsi Avstriyada da anılıb.
Üzeyir Musiqi Günü münasibətilə ölkəmizin Avstriyadakı səfirliyinin və Mədəniyyət Mərkəzinin təmsilçiləri dahi Azərbaycan bəstəkarının Vyanada ucaldılmış abidəsini ziyarət ediblər. Vyanadakı Dunay Parkında yerləşən abidə önünə gül dəstələri qoyulub.
Qeyd edək ki, Vyanadakı Dunay Parkında Üzeyir Hacibəylinin abidəsi 2006-cı ildə ucaldılıb. Şəhərin əsas istirahət məkanlarından biri olan bu parkda dahi bəstəkarın abidəsinin müəllifi görkəmli heykəltəraş Ömər Eldarovdur.
Ramilə QURBANLI,
Fidan HÜQUQQIZI,
Elşən AĞALAROV (foto)
XQ