Soydaşlarımızın “ÖST Ensemb­le” ansamblı 2020-ci ildən Avst­riyada fəaliyyət göstərir. Rəhbəri bəstəkar, musiqi nəzəriyyəçisi və etnomusiqişünas Aria Torkanbouri­dir. Ansamblın Vyanada ilk konsert proqramı maraqla qarşılanıb. 

Vyana Musiqi və Səhnə Sənətləri Universitetində reallaşan konsertdə an­sambl “Arzu Balıq” dastanını təqdim edib. Bu dastan görkəmli təbrizli yazı­çı, tanınmış tərcüməçi-publisist Səməd Behrənginin “Balaca Qara Balıq” nağılı əsasında Aria Torkanbouri tərəfindən yazılıb. Performans başdan-başa Azər­baycan–Türk aşıq dastan ənənəsi əsa­sında qurulub.

“Səhnə” teatrı Laçında “Sarı Aşı­ğın dastanı” tamaşasının premyera­sını təqdim edib. 

Tamaşanın prodüseri Elçin Hacı bildirib ki, Xaqani Əliyevin “Yaxşı və Aşıq” dastanının motivlərindən istifadə etməklə qələmə aldığı pyes əsasın­da hazırlanmış tamaşanın quruluşçu rejissoru Elvin Mirzəyev, xoreoqrafı Zaur Əliyevdir. Tamaşa Azərbaycanda bayatı janrının poetik imkanlarının açıl­masında misilsiz xidmətləri olmuş, XVII əsrdə Laçının Güləbird kəndində yaşa­mış şair Sarı Aşığın nakam məhəbbə­tindən bəhs edir.

Füzuli Dövlət Dram Teatrı 33-cü mövsümünü Xaqani Əliyevin "Molla Nəsrəddin" tamaşası ilə başa vurub.

Səhnə əsərinin quruluşçu rejissoru Nicat Mirzəzadə, quruluşçu rəssamı Ellinaz Balaşova, musiqi tərtibatçısı Zi­yad Süleymanzadədir.

Tamaşada rolları Sehran Xanlarov, İntizar Quliyeva, Asif Şirinov, Şəlalə Nəsirova, Qaçaq Qarayev, Əli Hüsey­nov, Günel Hacıyeva, Elçin Məmmə­dov, Vüqar Babayev, Emin Abışov, Vüsal Həsənov, Aygün Cəfərova və Qəlbinur Əhmədli ifa ediblər. Keçmişlə bu günün sintezi olan tamaşa məşhur lətifə qəhrəmanı Molla Nəsrəddinin evlənmə əhvalatından bəhs edir. Şən musiqilər və kütləvi rəqslərlə bol olan səhnə əsərində maraqlı və gülməli ha­disələr bir-birini əvəz edir.

Ə.DOSTƏLİ, “Xalq qəzeti”