Azərbaycanın paraatletika üzrə komandası Parisdə keçirilən dünya çempionatında 2 qızıl, 1 bürünc medal və növbəti Yay Paralimpiya Oyunlarına 5 vəsiqə qazanmaqla mükəmməl nəticə göstərdi. 

Qəhrəman paralimpiyaçılarımız bununla, həm dünya çempionatında güclərini nümayiş etdirdilər, həm də Paris Paralimpiadasında medala ən iddialı idmançılardan olduqlarını sübut etdilər. 

“Xalq qəzeti”nə müsahibəsində dünya çempionatında yığmamızın uğurla çıxış etdiyini bildirən Azərbay­can Milli Paralimpiya Komitəsinin pre­zidentinin köməkçisi, idman şöbəsinin müdiri Kamal Məmmədov komanda­nın yaxşı formada olduğunu bildirdi: “Dünya çempionatına yaxşı hazırlaş­mışdıq. Komanda üzvlərinin bir neçəsi yarışda ilk dəfə çıxış edirdi ki, onlar­dan 2-si Qarabağ qazisi idi. Qarabağ qazilərindən biri – görmə qabiliyyətini tam itirmiş Məhərrəm Qasımov 5-ci yerlə kifayətləndi. Digər idmançımız Rüfət Rəfiyev də 5-ci nəticə göstərdi. İlk 4-lüyə lisenziya düşürdü. Onların 5-ci yeri tutmaları o deməkdir ki, növ­bəti yarışda lisenziya qazana bilərlər. Oloxan Musayev və Orxan Aslanov medalsız qalsalar da, lisenziya qaza­na bildilər. Komandamız yaxşı forma­dadır və qarşıdakı yarışlarda onlardan daha yüksək nəticələr gözləyirik”. 

K.Məmmədov hazırda bütün id­man növləri üzrə dünya çempionatla­rına start verildiyini, yığmamızın hazır­da Çexiyada oxatma idman növü üzrə mundialda iştirak etdiyini bildirdi: “Bəzi idman növləri üzrə dünya çempionat­ları birbaşa lisenziya verirsə, digərləri reytinq xalları qazandırır. Çexiyadakı yarışda idmançılarımız Paris Para­limpiadasına birbaşa vəsiqə əldə edə bilərlər. Cüdo, taekvondo, boççia kimi idman növlərində reytinq xalları verilir. Son yarışlardan – növbəti ilin may ayından sonra reytinq xalları hesablanacaq. Əsas hə­dəf “Paris-2024”ə vəsiqə əldə edib, ölkəmizi həmin yarışda yüksək səviyyədə təmsil etmək­dir. “Tokio-2020”də 14 qızıl medal qazanan komandamız medalla­rın əyarına görə, ilk 10-ğa daxil oldu. Paris Paralimpiadasında rəqabət nə qədər böyük olsa da, biz buna hazırlaşırıq. Düşünürük ki, ən azı Tokioda qazandığımız nailiyyəti “Paris-2024”də təkrar­lamağa çalışacağıq”. 

Dünya çempionatında 100 və 400 məsafələrə qaçışda rəqib tanımayıb fəxri kürsünün ən yüksək pilləsində qərarlaşan Lamiyə Vəliyeva yarışa yaxşı hazırlaşdığını vurğuladı: “Dünya çempionatında ən güclülər çıxış edir. Yarışa yüksək səviyyədə hazırlaş­dığım üçün özümə inanırdım. Bütün gücümdən istifadə edib qızıl medal qazandım. Vətənimi belə bir nüfuzlu yarışda layiqincə təmsil etdiyimə görə çox sevinirəm. Özümlə fəxr edirəm”. 

İdmançı yaxşı formada qalmaq və yüksək nəticə qazanmaq üçün hər gün məşq etdiyini dedi. O bildirdi ki, əsas hədəf Paris Yay Paralimpiya Oyunla­rıdır: “Arzum Paris Paralimpiadasında Azərbaycanı layiqincə təmsil etməkdir. Bu mənim borcumdur. Paralimpiya Oyunlarında rəqabət çox güclü olur. Hər gün məşq edirəm və hər saat mə­nim üçün çox vacibdir. Bütün yarışlar­da sübut etmək istəyirəm ki, millətimiz həmişə ön sırada olmalıdır”. 

Vurğulayaq ki, Lamiyə Vəliyeva 400 metr məsafəyə qaçışda Tokio Yay Paralimpiya Oyunlarının qızıl, 100 metr məsafə üzrə isə gümüş medalını qazanıb. 

Fransadakı dünya çempionatında uzunluğa tullanma növündə bürünc medal alan Səid Nəcəfzadə Paralim­piya Oyunlarına lisenziya əldə etdi­yi üçün məmnun olduğunu söylədi: “Dünya çempionatı güclü yarışdır və rəqabət həmişə gərgin olur. İlk dəfə idi ki, özümü belə bir yarışda sına­dım. Bürünc medal qazandım. Əsas məqsədim isə Paris Paralimpiadasına lisenziya əldə etmək idi. Öz üzərimdə çalışmaqda davam edəcəyəm. Para­limpiadada daha yaxşı nəticə göstər­mək üçün bütün gücümdən istifadə edəcəyəm”.

Komandamızın digər üzvləri Oloxan Musayev və Orxan Aslanov dünya çempionatında 4-cü olmaqla Yay Paralimpiya Oyunlarına lisenziya qazanıblar. O.Musayev qəzetimizə açıqlamasında qeyd etdi ki, mükafat­çılar sırasında yer almaq üçün poten­sialı olsa da, bir qədər aşağı nəticə göstərib: “Dünya çempionatında 11.74 metr nəticə ilə 4-cü oldum. Əvvəlkilər­lə müqayisədə 30-40 santimetr daha az göstərici qeydə alındı. Nəticəmi 15 santimetr yaxşılaşdıra bilsəydim, azı üçüncü yeri tuta bilərdim. Amma Paris Paralimpiadasına vəsiqə əldə etdiyim üçün çox sevinirəm. İndi əsas məqsəd Paralimpiadada ölkəmizi yüksək sə­viyyədə təmsil etməkdir”. 

Xatırladaq ki, XVI Yay Paralimpiya Oyunlarında Azərbaycan komandası tarixi uğur qazanaraq 14 qızıl, 1 gümüş və 4 bürünc olmaqla 19 medala sahib olmuşdu. Komandamız medalların əyarına görə 162 dövlət arasında 10-cu yeri tutdu. Avropada 6-cı, postsovet dövlətləri arasında 3-cü, İslam ölkələri arasında isə birinci pillədə qərarlaşıb. 

2024-cü ildə Parisdə keçiriləcək növbəti Yay Paralimpiya Oyunların­da paralimpiyaçılarımızı yeni zəfərlər gözləyir. Komandamızın nüfuzlu ya­rışlarda qazandıqları parlaq qələbələr yeni uğurlar üçün əsas yaradır. 

Leyla QURBANOVA, “Xalq qəzeti”