Cari mövsüm Sumqayıt Dövlət Dram Teatrının yaradıcı heyəti üçün 55 illik yubiley tədbirləri ilə əlamətdar olub. Mart ayında M.F.Axundzadənin "Müsyö Jordan və dərviş Məstəli şah" tamaşası ilə qeyd edilən yekun yubiley tədbiri yaddaqalan olub. Xatırladaq ki, ilk dəfə teatrın pərdələri açılan zaman da səhnədə həmin əsər oynanılıb.

Zəngin bir yol keçmiş Sumqayıt te­atrının güclü potensiala malik truppası ayrı-ayrı illərdə beynəlxalq festivallardan mükafatla qayıdıb. Azərbaycan və dünya dramaturqlarının yüzlərlə pyesi bu teatrın səhnəsindən tamaşaçılara çatdırılıb və onların bədii-estetik zövqünün formalaş­masına xidmət edib. 

Sumqayıtın teatrı sayca 54-cü olan cari mövsümünü də məhsuldar proqramla sona çatdırır. Təkcə son 2 həftədə yara­dıcı heyət həm doğma teatrda, həm də Bakıda və Lənkəranda sənətsevərlər qar­şısında hesabat verib.

Teatrın direktor əvəzi, Əməkdar artist Vidadi Məmmədov bu barədə danışmaz­dan əvvəl kollektivin beynəlxalq əlaqələ­rindən bəhs edərək dedi ki, ölkəmizin Özbəkistanla mədəniyyət sahəsində əməkdaşlığı çərçivəsində iyunun 30-da Səmərqənd teatrı ilə Sumqayıt teatrı ara­sında əməkdaşlığın gücləndirilməsi, təc­rübə mübadiləsinin artırılması məqsədilə Memorandum imzalanıb. Özbəkistanın incəsənət xadimləri Sumqayıt teatrının inzibati binası, qrim otaqları, texniki təchi­zat otaqları ilə tanış olublar və yaradıcılıq planları, gələcək əməkdaşlıq imkanları barədə müzakirələr aparılıb.

– Ondan bir neçə gün sonra Azər­baycan Teatr Xadimləri İttifaqının (ATXİ) Mədəniyyət Nazirliyinin dəstəyi ilə reallaş­dırdığı “Qonaq teatr” layihəsinə qoşulduq, – deyə Vidadi müəllim davam etdi. – Bu çərçivədə Aktyor evində repertuarlarımı­zın baxımlı nümunələrdən birini – Türkiyə yazıçısı Turqut Özakmanın eyniadlı əsəri əsasında hazırlanan “Ocaq” tamaşasını təqdim etdik. Qeyd edim ki, əsas etibarilə bölgə teatrlarını paytaxt teatrsevərləri ilə görüşdürüb, onların yaradıcılığını geniş auditoriya önünə çıxaran layihə Azərbay­can peşəkar milli teatrının yaranmasının 150 illiyinə həsr olunan gözəl təşəbbüs­dür. 

Teatrımızın baş rejissoru, Xalq artis­ti Firudin Məhərrəmovun quruluş verdiyi birhissəli səhnə əsərində rolları Əməkdar artistlər Növrəstə Həşimova, Xatirə Süley­manova, Rauf Ağakişiyev, Cəlal Məmmə­dov, aktyorlar Habil Xanlarov, Şəmistan Süleymanlı və Şəhla Məmmədova oyna­dılar. Tamaşanın sonunda teatrımız və baş rejissorumuz Teatr Xadimləri İttifaqı­nın fəxri fərmanı ilə təltif olundu. 

Teatrın yaradıcı heyəti iyulun 7-də öz səhnəsində məşhur komediya ilə çıxış edib. Üzeyir Hacıbəylinin "O olmasın, bu olsun" liberettosu Əməkdar artist Namis Şirməmmədovun quruluşunda maraqlı səhnə taleyi yaşayıb.

Bu günlərdə isə Lənkəran Dövlət Dram Teatrının səhnəsində sumqayıtlı sənətçilərin təqdimatında Əziz Nesinin "Öldür məni, canciyər" komediyası oyna­nılıb. Rejissor Xalq artisti Firudin Məhər­rəmovun quruluşunda tamaşa uğurla ke­çib. Obrazları Əməkdar artistlər Növrəstə Həşimova, İlahə Səfərova, aktyor Mətləb Səfərli canlandırıblar. 

Sumqayıt teatrında mövsüm bağla­nışı iyulun 16-da Hafiz Ataxanlının "Xə­zinə" pritçası ilə reallaşacaq. Əsər dahi mütəfəkkir Nizami Gəncəvinin bəşəri ide­yalarının konsepsiyasını ehtiva edir. Beş poemanın əsas obrazlarının cəm olduğu pritçada insan və onun kamilliyi, zəkanın qüdrəti mesaj kimi verilir. Tamaşada klas­sik yönlərlə avanqard teatr elementləri vəhdət təşkil edir.

Onu da qeyd edək ki, cari mövsümü­nü başa vurmağa hazırlaşan teatrda daha iki tamaşanın istehsalat prosesi tamamla­nıb. Növbəti mövsümdə təqdim olunacaq həmin səhnə əsərlərindən biri Xalq artisti Firudin Məhərrəmovun quruluşunda Ge­orgi Xuqayevin “Varlı ev” faciəsi, digəri isə gənc rejissor Telman Musayevin qurulu­şunda Ejen İoneskonun “Daz müğənni” absurd pyesinin tamaşasıdır. 

Əli NƏCƏFXANLI, “Xalq qəzeti”