Azərbaycan Dövlət “Yuğ” Teatrında mövsümə “Mənəm, mən” tamaşası ilə yekun vurulub.
Teatrdan verilən xəbərə görə, tamaşa İlqar Fəhminin əsəri əsasında, Əməkdar incəsənət xadimi Mehriban Ələkbərzadənin quruluşunda hazırlanıb.
Mistik-psixoloji dram janrlı səhnə əsərində Xalq artisti Məmmədsəfa Qasımov, Əməkdar artist Qasım Nağı, aktyorlar Ziya Ağa, Əbdülqəni Əliyev, Amid Qasımov, Vüqar Hacıyev, Elgün Həmidov və Elşən Əsgərov çıxış ediblər.
***
“Qobustan” dərgisinin baş redaktoru, yazıçı-dramaturq Pərvin Nurəliyeva “Camphood” yay məktəbinin şagirdləri ilə görüşüb.
Müxtəlif yaş qruplarından olan uşaq və yeniyetmələr üçün təşkil edilmiş yay məktəbinin əsas məqsədi məktəblilərin tətil boyunca yeni bilik və bacarıqları əylənərək öyrənməsi, əldə etməsidir. Belə ki, ən müxtəlif mütəxəssis və məşqçilər yay düşərgəsində uşaqlarla maarifləndirici, öyrədici söhbətlər aparır, polemikalar üçün mövzular tapırlar.
Pərvin Nurəliyeva uşaqlara kitabların insanın özünüinkişafında rolundan söz açıb. Balacalar oxuduqları yaddaqalan əsərlər haqda fikirlərini bölüşüblər. Həmçinin onlarla uşaq pyesinin müəllifi kimi, balacaların sifarişləri də yazıçı üçün maraqlı olub. Uşaqlar hansı mövzularda əsərlər, tamaşalar, filmlər gözlədikləri haqda düşüncələrini bölüşüblər. Həmçinin balaca istedadlar öz yazdıqları mətnlərdən, şeirlərdən bəhs edib, yazıçı ilə birgə kiçik süjetlər qurublar. Sonda Pərvin Nurəliyeva Azərbaycan və rus dillərində kitablarını və “Qobustan” toplusunun son saylarını uşaqlara hədiyyə edib və iştirakçılarla xatirə fotoları çəkdirib.
***
Sumqayıt Şəhər İcra Hakimiyyəti başçısının müavini Fərid Ələkbərovun rəhbərlik etdiyi nümayəndə heyəti Belarus Respublikasının Mogilyov şəhərində səfərdə olub.
Fərid Ələkbərov Mogilyov şəhərinin yaranmasının 756-cı ildönümü ilə bağlı keçirilən “şəhər günü” tədbirlərində iştirak edib. Mogilyov şəhərinin meri ilə görüşdə Sumqayıt ictimaiyyəti adından hədiyyələr təqdim olunub.
Qeyd edək ki, Sumqayıt şəhəri 14 il bundan öncə Mogilyov şəhəri ilə qardaşlaşıb.