“Ulu öndər Heydər Əliyevin irsinə həsr olunmuş kitabların nəşri” beynəlxalq layihəsi çərçivəsində işıq üzü görmüş “Heydər Əliyevin həyatının 100 anı” kitabı (100 moments of Heydar Aliyevs life) iyulun 12-də İstanbulda, sonra isə Paris və Cenevrə şəhərlərində geniş ictimaiyyətə təqdim olunacaq.
Qeyd edək ki, ümumilikdə, 553 səhifədən ibarət olan “Heydər Əliyevin həyatının 100 anı” kitabı Azərbaycanın xilaskar oğlunu ümummilli lider zirvəsinə ucaldan real işlərini, gərgin əməyini, yüksək insani keyfiyyətlərini, Vətəninə və xalqına bağlılığını özündə ehtiva edir.
Azərbaycan və ingilis dillərində hazırlanaraq nadir üslubda nəfis tərtib olunan rəngli nəşrin əvvəlində Azərbaycanda 2023-cü ilin “Heydər Əliyev İli” elan edilməsi haqqında Prezident Sərəncamının mətni iki dildə yerləşdirilib. Mündəricat, ön söz, giriş və ədəbiyyat bölmələrindən ibarət nəşrdəki məqalələr və nadir fotolar ümummilli liderin xalq, Vətən, ölkə və dövlət qarşısındakı misilsiz xidmətlərini tərənnüm edir. Nəşrdəki materiallar ulu öndərin bəşəri prinsipləri barədə oxucuda real fikir formalaşdırır.
“Xalq qəzeti”