Abdulla Şaiq adına Azərbaycan Dövlət Kukla Teatrı Azərbaycan uşaq ədəbiyyatının banisi, şair, yazıçı Abdulla Şaiqin ilk uşaq dram nümunəsi sayılan “Gözəl Bahar” pyesinin motivləri əsasında hazırlanan “Bahar“ tamaşasını yenidən uşaqların ixtiyarına verib.

Tamaşadan əvvəl teatr heyətini və azyaşlı tamaşçıları salamlayan teatrın direktoru Rəşad Əhmədzadə istər Azərbaycan Dövlət Kukla Teatrı, istərsə də teatrın nəzdində fəaliyyət göstərən “Oyuq” və “Küllücə” te­atr-studiyalarında hər zaman bu cür tamaşalar hazırlandığını deyib. 

“UAFA - United Aid for Azerbaijan (Azərbaycanda Birgə Yardım Təş­kilatı)nın təsisçisi Zəhra Xələfova xeyriyyə təşkilatı olaraq əlil və xüsusi qayğıya ehtiyacı olan uşaqların və aztəminatlı ailələrin övladlarının te­atrla təmasda olmasının onların sosi­allaşmasında və cəmiyyətə inteqrasi­ya olmasında mühüm amil olduğunu qeyd edib:

“Burada şəhid və qazilərimizin öv­ladları da çıxış edir. Onların arasında xüsusi qayğıya ehtiyacı olan balalar da var. Bu da onlara ikiqat dəstək ol­maq deməkdir”. 

O, həmçinin bahar bayramı mü­nasibətilə kukla teatrına “Bahar” adlı kiçik rəsm əsərini də hədiyyə edib. 

“Əngəlləri səhnədən aşaq...” şüarı ilə yaradıcı heyət bu dəfə teat­rın nəzdindəki azyaşlı aktyorlardan ibarət “Oyuq” və “Küllücə” teatr-stu­diyalarını bir səhnədə toplayıb.

Uşaqlara təbiəti, fəsilləri, insan­lara sevməyi aşılayan, onları ətraf mühitin qorunmasına səsləyən bir­hissəli musiqili uşaq tamaşasında qış fəslinin yaz fəsli ilə mübarizəsin­dən söhbət açılır. Qış öz sərt üzü­nü göstərərək müxtəlif bəhanələrlə baharın gəlişinə mane olmağa ça­lışır. Lakin sonda qış bahara yenilir. Torpaq yenidən canlanır, günəşin şəfəqləri hər yana yayılaraq işıq sa­çır. 

“Bahar” adlı bu mənzum nağıl-ta­maşanın quruluşçu rejissoru Səidə Haqverdiyeva, bəstəkarları Vüqar Camalzadə və Röya Hüseynova, qu­ruluşçu rəssamı İqbal Əliyev, xoreoq­rafı Günay Əhməddir. 

İnklüziv tamaşada həvəskar aktyorlarla yanaşı, əlilliyi olan uşaq­lar və autizm sindromlu azyaşlılar da rol alır. Xeyriyyə aksiyasının sonunda uşaqlara hədiyyələr də paylanılıb. 

Qeyd edək ki, tamaşa, Azərbay­can Respublikası Mədəniyyət Nazir­liyi, Azərbaycan Respublikası Əmək və Əhalinin Sosial Müdafiəsi Nazirliyi və Abdulla Şaiq adına Azərbaycan Dövlət Kukla Teatrının birgə layihəsi əsasında hazırlanıb.

Fidan HÜQUQQIZI, “Xalq qəzeti”