Konstantin Fahlberg kömür qətranını öyrənirmiş. Bir dəfə görüb ki, nədənsə, çörək ona çox şirin gəlir. Laboratoriyaya qayıdıb hər şeyi daddıqdan sonra şirin dadın mənbəyini tapıb. Bu təsadüfən kəşf etdiyi saxarin olub. 1884-cü ildə Fahlberq saxarini patentləşdirib və onun kütləvi istehsalına başlayıb.
Əlbəttə, bu cür şəkər əvəzləyiciləri xeyli qənaətlidir və kalori miqdarı olduqca azdır. Amma şəkərdən 200 dəfə şirindir. Bu fakt bizi ondan müntəzəm istifadəyə təhrik edə bilər. Lakin bilməliyik ki, onu kor-koranə işlətmək qətiyyən yolverilməzdir. Daha aydın desək, təbii şəkərlə qidalandıqda insan orqanizmində lazımi miqdarda kalori qəbul etdikdən sonra təbii olaraq doyma prosesi baş verir. Lakin süni şəkər qəbul etdikdə orqanizmdəki bu təbii proses pozulur və insanda doymaq hissi yaranmır. Nəticə etibarı ilə doymaq hissini qarşılayacaq deyə artıq saxarin qəbul edilir, çəki artır.
Həmçinin şəkər əvəzedicilərindən uzunmüddətli istifadə baş ağrısı, qulaqlarda səs, depressiya, allergiya və s. xəstəliklər əmələ gətirir.
P.ƏFƏNDİ, “Xalq qəzeti”