Qafqaz Müsəlmanları İdarəsinin sədri şeyxülislam Allahşükür Paşazadə Moskvada “Sülh yolu: dialoq ahəngdar birgəyaşayışın əsası kimi” mövzusunda keçirilən XX Beynəlxalq Müsəlman Forumunda iştirak edib.
Şeyxülislam tədbirdə çıxış edərək deyib: “Rusiyadakı müsəlmanlarla mənəvi əlaqələrimiz həmişə yüksək səviyyədə olub, biz qardaş Tatarıstanın və Rusiya Federasiyasının digər subyektlərinin dini liderləri ilə davamlı əlaqə saxlayırıq. Mərkəzi Asiya dövlətlərinin müsəlmanları ilə mənəvi əlaqələrimiz də buna nümunə ola bilər”.
A.Paşazadə qeyd edib ki, QMİ Rus Pravoslav Kilsəsi ilə ənənəvi dostluq, qarşılıqlı hörmət və sıx əməkdaşlıq əlaqələri ilə bağlıdır. Onun sözlərinə görə, “bu mübarək fəaliyyətdə, şübhəsiz ki, Moskva və bütün Rusiyanın patriarxı Kirilin böyük əməyi var.
Şeyxülislam çıxışının sonunda Prezident İlham Əliyevin və Azərbaycan xalqının adından Rusiya Müsəlmanları Ruhani İdarəsinin və Rusiya Müftilər Şurasının sədri Ravil Həzrət Qaynutdinə 65 illik yubileyi münasibətilə təbrikləri çatdırıb və ona 44 günlük Vətən müharibəsində Azərbaycana göstərdiyi qardaş dəstəyinə görə təşəkkürünü bildirib.
40 ölkədən qonaqların iştirak etdyi tədbirdə ölkəmizi Allahşükür Paşazadə ilə yanaşı, Dini Qurumlarla İş üzrə Dövlət Komitəsinin sədri Ramin Məmmədov və Bakı Beynəlxalq Multikulturalizm Mərkəzinin direktoru Rəvan Həsənov təmsil edirlər.
