Azərbaycan səfiri Rusiya mükafatı alıb

Rusiya Baş nazirinin müavini Tatyana Qolikova Azərbaycanın Moskvadakı səfiri Polad Bülbüloğluya “Ermitaj mükafatı”nı təqdim edib.

X Sankt-Peterburq Birləşmiş Mədəniyyətlər Forumu çərçivəsində Ermitaj Muzeyinin “Qış sarayı”nda keçirilən mərasimdə Rusiya Prezidentinin beynəlxalq mədəni əlaqələr üzrə xüsusi nümayəndəsi Mixail Şvıdkoy bildirib ki, Polad Bülbüloğlu mədəniyyətlərarası əlaqələrin möhkəmlənməsinə layiqli xidmət edib. Sankt-Peterburqun qubernatoru Aleksandr Beqlov isə vurğulayıb ki, Polad Bülbüloğlu Azərbaycan mədəniyyətini təkcə Rusiyada deyil, bütün dünyada tanıtmış böyük sənətkardır.

Mükafatı qəbul edən Polad Bülbüloğlu fəaliyyətinə verilən yüksək qiymətə görə təşəkkürünü bildirib, çıxışını “Qorxma, mən səninləyəm” filmindən mahnı səsləndirməklə yekunlaşdırıb.