Avqustun 20-dən 23-dək Qazaxıstanın Almatı vilayətinin Jetısu rayonundakı Koktal poliqonunda keçirilən “Altın kıran - 2024” (“Qızıl qartal-2024”) Azərbaycan–Qazaxıstan taktiki-xüsusi təlimləri başa çatıb.
Qazaxıstan MN-nin yaydığı məlumata görə, bu ölkənin Hava Desant-Hücum Qoşunlarının və Azərbaycan Ordusunun taktiki-xüsusi təlimləri ilk dəfə baş tutub.
Məlumatda qeyd edilir ki, təlimlərdə 50-dən artıq Azərbaycan, 250-dən çox Qazaxıstan hərbçisi iştirak edib. Təlimlər zamanı dağlıq ərazilərdə kəşfiyyat əməliyyatlarının aparılması, qeyri-qanuni hərbi birləşmələrin aşkar edilməsi həyata keçirilib. Azərbaycan ordusunun hərbçiləri Vətən müharibəsində və başqa uğurlu əməliyyatlarda qazandıqları təcrübəni qazaxıstanlı hərbçilərlə bölüşüblər.
Qulu KƏNGƏRLİ,
XQ-nin xüsusi müxbiri
Almatı
