Bu ayın əvvəlində dünyanı dolaşan bir xəbər bizim ölkəmizdə daha geniş əks-səda doğurdu: məhz Azərbaycan kökənli Türkiyə astronavtı Tuva Cihangir Atasevər kosmosa uçub və tarixi missiyasını uğurla başa vurub.

Xatırladaq ki, iyunun 8-də ABŞ-nin “Spaceport” (Nyu-Meksiko ştatı) kos­modromundan başlanan “Qalaktika 07 kosmos uçuşu” 1 saat 20 dəqiqə davam edib. Suborbital uçuşdan təxminən 40 dəqiqə sonra astronavtların olduğu kos­mik kapsul daşıyıcı raketdən ayrılıb. 15 dəqiqə ərzində 90 kilometr hündürlükdə 13 müxtəlif elmi təcrübə həyata keçirilib. Daha sonra əvvəl kosmik kapsul, ardın­ca daşıyıcı raket Yerə uğurlu eniş edib. Suborbital araşdırma missiyası zamanı Tuva Cihangir Atasever, üzərində Azər­baycan və Türkiyə bayraqları işlənmiş forma geyinib. Astronavt uçuş missiyasını Türkiyə Prezidenti Rəcəb Tayyib Ərdoğa­nın “TEKNOFEST” festivalı çərçivəsində ona təqdim etdiyi Türkiyə və Azərbaycan bayraqları ilə həyata keçirib.

Məlum olduğu kimi, Türkiyə Cümhu­riyyətinin 100 illiyində Türkiyə Kosmik Agentliyi və TUBİTAK-ın seçimi əsasında 2 astronavt kosmosa uçuş hüququ qa­zanıb. Prezident Rəcəb Tayyib Ərdoğan ötən ilin aprel ayında İstanbulda keçirilən “TEKNOFEST”də Türkiyənin ilk astro­navtlarının Alper Gezeravcı və Tuva Ci­hangir Atasever olacağını elan edib. On­lar 36 min namizədin arasından seçilib. Hər iki astronavt bir ildən çox NASA-da ciddi təlim proqramında iştirak ediblər.

Tuva Atasevər 12 avqust 1992-ci ildə Ankarada doğulub. Bilkənd Universite­tinin elektrik və elektronik mühəndislik fakültəsini bitirib. Məzun olduqdan sonra Kaliforniyada magistr təhsili alıb və ardın­ca Türkiyənin ROKETSAN şirkətində 5 il sevdiyi sahədə çalışıb. 

Kosmosa uğurlu uçuşdan Yerə qayı­dınca Tuva özəl təəssüratlarını bölüşüb, ilk növbədə ailə üzvlərinin onunla qürur duyduqlarını söyləyib, həmçinin Bakıda yaşayan qohumlarını yada salıb. “Yan­var ayında Alper Gezeravcı beynəlxalq heyətlə kosmosa uçdu. İyunda isə növ­bə mənə çatdı. Çox həyəcanlı olsam da, ən özəl məqamlardan biri pəncərədən baxanda gördüyüm atmosferin maviliyi idi. Belə anları həm Türkiyəyə, həm də Azərbaycana bəxş etmək, hər iki bayraq qolumda və sinəmdə kosmosa uçmaq – təbii ki, bu təcrübənin mənim üçün xüsusi mənası var idi. Bunu bacardığım üçün çox şadam. Azərbaycan mənim ana vətə­nimdir, ürəyimdə xüsusi yer tutur. Anam orada doğulub. Dəfələrlə səfər etdiyim Bakı ilə bağlı unudulmaz uşaqlıq xatirələ­rim var. 

Sonra Tuva deyib: “Məşhur bir deyim var: “Bir millət, iki dövlət”. Bizim iki bay­rağımız var, amma bir millətik. Beləlik­lə, həm sevincli, həm də kədərli gündə ölkələrimiz yer üzündə yan-yana olduğu kimi, kosmosda bu iki ölkənin bayraqla­rının sinəmdə yan-yana olması zərurətini hiss etdim. Bu iki bayrağı kosmosa apar­maq, ən azı 3 dəqiqəlik mikroqravitasi­ya və çəkisizliyi hiss etmək imkanı məni son dərəcə qürurlandırdı. Mən həqiqətən ümid edirəm ki, Türkiyə və Azərbaycan kosmik texnologiya sahəsində irəliləyiş­lər edəcək və bizə bu sahədə əldə edilən əlavə imkanlar sayəsində insanların hə­yat səviyyəsini yaxşılaşdıra biləcəyimiz bir gələcək göstərəcək”.

Üzərinə götürdüyü vəzifəyə görə çox xoşbəxt olduğunu dilə gətirən soydaşı­mız sonda bildirib ki, əldə etdiyi təcrübəni gənclərimizlə bölüşmək və onların daha iddialı addımlar atmalarını təmin etmək üçün səbirsizlənir.

Gənc astronavt “Vətənə qayıtdıqdan sonra Türkiyə bayrağını cənab Rəcəb Tayyib Ərdoğana, Azərbaycan bayrağını isə cənab İlham Əliyevə təhvil verməyi planlaşdırıram”, – deyə əlavə edib.