Elm və Təhsil Nazirliyi Coğrafiya İnstitutunun bir qrup əməkdaşı Almaniyanın Yustus Libix adına Gissen Universitetində keçirilən “Cənubi Qafqazda geoparkların idarə edilməsi” adlı beynəlxalq seminarda iştirak edib. 

Bir həftə davam edən seminar Gissen Universitetinin Coğrafiya kafedrası (Al­maniya), İ.Cavaxişvili adına Tbilisi Dövlət Universitetinin V.Baqrationi adına Coğra­fiya İnstitutu (Gürcüstan), akademik H.Ə­liyev adına Coğrafiya İnstitutunun birgə təşkilatçılığı və DAAD (Alman Akade­mik Mübadilə Xidməti) fondunun maliyyə dəstəyi ilə keçirilib. Elmi məclisdə ölkə­mizi Coğrafiya İnstitutunun icraçı direktor, dosent Zaur İmrani, Landşaftşünaslıq və landşaft planlaşdırılması şöbəsinin aparı­cı elmi işçisi dosent Elina Kərimova, De­moqrafiya və əhali coğrafiyası şöbəsinin elmi işçisi Bəyimxanım Hüseynova və doktorant Aslan Babaxanov təmsil edib­lər.

Tədbirdə Cənubi Qafqazda geopark­ların təşkili, planlaşdırılması və perspek­tivləri, onların fəaliyyətində yarana bilən problemlər və onların həlli yolları, geo­parkların verilənlər bazasının yaradılma­sı, sahə məlumatlarının toplanılmasında yarana bilən çətinliklər və məhdudiyyət­lər müzakirə olunub, Cənubi Qafqazda potensial imkanları geniş olan ərazilərdə geoparkların yaradılması və inkişaf etdi­rilməsi məsələləri nəzərdən keçirilib. 

Zaur İmrani “Azərbaycanın təbiət abidələri və geoparkların yaradılması üçün potensial ərazilər”, Bəyimxanım Hüseynova “Azərbaycanda geoparkla­rın və geoturizmin perspektivləri: inkişaf və idarəetmə”, Aslan Babaxanov “Ge­oparkların inventarlaşdırması yolları: Təkmilləşdirilmiş Məlumat İdarəetməsi üçün SmartGIS-in inteqrasiyası” adlı mə­ruzələrlə seminarda çıxış ediblər.

Tədbirə ev sahibliyi edən Gissen Uni­versiteti iştirakçılar üçün UNESCO-nun bələdçiliyi ilə elmi ekskursiya təşkil edib. Tədbir iştirakçiları, eyni zamanda kerami­ka muzeyi, geologiya muzeyi, tuf mədə­niyyəti, vulkanik lava günbəzi, lava zirzə­misi, vulkanik göl və s. ilə yaxından tanış olmaq imkanı əldə ediblər. 

XQ