Ailə, Qadın və Uşaq Problemləri üzrə Dövlət Komitəsi, Vətəndaşlara Xidmət və Sosial İnnovasiyalar üzrə Dövlət Agentliyi və “Azərbaycan Uşaqlarının İnkişaf Platforması” İctimai Birliyinin birgə təşkil etdiyi 14–17 yaşlı uşaqlar arasında “İTi Zəka–2” hakatonunun – proqramçıların yarışının mükafatlandırma mərasimi keçirilib.
AQUPDK-nin sədri Bahar Muradova müsabiqənin yekun hissəsinin həm də növbəti uğurların başlanğıcı olduğunu bildirib. Ötən tədbirlə müqayisədə indi yarışa qoşulanların və komanda sayının artdığını vurğulayan komitə sədri, iştirakçılar arasında qızların da olduğunu, onların informasiya texnologiyalarına artan marağını sevindirici hal kimi qeyd edib.
Vətəndaşlara Xidmət və Sosial İnnovasiyalar üzrə Dövlət Agentliyinin sədr müavini Ceyhun Salmanov müraciət edən 530 uşaqdan 93 nəfərin finala çıxmasının böyük uğur olduğunu soyləyib. Elm və təhsil nazirinin müavini Firudin Qurbanov yeniyetmə və gənclərin özünü idarəetmə bacarığının inkişafı, yeni tanışlıqlar əldə etmək baxımından belə intellektual yarışmaların əhəmiyyətini qeyd edib.
Texnoloji innovasiyalar dövründə yaşadığımızı diqqətə çatdıran gənclər və idman nazirinin müavini İndira Hacıyeva deyib ki, gələcəyimizi texnologiyasız, innovasiyalarsız təsəvvür etmək artıq qeyri-mümkündür.
Gənclər Fondunun icraçı direktor vəzifəsini icra edən Qədir Xəlilov bildirib ki, uşaqların potensialının üzə çıxarılmasında əhəmiyyətli olan hakaton, həm də gəncliyə verilən dəyərin nümunəsidir.
Zərifə BƏŞİRQIZI
XQ
