Cenevrədə Beynəlxalq Əmək Təşkilatına üzv ölkələrin hökumət nümayəndələri və sosial tərəfdaşların iştirakı ilə Beynəlxalq Əmək Konfransının 112-ci sessiyası keçirilir.
Əmək və əhalinin sosial müdafiəsi naziri Sahil Babayev çıxış edərək təşkilatın yenilənmiş Qlobal Sosial Müqavilə təşəbbüsünün əhəmiyyətini qeyd edib. O, BƏT-in prinsiplərinə uyğun olaraq ölkəmizdə əmək, məşğulluq və sosial müdafiə sahələrində sosial tərəfdaşlığa xüsusi önəm verildiyini vurğulayıb.
Nazir DOST konsepsiyasının və son illər sosial sahədə icra edilən geniş elektronlaşdırma proqramının, əmək və məşğulluq sahəsində aparılan siyasətin BƏT-lə sıx əməkdaşlıqda həyata keçirildiyini vurğulayıb.
Sahil Babayev Azərbaycanın BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına evsahibliyi edəcəyi, COP29-un BƏT-in gündəliyini daha irəli aparmaq üçün faydalı platforma olacağını diqqətə çatdırıb.
***
Sahil Babayev sessiya çərçivəsində Türkiyənin əmək və sosial müdafiə naziri Vedat İşıkhanla görüşüb. Söhbət zamanı iki nazirlik arasında əmək və sosial müdafiə sahəsində əməkdaşlıq üzrə Birgə Daimi Komissiyanın bu il mayın 30-da Bakıda keçirilən 11-ci iclasının əlaqələrin daha da genişlənməsində önəmi qeyd edilib. Sonra S.Babayev Moldovanın sosial müdafiə naziri Aleksey Buzunu Beynəlxalq Əmək Konfransının builki sessiyasının prezidenti seçilməsi münasibətilə təbrik edib. İsveçrə Konfederasiyasının dövlət katibi Boris Zürxerlə görüşdə iki ölkə arasında əmək və məşğulluq sahəsində əməkdaşlığın genişləndirilməsi, fəal təcrübə mübadilələrinin aparılması üçün böyük potensial olduğu bildirilib.
Z.HÜSEYNOVA
XQ
