Audiovizual Şura televiziya və ya radio kanallarında elektron siqaretlərin təbliğinin ölkə qanunvericiliyinin pozulması kimi dəyərləndirib.
Qurumun bu barədə açıqlamasında bildirilir ki, son zamanlar bir sıra yayımçılara ödənişli əsasda bir məlumatın yayımlanması barədə təkliflər daxil olur. Həmin məlumatda bir sıra xarici xəbər agentliklərinə istinadla son zamanlar daha çox amerikalı siqaret aludəçilərinin alternativ nikotin məhsullarına keçmələri haqqında məlumatlar öz əksini tapıb. Belə informasiyalarda mütəxəssislərin daha çox insanın siqareti tərgitməsi və zərərli kimyəvi maddələrin təsiri guya az olan daha yaxşı məhsullara keçməsi tendensiyasına müsbət yanaşmaları iddia olunur.
Audiovizual Şura müvafiq media subyektlərinin sorğularına cavab olaraq və məsələnin ciddiliyini nəzərə alaraq bildirir ki, belə məlumatların televiziya və ya radio kanallarında yayımlanması “elektron siqaret”lərin təbliği hesab olunduğundan ölkə qanunvericiliyinin pozulmasıdır. Xatırladılır ki, “Tütün məmulatlarının istifadəsinin məhdudlaşdırılması haqqında” Qanununa əsasən bütün növ qəlyanlar və elektron siqaretlər tütün məmulatları hesab olunur. “Reklam haqqında” Qanunda da tütün, tütün məmulatlarının və onların ləvazimatlarının, o cümlədən tənbəki çubuqlarının, qəlyanların, elektron siqaretlərin, siqaret kağızlarının, alışqanlarının reklamı qadağandır.
Audiovizual Şura bildirir ki, qed edilən məlumatları yayan audiovizual media subyektinə inzibati sanksiya tətbiq ediləcək.
XQ