Dünyaşöhrətli türk alimi, ABŞ-nin Şimali Karolina Universiteti biokimya və biofizika fakültəsinin professoru, kimya üzrə Nobel mükafatı laureatı Əziz Səncər Naxçıvana səfəri çərçivəsində Muxtar Respublikada Azərbaycan Respublikası Prezidentinin səlahiyyətli nümayəndəsi Fuad Nəcəfli ilə görüşüb.

Səlahiyyətli nümayəndə Əziz Səncəri sevgi-sayğı ilə qarşılayıb, dünya şöhrətli alimi Naxçıvanda salamlamaqdan məm­nunluğunu bildirib. Qonaq əvvəlcə Nax­çıvan Muxtar Respublikası Ali Məclisinin binası ilə tanış olub. Fuad Nəcəfli Ali Məc­lisin iclas salonunda məlumat verib ki, bu­rada ümummilli lider Heydər Əliyevin rəh­bərliyi ilə tarixi qərarlar qəbul edilib. Ötən il Türkiyə Respublikasının Prezidenti Rə­cəb Tayyip Ərdoğanın Naxçıvana səfə­rini xatırladan səlahiyyətli nümayəndə diqqətə çatdırıb ki, dövlət başçılarımızın iştirakı ilə İğdır–Naxçıvan qaz kəmərinin təməlinin qoyulması mərasimi də burada keçirilib.

Sonra Fuad Nəcəfli ulu öndər Heydər Əliyevin siyasi fəaliyyətinin Naxçıvan döv­rü barədə məlumat verib. Xüsusilə vurğu­layıb ki, görkəmli dövlət xadimi Heydər Əliyevin rəhbərliyi ilə 1991–1993-cü illər­də Naxçıvan Muxtar Respublikası Azər­baycanda müstəqil dövlətçiliyin böyük məktəbinə çevrilib. Müstəqil Azərbaycan Respublikasının dövlət bayrağı ilk dəfə Naxçıvanda qəbul edilib, müstəqil Azər­baycanın dövlətçilik sisteminin konturları, gələcək inkişafının istiqamətləri məhz bu­rada müəyyənləşdirilib. 

Heydər Əliyevin Ali Məclisin Sədri seçilməsi Naxçıvan–Türkiyə münasibət­lərinin qurulmasında da yeni mərhələyə təkan verib. Məhz o dövrdə Türkiyənin nümayəndə heyəti ilə danışıqlar aparılıb və əməkdaşlıq haqqında protokol imza­lanıb. Həmin təməllər üzərində qurulan Azərbaycan–Türkiyə qardaşlıq və dostluq münasibətləri hazırda dövlət başçılarımı­zın rəhbərliyi altında möhkəm və sarsıl­maz xarakter daşıyır.

Nobel mükafatı laureatı Əziz Səncər göstərilən qonaqpərvərliyə və səmimi qə­bula görə təşəkkür edib, Naxçıvanda ol­maqdan məmnunluğunu ifadə edib.

Sonda qarşılıqlı hədiyyələr təqdim olunub, xatirə fotosu çəkdirilib.

* * *

ADA Universitetində də AMEA-nın fəxri üzvü, ABŞ-ın Şimali Karolina Uni­versitetinin professoru Əziz Səncərlə görüş keçirilib.

ADA Universitetinin rektoru Hafiz Pa­şayev çıxış edərək bu nadir və unudul­maz görüşün ali təhsil ocağının tarixində əlamətdar hadisə olduğunu bildirib. 

Universitetin prorektoru Fariz İsma­yılzadənin moderatorluğu ilə keçirilən gö­rüşdə professor Əziz Səncər tələbələrə gələcəklə bağlı qərarlarında onlar üçün maraqlı olan sahəni seçməyi tövsiyə edib. Dünyaşöhrətli alim uğur qazanmağın sir­rinin çoxlu çalışmaq olduğunu qeyd edib.

Tələbələrə orqanizmi cavan saxlamaq üçün düzgün qidalanmağın önəmli oldu­ğunu vurğulayan Əziz Səncər özünün vegetarian olmasına baxmayaraq qida rasionuna, az da olsa, ət əlavə etməyin vacib olduğunu söyləyib.

Görüşdə tələbələrin sualları cavablan­dırılıb.

Tədbirin sonunda rektor Hafiz Paşa­yev Əziz Səncərə ADA Universitetinin medalını təqdim edib.

* * *

Ölkəmizdə səfərdə olan Nobel mü­kafatı laureatı, professor Əziz Səncər Azərbaycan Tibb Universitetində də olub. ATU-nun rəhbər şəxsləri ilə ke­çirilən görüşdən sonra professor Əziz Səncər universitetin tələbə və müəllim heyəti qarşısında mühazirə ilə çıxış edib.

ATU-nun rektoru professor Gəray Gə­raybəyli qonağa universitetin yaranma tarixi, strukturu, tədris proqramı və təhsil prosesi barədə ətraflı məlumat verib. O, artıq 90 yaşını geridə qoyan qocaman universitetin Azərbaycanda yüksəkixti­saslı həkimlərin, elmi araşdırmaçıların yetişdirilməsində böyük rolu olduğunu vurğulayıb. Rektor dünyaşöhrətli alimin ATU-da qonaq olmasını universitet kollek­tivi, tələbələr və gənc tədqiqatçılar üçün mühüm hadisə kimi dəyərləndirərək Əziz Səncərə minnətdarlığını bildirib.

ATU-nun onkologiya kafedrasının müdiri, Tədris Onkoloji Klinikanın müdiri, akademik Əhliman Əmiraslanov ölkə­mizdə elmin inkişafı istiqamətində dövlət səviyyəsində görülən işlərdən danışıb. Təhsilin və səhiyyənin bütün istiqamətləri üzrə müvəffəqiyyət qazanmaq üçün elmi tədqiqatların önəmini vurğulayıb.

Nobel mükafatçısı Əziz Səncər ATU-da olmaqdan məmnunluğunu ifadə edib. O, universitetində mövcud təhsil prosesi, tələbələrin və rezidentlərin elmi tədqiqat­larını aparması üçün yaradılmış şəraitlə maraqlanıb. Dünyaşöhrətli alim savadlı nəslin yetişdirilməsi üçün gənclərdə elmə maraq oyatmağın, fizika, kimya, biologiya və texnologiya sahələrini təşviq etməyin əhəmiyyətindən danışıb.

Sonra Nobel mükafatçısının universi­tetin akt zalında tələbə və müəllim heyəti üçün “Xərçəng xəstəliyinin müalicəsində EdU-nun (5-ethynyl-2'-deoxyuridine) tət­biqi” mövzusunda mühazirəsi dinlənilib. Mühazirədə EdU-nun insan genomuna təsiri, mədəaltı vəzin, mərkəzi sinir sis­temi xərçənginin müalicəsində effekti ilə bağlı elmi araşdırmaların nəticələrinə is­tinad olunub.

Görüşdə görkəmli elm xadimi tələbə və müəllimlərin çoxsaylı suallarını cavab­landırıb.

* * *

Kimya üzrə Nobel mükafatı laureatı, ABŞ-ın Şimali Karolina Universitetinin professoru Əziz Səncər dünən AMEA-da keçirdiyi mətbuat konfransında Azərbaycana səfərinin yekunu barədə məlumat verib.

Türk xalqlarının öyünc mənbəyi sayı­lan dünyaşöhrətli alim bildirib ki,

Azərbaycana ilk gəldiyim zaman Qa­rabağ işğal altında idi. Bütün danışıqları­mızda bu məsələ hər kəsin düşüncəsinə hakim idi. İkinci səfərimdə Qarabağ işğal­dan azad olunsa da, Xankəndi düşmənin əlində idi və bunun narahatlığı var idi: “Bu səfərimdə isə ünsiyyətdə olduğum insan­larda bir rahatlıq olduğunu hiss etdim. İnsanlar gələcəyə ümidlə baxırlar, indi torpaq dərdimiz yoxdur. “Bundan sonra həyatımıza normal davam edəcəyik” fikir­ləri müşahidələrimin nəticəsi oldu”.

Professor Əziz Səncər Naxçıva­na səfərindən də söz açıb: “Naxçıvana getmək mənim üçün çox vacib idi. Hər zaman oraya getməyi istəmişəm. Deyər­dim ki, Naxçıvanın havası Bakıdan daha gözəldir, oranı çox sevdim. Böyük diqqət gördüm”.

XQ