2024-cü ildə “İslam ölkələrinin turizm paytaxtı” olan Özbəkistanın qədim Xivə şəhərində İslam Əməkdaşlıq Təşkilatının üzvü olan ölkələrin turizm nazirlərinin “Xivə 2024-cü ildə İslam dünyasının tuzizm şəhəridir” şüarı ilə XII sessiyası keçirilib.
Tədbirə təşkilata üzv dövlətlər–Türkiyə, Misir, Malayziya, Seneqal, Türkmənistan, Tacikistan, Qazaxıstan, Qırğızıstan, Banqladeş, Livan və digər dövlətlərin turizm nazirləri və ya səlahiyyətli nümayəndələri qatılıb. Ümumiyyətlə tədbirdə 56 ölkə, 14 beynəlxalq təşkilat təmsil olunub.
Sessiyanı təşkilatın turizm sahəsinin sədri , Azərbaycan Dövlət Turizm Agentliyi sədrinin müşaviri Kənan Quluzadə açıb. O, Azərbaycanın sədrliyi dövründə görülən işlər haqqında məlumat verib. Azərbaycanın BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına ev sahibliyi etməsi haqqında məlumat verən K.Quluzadə bu tədbirin böyük bir tarixi hadisə olduğunu söyləyərək İƏT-in üzvü olan dövlətlərin nümayəndələrini bu tədbirə dəvət edib.
Sonra K.Quluzadə İslam Əməkdaşlıq Təşkilatının turizm sahəsinə sədrliyi Özbəkistana təhvil verib.
Özbəkistanın ekologiya, ətraf mühitin mühafizəsi və iqlim dəyişkənliyi naziri Əziz Abduxakimov turizm sahəsində Özbəkistanda həyata keçirilən layihələr haqqında məlumat verib, ölkənin sədrliyi dövründə görüləcək işlərdən danışıb. O deyib ki, ötən il xarici dövlətlərdən Özbəkistana 7 milyon turist gəlib. Bu gün ölkədə turizm sahəsində 370 min adam çalışır.
Xatırladaq ki, 2022-ci ildə İƏT turizm nazirlərinin Bakıda keçirilən XI iclasında 2500 yaşı olan qədim Xivə şəhəri 2024-cü ildə “İslam ölkələrinin turizm paytaxtı” elan edilmişdi.
Qulu KƏNGƏRLİ,
XQ-nin xüsusi müxbiri
Xivə
