Milli Məclisin Sədri Sahibə Qafarova Sinqapur Respublikasına rəsmi səfəri çərçivəsində bu ölkə parlamentinin sədri Seah Kian Penq ilə görüşüb.

Sinqapur parlamentinin sədri bu səfərin ölkələrimiz və parlamentləri­miz arasında əlaqələrə töhfə verəcə­yinə əminliyini bildirib. O, ölkələrimiz və qanunverici orqanlarımız arasında əlaqələrin daha da inkişafının vacibliyini vurğulayıb.

Söhbət zamanı bu il ölkələrimiz arasında diplomatik münasibətlərin qu­rulmasının 30-cu ildönümünün tamam olduğu diqqətə çatdırılıb və ötən illər ərzində bir sıra sahələrdə əməkdaşlığın inkişaf etdiyi bildirilib. 

Görüşdə ölkələrimizin beynəlxalq təşkilatlar, o cümlədən Qoşulmama Hərəkatı çərçivəsində uğurla əməkdaş­lıq etdiyi bildirilib. S.Qafarova Azərbay­can Prezidentinin təşəbbüsü ilə yaradı­lan Qoşulmama Hərəkatının Parlament Şəbəkəsinin fəaliyyəti haqqında məlu­mat verərək, şəbəkənin parlamentləri­mizin əməkdaşlığı baxımından mühüm bir platforma ola biləcəyini söyləyib. O, həmçinin Milli Məclisin 2022-ci ildə ASE­AN Parlamentlərarası Assambleyasında müşahidəçi statusu aldığını, bu təşkila­tın da əməkdaşlıq baxımından daha bir imkan olduğunu deyib.

Söhbət zamanı ölkələrimiz arasında iqtisadi, ticarət, nəqliyyat sahələrində əməkdaşlıq məsələləri də nəzərdən ke­çirilib. Həmçinin təhsil, elm, mədəniyyət, gənclər və idman sahələrində əlaqələrin inkişafının əhəmiyyəti qeyd olunub. Bu cür əməkdaşlığın ölkələrimiz arasında əlaqələrin inkişafına, insanlar arasın­da təmasların möhkəmlənməsinə töhfə verəcəyi diqqətə çatdırılıb.

Spiker qarşı tərəfə bu ilin noyabr ayında Bakıda keçiriləcək COP29 haqqında da məlumat verib. O, ölkəmi­zin belə mühüm beynəlxalq tədbirə ev­sahibliyi etməsinin Azərbaycanın iqlim dəyişikliyi ilə mübarizədə təkcə milli de­yil, həm də regional və qlobal miqyasda göstərdiyi səylərin tanınmasının göstə­ricisi olduğunu söyləyib. S.Qafarova sessiya çərçivəsində Parlamentlərarası İttifaq və Milli Məclisin birgə təşkilatçılığı ilə keçirilməsi nəzərdə tutulan parlament iclası haqqında da məlumat verərək, Sinqapur parlamentinin sədrini bu mü­hüm tədbirə dəvət edib.

Sonra Milli Məclisin nümayəndə heyəti Sinqapur parlamenti ilə tanış olub.

Ə.BƏDƏLOV
XQ