“Modern İnkişaf və Ailə” İctimai Birliyinin təşkilatçılığı ilə martın 2-də “Heydər Əliyev irsi, qadın siyasəti” mövzusunda konfrans keçirilib.
Birliyinin sədri Zərifə Quliyeva Azərbaycan xalqının Ulu öndər Heydər Əliyevin xatirəsini hər zaman əziz tutduğunu, onun zəngin irsini sadiqliklə davam etdirdiyini vurğulayıb. QHT rəhbəri bildirib ki, Azərbaycan qadınları ölkəmizdə ictimai-siyasi sabitliyin və əmin-amanlığın qorunması, milli dövlətçiliyimizin daha da möhkəmləndirilməsi istiqamətində əzmkarlıqla çalışırlar.
AMEA-nın vitse-prezidenti İradə Hüseynova ölkəmizdə qadın siyasətinin yüksək səviyyədə inkişaf etdirilməsindən məmnunluqda danışıb və bu siyasətin müsbət nəticəsi olaraq lider, sahibkar, elm və təhsil sahəsində uğur qazanan qadınlarımızın olduğunu diqqətə çatdırıb.
Milli Məclisin Ailə, qadın və uşaq məsələləri üzrə komitəsinin sədri Hicran Hüseynova, Milli Məclisin Əmək və əhalinin sosial müdafiə komitəsinin sədr müavini Məlahət İbrahimqızı, Ailə, Qadın və Uşaq Problemləri üzrə Dövlət Komitəsinin sədr müavini Sədaqət Qəhrəmanova, Milli Məclisin deputatı Jalə Əliyeva və başqaları, Ümummilli liderin zəngin irsinin daha geniş spektrdə öyrənilməsinin vacibliyini vurğulayaraq, Ulu Öndərin Azərbaycan xalqı, Azərbaycan qadını üçün gördüyü misilsiz işlərdən danışıblar.
Rəsmi hissədən sonra Zərifə Quliyevanın müəllifi olduğu “Heydər Əliyev irsi, qadın siyasəti” kitabının təqdimatı olub.
XQ
