Bakı Təşəbbüs Qrupu İstanbulda keçirtdiyi “Dekolonizasiya: İntibahın oyanışı” adlı konfransın ardınca vətəndaş cəmiyyəti təşkilatları adından beynəlxalq kampaniya başladıb.

Petisiyada Fransa Prezidenti Emma­nuel Makrona müraciət edilərək, Fransa­nın Afrikadan oğurladığı 90 mindən artıq maddi-mədəni əsərlərin mənşə ölkələ­rinə qaytarılması tələb olunur.

Afrika ölkələrindən müstəmləkə döv­ründə oğurlanmış, talan edilmiş 90 min­dən çox mədəni sərvət hazırda Fransa muzeylərində nümayiş olunur. 

Fransa Prezidenti Emmanuel Makron 2017-ci ildə bildirib ki, Afrikanın mədəni sərvətləri Afrikada sərgilənməlidir və 5 il müddətində hər bir mədəni, tarixi əşya­nın geri qaytarılacağına söz vermişdi. Həmin vaxtdan 7 il keçməsinə baxmaya­raq, Makron vədinə əməl etməyib.

Bakı Təşəbbüs Qrupu tələb edir ki, Fransa hökuməti qanunvericiliyinə də­yişiklik etməli, oğurladığı artefaktları mənbə ölkələrinə geri qaytarmalı və qa­nunsuz mülkiyyətçi kimi tarixi əsərlərin qanuni mülkiyyətçisi olan ölkələrə təzmi­nat ödəməlidir.

BTQ Beynəlxalq Ədalət Məhkəməsində Yeni Kaledoniyaya dəstək verəcək

Bakı Təşəbbüs Qrupu Beynəlxalq Ədalət Məhkəməsində Kanaki – Yeni Kaledoniyaya dəstək verəcək.

Bu barədə təşkilatın təşəbbüsü ilə Türkiyənin İstanbul şəhərində keçirilən "Dekolonizasiya: İntibahın oyanışı" adlı beynəlxalq konfransın yekunlarına dair yayılan kommunikedə bildirilib.

Kommunikedə bildirilib ki, Fransanın müstəmləkəçilik siyasətindən əziyyət çəkən ölkələrin nümayəndələrinin, eləcə də BMT-nin ixtisaslaşmış institutlarının iştirak etdiyi konfransda Kanaki – Yeni Kaledoniyadan olan nümayəndə heyəti Fransa hökumətinin təşkil etdiyi kütləvi miqrasiyanı öz daxili qanunlarına uyğun olaraq qanuniləşdirmək üçün Emmanu­el Makron hökumətinin atdığı addımlara qarşı, xüsusən də seçici kütləsinin sayını artırmağa hesablanmış addımları qınadı­ğını bəyan edib.

“Bakı Təşəbbüs Qrupu Kanaki – Yeni Kaledoniyanın siyasi tarixinin böhran ya­şanan bu dövründə ona dəstək verdiyini təkrar nümayiş etdirdi, regional və bey­nəlxalq təşkilatlarda, xüsusilə də Bey­nəlxalq Ədalət Məhkəməsi səviyyəsində fəaliyyətini davam etdirəcəyini bildirdi".

Fransanın müstəmləkəçilik siyasətinə qarşı növbəti etiraz aksiyası 

Fevralın 27-də Yeni Kaledoniyanın paytaxtı Numeada məhkəmə qarşı­sında Fransanın müstəmləkəçilik si­yasətinə qarşı növbəti etiraz aksiyası keçirilib.

Etirazçılar Fransa hakimiyyəti tərə­findən saxlanılmış fəalların azadlığa bu­raxılmasını tələb ediblər.

Xatırladaq ki, 21 fevral tarixində Fran­sanın daxili işlər və dənizaşırı naziri Ge­rald Darmaninin Yeni Kaledoniyaya səfəri zamanı Yeni Kaledoniyada etiraz aksiya­sı keçirilib. Həmin etiraz aksiyası zamanı Yeni Kaledoniyanın müstəqilliyi uğrunda mübarizə aparan bir neçə fəal Fransa po­lisi tərəfindən həbs edilib.

Aksiyada da həmişə olduğu kimi, ölkəmizə hörmət əlaməti olaraq, Azər­baycan bayrağı dalğalandırılıb.

XQ