Dünən qardaş Tükiyənin alpinist qrupu ötən illərin ənənəsini davam etdirərək Naxçıvanda Xocalı faciəsi qurbanlarının xatirəsini Haçadağ zirvəsinə yürüşlə anıblar.

Naxçıvan Muxtar Respublikasının Gənclər və İdman Nazirliyi, Turizm De­partamenti və Hava və Ekstremal İdman Növləri Federasiyasının birgə təşkil təşkil etdiyi aksiyada İstanbul, Antalya, Qars, Ağrı, Elazığ və İğdır bölgələrindən gələn 40 nəfər peşəkar və həvəskar alpinist, eləcə də 10 nəfər yerli ekstrimsevər iş­tirak edib. Xocalı soyqırımı qurbanlarının əziz xatirəsinə həsr edilmiş yürüş səhər saatlarında Culfa rayonu Gal kəndindən start götürüb və iştirakçılar zirvəyə qədər olan 9 kilomet məsafəni qət ediblər. 

2 min 415 metr yüksəklikdə – Haça­dağın zirvəsində hər iki ölkənin dövlət himni səslənib. İştirakçılar Xocalı faciəsi qurbanlarını və Vətən müharibəsi şə­hidlərini dərin ehtiramla yad ediblər. Ak­siyada soyqrımı cəlladlarını lənətləyən, onların cəzalandırılmasına çağıran və Azərbaycan–Türkiyə qardaşlığının sar­sılmazlığını ifadə edən şüarlar söylənib.

Yürüş başa çatdıqdan sonra alpinist­lərə təşəkkürnamə təqdim olunub. Çətin relyefdə iştirakçıların təhlükəsizliyinin təmin edilməsi və mövcud risklərin idarə olunması məqsədilə təhlükəsizlik qurum­larının əməkdaşları aksiyanı müşayiət ediblər.

Alpinist qrupu üçgünlük səfər zama­nı Naxçıvan şəhərində ümummilli lider Heydər Əliyevin və Türkiyə dövlətinin qurucusu Mustafa Kamal Atatürkün abi­dələrini ziyarət ediblər. Qonaqlar Heydər Əliyev Muzeyində, muxtar respublikanın tarixi və təbiət abidələrində də olublar.

Səbuhi HƏSƏNOV,
“Xalq qəzeti”nin bölgə müxbiri