Mərkəzi Seçki Komissiyasının sədri Məzahir Pənahov bu fikirləri növbədənkənar prezident seçkilərini izləmək üçün ölkəmizdə səfərdə olan Şanxay Əməkdaşlıq Təşkilatının Baş Katibi Can Minin rəhbərlik etdiyi nümayəndə heyəti ilə görüşdə səsləndirib.
MSK sədri seçkilərdə mübarizə aparacaq namizədlər, həmçinin ölkəmizdə seçicilərin və yaradılmış məntəqələrin sayı, seçicilər və müşahidəçilər üçün yaradılmış şərait barədə qonaqlara geniş məlumat verib.
M. Pənahov ilk dəfə olaraq seçkilərin azad edilmiş ərazilərimizdə də keçiriləcəyini diqqətə çatdırıb. O qeyd edib ki, 22 mindən çox seçici həmin ərazilərdə yaradılmış 26 məntəqədə səs verəcəklər. Həmçinin 3 təşkilat seçkilərdə “exit-poll” keçirmək üçün müraciət edib, onlardan biri ABŞ-ın “Oracle Advisory Group” təşkilatıdır.
O bildirib ki, seçicilər üçün bütün imkanlar yaradılıb, 1000 məntəqədə veb-kameralar quraşdırılıb. Seçki günü həmin məntəqələrdəki prosesi onlayn rejimdə izləmək mümkün olacaq.
Şanxay Əməkdaşlıq Təşkilatının Baş Katibi Can Min Azərbaycanda seçki prosesini müşahidə etməkdən məmnun olduqlarını bildirib. Baş katib seçkiləri izləmək üçün onlara yaradılan imkana görə təşəkkürünü ifadə edib. O, seçki prosesində qanunvericiliyin tələblərinə riayət edilməsinin, şəffaflığın təmin olunmasının vacibliyini diqqətə çatdırıb.
Əliqismət BƏDƏLOV
XQ