Dünya mediası Azərbaycanda fevralın 7-də keçiriləcək növbədənkənar prezident seçkiləri ərəfəsində dünyanın aparıcı mediasında geniş analitik məqalələr dərc edib.
Malayziyanın geniş oxucu kütləsinə malik “New Straits Time” nəşrində dərc olunmuş məqalədə 2020-ci il Vətən müharibəsi və ötən il aparılan antiterror tədbirlərindən sonra ərazi bütövlüyü və suverenliyini tam bərpa edən Azərbaycan xalqının ölkənin müasir tarixinin yeni mərhələsinə başlamaq ərəfəsində olduğu qeyd edilib. “Azərbaycanın yeni regional reallıq yaratması, öz ərazilərində suverenliyini, hüququn aliliyini bərpa etməsi bəzi beynəlxalq gücləri çox narahat edib. Bu kontekstdə AŞPA-nın Bakıya təzyiqini misal çəkmək olar. Qələbədən sonra gələcəyə daha inamla baxan Azərbaycan xalqı iqtisadi, sosial sahələrdə əldə olunmuş müvəffəqiyyətləri möhkəmləndirmək, Silahlı Qüvvələrin qüdrətini artırmaq üçün dövlətçiliyə olan sədaqətini bir daha nümayiş etdirəcək”.
Estoniyanın “Riigikogu” nəşrində dərc olunmuş məqalədə bu ölkənin ATƏT DTİHB-nin müşahidə missiyasının tərkibinə daxil olan nümayəndəsi Heljo Pikhofun Azərbaycanda növbədənkənar prezident seçkilərinə hazırlıqla bağlı ilk təəssüratı, Türkiyənin Anadolu agentliyinin saytında dərc edilmiş məqalədə Azərbaycanda növbədənkənar prezident seçkilərinə hazırlıq prosesinin yüksək səviyyədə aparıldığı, Rusiyanın TASS agentliyi, Birinci telekanalı və “Mir” telekanalının saytlarında da Azərbaycanda keçiriləcək növbədənkənar prezident seçkiləri ərəfəsində geniş analitik məqalələr yer alıb.
İordaniyanın “The Jordan Times” qəzetində və “Assasuana” portalında Azərbaycanda keçiriləcək növbədənkənar prezident seçkiləri ilə bağlı dərc olunmuş məqalələrdə bu ölkənin parlamentinin aşağı palatası və Senatının nümayəndələrinin seçkilərdə müşahidəçi qismində iştirak etdikləri vurğulanıb. Qazaxıstanın “Kazinform” agentliyinin saytında da prezident seçkiləri ilə bağlı analitik məqalə dərc edilib.
Əliqismət BƏDƏLOV
XQ