“Seçki prosesində xəstələrin və qocaların səs vermələrini təmin etmək üçün mobil səsvermə qutuları təşkil olunacaq. Bu, Seçki Məcəlləsinin tələbinə əsasən həyata keçirilir. Yəni, bu, bizim komissiyaların vəzifəsidir. Əgər səsvermə günü obyektiv səbəbdən məntəqəyə gələ bilməyən seçici varsa, onlar qeydiyyata alınır”.
Bu fikri Mərkəzi Seçki Komissiyasını sədri Məzahir Pənahov deyib.
O bildirib ki, mobil qutuların çatdırılması da Seçki Məcəlləsinin tələbinə uyğun olaraq, müəyyən tərəflərin müşayiətilə həyata keçirilir. Eyni zamanda, bütün məntəqələrdə “brayl” əlifbası ilə də səsvermə imkanı yaradacağıq. Həmçinin hərəkət məhdudiyyətli insanlar üçün pandusların quraşdırılmasına başlanılıb. Maksimum dərəcədə çalışmışıq ki, bu qəbildən olan bütün seçicilərimizin hüquqlarını təmin edək.
M. Pənahov beynəlxalq müşahidəçilərin qeydiyyatdan keçməsi barədə də məlumar verərək deyib ki, indiyədək 400-ə yaxın beynəlxalq müşahidəçi qeydiyyatdan keçib. Ümumilikdə, yerli müşahidəçilərlə birlikdə bugünədək 64 minə yaxın müşahidəçi qeydiyyatdan keçib. Artıq veb-kameraların sınağına başlamışıq. Hesab edirəm ki, səsvermə gününədək bu prosesi tam başa çatdıracağıq.
Əliqismət BƏDƏLOV
XQ
