“Növbədənkənar prezident seçkilərinin demokratik, azad və şəffaf keçirilməsi üçün hər cür şərait yaradılıb. İlk növbədə, bu sahədə zəngin qanunvericilik bazası mövcuddur. Xüsusilə, Seçki Məcəlləsini qeyd etmək istərdim. Bu məcəllə bir sıra beynəlxalq təşkilatlar tərəfindən demokratik sənəd kimi dəyərləndirilib. Məhz bunun nəticəsidir ki, ölkəmizdə keçirilən bütün seçkilər şəffaflığına və demokratikliyinə görə beynəlxalq müşahidəçilər tərəfindən müsbət qiymətləndirilib”.

Bu fikirləri bizimlə söhbət zamanı 25 saylı Nizami II Dairə Seçki Komis­siyasının sədri Heydər Vəliyev səslən­dirdi.

DSK sədri dedi ki, ölkəmiz seçkilər­də şəffaflığın təmin edilməsində həmişə nümunəvi olub. İnkişaf etmiş ölkələr ara­sında seçki məntəqələrinə veb-kamera­ların quraşdırılması və ya barmaqların gözlə görünməyən mürəkkəblə işarələn­məsi ilk dəfə məhz ölkəmizdə tətbiq edi­lib. Artıq 10 ildir ki, seçki məntəqələrinə veb-kameralar quraşdırılır. Seçki Mə­cəlləsinin 40.1-ci maddəsində də qeyd olunur ki, seçki prosesi aşkar olmalı­dır. Səsvermə günü ictimaiyyət tərəfin­dən prosesin gedişinin izlənməsi yolu ilə aşkarlığın təmin edilməsi və seç­kilərə ictimai inamın daha da artırılması məqsədilə seçki prosesində yeni texniki vasitə - veb-kamera tətbiq edilməsi de­mokratik seçki prosesinin təzahürüdür. Məntəqə seçki komissiyaları üzvlərinin öz vəzifələrini lazımınca icra etmələri, onlar tərəfindən seçki sənədləri ilə işin aparılması, seçicilərə öz iradələrini heç bir qanunsuz təsir olmadan azad ifadə etmək üçün zəruri şəraitin yaradılması, seçicilər tərəfindən seçki bülletenlərinin seçki qutusuna salınması, səslərin sayıl­ması, səsvermənin nəticələrinin müəy­yən edilməsi və digər proseslər bu qurğu vasitəsilə müşahidə olunur. Bu da seç­ki məntəqələrində seçkilərin qanunun tələbinə uyğun keçirilməsinin təsdiqidir. Ona görə də növbədənkənar prezident seçkilərinə start verildiyi gündən seçki məntəqələrində veb-kameraların quraş­dırılması diqqət mərkəzində saxlanılıb.

H.Vəliyev buliki seçkilərdə dairə üzrə 48 min 84 seçicinin səs verəcəyini dedi: 

– Seçki dairəsinin əhatəsində 34 seçki məntəqəsi yaradılıb. Onlardan 20- sinə veb-kameralar quraşdırılıb. Seçki məntəqələri bütün ləvazimatlarla təmin edilib. Bu seçkilərdə də barmaqların gözlə görünməyən mürəkkəblə işarələnməsi tət­biq olunacaq. Artıq bənövşəyi lampalar da paylanılıb. Bu üsul da seçki sistemində de­mokratikliyinə görə fərqlənir. Yadımdadır, ilk dəfə barmaqların gözlə görünməyən mürəkkəblə işarələndiyini və bənövşəyi lampa ilə yoxlanıldığını görən beynəlxalq müşahidəçilər bunu maraqla qarşıladılar. Hətta bəzi beynəlxalq müşahidəçilər bu üsulun öz ölkələrində də tətbiq edilməsi barədə təklif verəcəklərini bildirmişdilər. Barmaqların gözlə görünməyən mürək­kəblə işarələnməsi bir nəfərin təkrar səs verməsinin qarşısını alır. Məntəqələrdə seçkinin hazırlığı ilə tanış olan ATƏT-dən və Tacikistandan gəlmiş beynəlxalq müşa­hidəçilər razılıqlarını bildiriblər. 

Söhbət əsnasında məlum oldu ki, seçkiləri izləmək üçün müxtəlif partiyala­rın təmsilçiləri, eləcə də 690 müstəqil mü­şahidəçi qeydiyyatdan keçib. Seçki günü dairə və məntəqə seçki komissiyalarında seçki prosesini izləmək üçün müşahidə­çilər üçün müvafiq yer ayrılıb. Hazırda aşağı seçki komissiyasının üzvləri MSK tərəfindən təşkil olunmuş treninqlərdə iştirak edirlər. Təlimlərin bilik və bacarığı­mızın daha da təkmilləşdirilməsində rolu böyükdür. Treninqlərdə MSK tərəfindən hazırlanmış əyani vəsaitlərdən, yaddaş kitabçalarından, təlimatlardan və digər qanunvericilik sənədlərindən istifadə olu­nur. İştirakçılar onları maraqlandıran su­allara ətraflı cavab ala bilirlər. Bu da seçki prosesi zamanı qarşıya çıxan problemlə­rin həllində böyük dəstək olur.

Əliqismət BƏDƏLOV 
XQ