“17 saylı III Yasamal Seçki Dairəsində növbədənkənar prezident seçkilərinə hazırlıq işləri beynəlxalq müşahidəçilər tərəfindən də razılıqla qarşılanıb. Dairə üzrə seçkiyə hazırlıqla maraqlanan ATƏT-in DTİHB-nin beynəlxalq müşahidəçilərindən Olzhas Akanov və Arcldlacono Noeml görülən işlərdən məmnunluqlarını bildiriblər”. 

Bunu DSK sədri Qədir Kərimov bil­dirdi. Dedi ki, prezidentliyə namizədlər təbliğat-təşviqat kampaniyasını davam etdirirlər. Seçkilərin demokratik və şəffaf keçirilməsi üçün aşağı seçki komissiyası üzvlərinin maarifləndirilməsi prosesi bü­tün respublikanı əhatə edir. Hazırda regi­onlarda gündə iki dəfə olmaqla treninqlər keçirilir. Treninqlər Prezidentin 2011-ci il 27 dekabr tarixli sərəncamı ilə təsdiq edilmiş “Azərbaycan Respublikasında insan hüquq və azadlıqlarının müdafiəsi­nin səmərəliliyini artırmaq sahəsində Milli Fəaliyyət Proqramı” əsasında təşkil olu­nur. Treninqdə seçki günü məntəqə sədr­lərinin və üzvlərinin vəzifə borcları barədə bir daha məlumat verilir, sual doğura bilən məqamlar aydınlaşdırılır. Dairənin əhatə­sində olan aşağı seçki komissiyasının üzvləri həm MSK, həm də DSK ekspert­ləri tərəfindən aparılan təlimlərdə iştirak edirlər. 

Ümumilikdə, builki seçkilərdə 42 min 727 seçici 55 seçki məntəqəsində səs verəcək. Bu məntəqələrdən 40-ı daimi, biri xəstəxanada müvəqətti təşkil olun­muş, on dördü isə xarici ölkələrdə yaradı­lıb. Seçkilərdə şəffaflığın təmin olunması üçün 14 seçki məntəqəsinə veb-kamera quraşdırılıb. Bununla yanaşı, müşahidə­çilərin qeydiyyatdan keçməsi prosesi də təkmilləşdirilib. Müşahidəçilərin sayının çox olması seçkinin demokratik şəraitdə keçməsinə köməkdir. İndiyədək 200-dən çox müşahidəçi qeydiyatdan keçib. 

Q.Kərimov məntəqə seçki komissi­yasının üzvlərinin treninqlərdə iştirakının davam etdiyini bildirdi və təlimlərin seçki prosesinin insidentsiz, mübahisəsiz keç­məsində rolunun böyük olduğunu vur­ğuladı. Belə təlimlərdə MSK tərəfindən hazırlanmış əyani vəsaitlərdən, yaddaş kitabçalarından da istifadə edilir. Bu da komissiya üzvlərinin bilik və bacarıqları­nın daha da artırılmasına dəstək olur.

Əliqismət BƏDƏLOV 
XQ